KAN HETI TA, IN MAWHPUH HUN A NI LOVE, ṬANRUAL HUN A NI TIH HI BIHRUKNAN HMAN NI LO SE

Sawrkar duhdan leh ruahman ang chuan inthlan chu duh lo leh a hun lo ve titute au ngaihthahin kan han paltlang ta chiah a. Result a lo lang chho ṭan ta, a pawi tih bak han sawi theih a va han vang ta em. 

Sawrkar ruahman dan hi a fel tawk lo thei e, tia au au pawh, ngaihthakna beng dawh dik thei lo khawpin, Sawrkar do, sawrkar sawisel, nih hlawhna mai kha a ni a. A tak kan hmuh hnu hian ni khat pawh Party a la awm ngai lo ngaihdan te hi Opposition kan intihsak ang a, kan thu kan in ngaihthlak sak dawn lo tihna a ni ta te hi kan ram hmabak tithim zualtu pakhat a ni ngei ang.

Hripui hi nunpui kan zir a ngai tihte chu,  thumawi, lem nahawm tak anga lang nimahse, a ke chheh remfelna tel lo chuan chhiatna zakhua thlentu a ni thei e. School, Biakin kan khar lai a, puipunna min siamsak lui tlattute hian, an mipuite tana Dan siam (Lagislate) chawp tur pawhin Emergency Assembly pawh an ko thei lo kha a ni a. Chu ai chuan he hripui hi ke chheh kawng mumal awm chuang si lovin, nunpui a, chenpui min zirtir kha an duh niin a lang. 

Zirna lama  pawl bawhkan  vak tum ang hrima Class I zawh veleh a BA Exam tum ang a ni thei tihte chu ngaihthahin, ka risk, ka phuahchawp tih lamah min luh pui a,  puipunna min han siamsak duhtu hian, Mizo mipuite hi “ka hmanghaih zofate” a ti leh a nih pawhin “Hmangaihna mak tak chu a lo ni” tih hla kan sakkhum a ngai tawh thei a nih hi maw.

State Election Commi­ssion (SEC) hian LLTF thuchhuah hrang hrang te hi an chhiar ve ang em? Pumpelh theih, pumpelhna kawng pawh awm reng, Pumpelh ni hram rih teh se,  ti a au lawm lawm pawh an awm ṭeuh lai a, inthlan an buatsaih luihna thiltih avanga Hripui kai an nih thu an sawi lanah te hian, SEC hian an thiltihah hian inchhirna pe in, hrehawm hi an ti ve tho ang em? a na hle mai. 

Hetih lai hian Public Interest mit a thlirtu atana beisei em ema kan lo en, CYMA leh MPF hruaitu SEC lamin an meeting pui te khan, inthlan a hun rih lo ve,  tia thu an thlen lova, inthlan ngeina tur relna meeting-ah an tel ve a nih si chuan  hmathlir an nei chau hle tihna a ni ang. Chumi a nih loh phei chuan tute emaw hmanrua (tool) an nih ngei a rinawm. An kaihhruai, an beramte dinhmun hi hmufiah turin an mit tidel tlattu, an mita khanchhuk lakchhuah ngai an nei a nih a rinawm ta hial a ni. 

India ram hruaituten kan ram economy tlachhe lutuk, chhinchhiah dan pakhatah phei chuan economy lama a hniamlai ber ni hiala tawn chu, a khua leh tuite hriselna pawh ngai pawimawh hmasa thei dinhmuna dinga inhre lovin, economy leh Covid 19 chu an thleng (exchange) mek niin a hriat  theih, mipui nun an sah ta huk huk bawk a ni. 

Hetih lai hian keini hian  kan economy nge kan thleng a, kan hminghliau theihna  session hmakhalh nana inthlan buatsaih luih tih te hi a chhanna awm lo tur mah nise, chhuidawn a awl ta. 

Inthlan leh a behbawm buaipuina avanga 'hri kai' tih LLTF ten an chhuah sup sup te hi finfriahna atan tlinga pawmin, 21st Aug 2020 lama “Thu inchah lawkna hnuhnung” tih te pawh sawi lan tawh bawk ang khan PIL a lo lut ta a nih pawhin kan hmachhawn tur ang ang chu kan hmachhawn tlang a ni tawh mai ang chu. 

Hmathlir leh zirlawkna neih dawrawm avanga “In dem hun a ni lo e..." tih ṭawngkam mawi leh ngaihno bei phena biru chunga mipuite hrikai tura barh lui-ah hian puhtu an lo awm palh a nih pawhin, “a mawh lo e” a tih theih hial ta awm e. Kan heti ta si.