Airport ṭha nei tlak kan ni em?

Lengpui airport chu kum sawmhnih chuang zet hman a lo ni ta a, a tir aṭangin hmasawnna lian tham han sawi tur a tam lo. Kan airport neihchhun chu duhkhawp lohna kan nei ṭeuh ang. Airport hmunhma, a runway sei zawngte chu kan ram leilungin a zir lo pawh a ni thei. Amaherawhchu a chhung han lut ila, duhkhawp lohna a tam tih chu hai rual loh. Airport ṭha leh changtlung neih kan duh vek, chutiang tur chuan sorkar pawhin hma a la reng. Tunah pawh DoNER ministry in a siam ṭhat nan pawisa tam tak a sanction a, hma pawh an la mek a ni.

India hmarchhak state dangte nena tehkhin chuan chhuanawm tak a ni lo mai thei. Chutih rualin, kan hmang reng a, zin veivakte pawhin an chhawr reng tho a ni.

Airport ṭha leh changtlung hi keini Mizote hian kan nei ve thei ngai ang em? Tun hnaiah Fur lai a ni a, khua a chhe ṭhin viau. Hemi ṭum pawh hian ruah sur bakah chhum a tam avangin flight zawng zawng an delay vek a. Kan flight ngei pawh darkar hnih ṭha zen zawn laiin an delay. Chutia flight delay a nih takah Mizo chauh ni lo hnam dang pawh kan kat nuk. Ṭam hnem nan airlines te chuan passenger te tan eitur an sem a, passenger tin chuan kan la diat diat a, kan rilte pawh a lo ṭam hman hle ni tur a ni, kan ei ta bawrh bawrh hlawm a. Kan ei zo chu Mizote kan la changkan lohzia a rawn lang leh nghal a. Thil eina kawrte chu mahni ṭhutna hnuaia hnawhkhawm te, ril ṭam zual deuhte ei belh cup noodles ei zawhna pawh seat hnuaiah an rawlh lut zel bawk a. Tui bottle ruak leh thingpui inna dispo. te pawh kil tin maiah a let pheng phung a. Kan awmna chhung chu mihring leh bawlhhlawh kan inchiahpiah a ni ber a, COVID hluar lai kha chu ni se, kan damlo nasa hlawm viau ang. A hnua bawlhhlawh bawma paih pawh awm chuang lo, kan ṭhutna apiangah kan hnutchhiah hlawm a ni ber mai. Bawlhhlawh bawm a khat liama paih theih tawh lo pawh ni si lo. Hnam dangten chutianga an lo tih chu thuhran, keini Mizo, airport neitute zawk hian a bawmah paih nachang kan hre lo hi chu a zia lo deuh a ni. Tlema zawng a bawma paihte chu an awm teh meuh mai, amaherwhchu a tam zawkin kan hnutchhiah mai mai hi chu kan changkan theih lohna pakhat a ni. Bawlhhlawh chauh ni lo, thil dang sawi tur pawh a tam ang.

Hmarchhak state airport zinga a lian ber pawl Gauhati airport khu en ta ila, zin vei vak hi darkar tin a sang tel an awm reng a, mahse passenger ten bawlhhlawh hi an duh duhnaah an hnutchhiah mai mai lo, a bawmah an paih zel. A tifaitu an awm rengte pawh a ni mai thei, amaherawhchu a tifaitute khuan mimal bawlhhlawh hnutchhiah an thian fai ngai mang lo. Gauhati airport-a Mizo passenger-te pawhin bawlhhlawh kan ṭhutna bul velah kan paih mai mai ngam lo, a bawmah kan paih ṭhin. A chhan chu tu pawhin a bawmah an paih vang a ni. Keini pawhin kan airport-ah hetianga kan chin chuan, hnam dang pawhin min rawn zui ve mai dawn a ni. Airport ṭha tak leh changkang tak nei ila, kan uluk lohva kan vawn ṭhat leh si loh chuan, aiport ṭha nei tlak kan ni dawn em ni?

Tuna kan airport neih chhun bak hi chu airport dang kan nei leh kher lo vang, uluk tak leh fai taka kan enkawl hian airport ṭha kan nei a ni mai. Keini Mizote, thu awih thei tak, thil ṭha duh hnam kan nih angin, airport ṭha kan neih theih nan, sorkar chauh ni lo, a hmangtu mipuite hi kan pawimawh. Mipuiten kan hman tlanglawn reng reng chu, fai takin han vawng hmasa phawt ila, thil ṭha kan nei dawn a ni mai. Kan airport neihchhun pawh ram dangte anga changtlung leh ropuitak ni lo mah se, a neituten kan uluk a, a hmun leh a vel kan vawnfai a, a chhunga thil awm reng reng mahni ta ang tak taka kan en chuan airport ṭha leh chhuanawm, "airport cute ber" chu kan nei ngei ang.

- Dr. Scarface