Beihrawn hlawh ZPM leh Fake Opinion Poll

Tunlai Mizoram chu ZPM hlir kan sawi tih ziaktu ṭhenkhatin an rawn tih tawh kha kan la sawi chhunzawm zel. ZPM hi April thla khan inthlang ila seat 30 chu chiang takin an lak a rinawm a, an tlahniama an pil mai dawna a lan hnuah an rawn tho leh ṭan a, ZPM sorkar hi ZPM lo zawngin an hlauh avangin an beih rawn a, MNF hian Congress bei lovin ZPM a bei daih a, Congress hian Ruling Party MNF bei lovin ZPM a bei leh daih. ZPM pawh anmahni leh anmahni an inbei tawk viau an tih kha, ZPM aṭangin hruaitu ni phak chin an chhuak ve reng bawk. Tin, chutihlai chuan Opinion Poll mahni ngei hmel langin Youtuber lamin an siam sup sup bawk. Heti hian tunlai Mizoram Politics chu kan sawi kim tawh a tih theih awm e, kan bul ṭanna lamah hian a lang tawh a ni.

Chief Minister Pu Zoramthanga khan a sir tawn tawna Hnam Sipai thuama inthuam hmanga an ven ṭup chungin thu a sawi a, "Congress chu beih tham an ni tawh lo va, kan tana buaithlak ber chu ZPM hi an ni a," tiin aw thám tháwp sap khan a sawi tih i hmu ve ṭhin ang, ZPM nen an inbeih thu a sawi.

Pu Zoramthanga thusawi dang chu Hnam Runah khan tun inthlan lo awm tura an tlin leh ngei theihna tura sum an ngahzia, sum awmsa bakah SASCI aṭanga pûk chu MNF MLA candidate turin an hman theih tur ang khan an duh zawnga an hman turin a sawi hmiah hmiah mai. Sorkar sum ngah kha Party campaign-na atan hman an tum a, khatiang thusawi kha Court lama khin theih chi a ni em? tih hi Mizo ṭhalai lehkhathiam rualte ka zawt a che u. Pu Zorama'n Congress chu beih tham an ni tawh lo a tih dan hi ngaihtuah a ti thui ve leh tlat mai.

Congress tan Mizorama an dam khaw chhuah (Survival) theih dan awm chhun chu tuna an chet chhiat loh hi a ni. Congress hi India Hmarchhakah hian an ral chho mek a ni si a. Inthlan hnuhnungho kha kan en chuan Mizo hlang awmna lamah chuan Congress an lo tlem hle tih kan hmu a, Lunglei Municipal Council inthlanah an va mualpho a, chu chu Treasurer Pu Zodintluanga banna leh kha leak out-in a zui a, Zemabawk Local Council-ah phei chuan vote an hmu tlem thei hle a ni.

Pu Zodintluanga lehkha kha in lo hmuh ve chuan, "Kan Party chak loh chhanah mawhphurhna ka laa ka bang," tih a ni lo va, Pu Lalsawta leadership a rin ngam lohna hlir a ni. Congress Treasurer rawn lovin thutlukna tam tak kalpui a ni a, Pu Lalsawta hnena a thawn tur kha a leak out a, Congress hi tun hma kha chu ni se lehkha leak out avang khan Pu Zodintluanga kha an thunun ngam ang. Congress hruaitu atan Pu Lalsawta a rin loh avangin a bang tih phat rual a ni lo. Congress insiam ṭhat tum hian a kî an la sáng lu deuh va, Pu Lalthanhawla chin zawng kha chu thil chhe tak, Pu Lalsawta hunah chuan thil siam ṭhat niin Ṭhat Loh Theih Lohna Bawm an ti a, a chhunga inkhungkhawmte chu a hmaa kum 20 chuang Mizoram kaihruai tawhtu tho kha an ni a, an pianthar thu hriat a la ni bawk si lo va, Pu KS Thanga banna lehkha en khan an la ṭha ziktluak lo tih a lang. Congress hian dam khaw chhuah an tumna lamah MNF an bei duh ta lo va, ZPM hlir an beih hi Chief Minister berin 'Congress chu beih tham an ni lo' a tih nen hian la kawp ila, ZPM hi an beih rawn tih loh rual a ni lo.

Zonet TV Interview ah khan Pu Lalthanzara, Congress Vice President leh Pu Hawla nau Ex Minister ni bawk khan ZPM an beih chhan kha zep nei miah lovin a sawi chhuak. Pu Lalthanzara hi pa ṭha tak niin an sawi a, a thusawi duh dan aṭang khan zep ṭit ṭet lovin a sawi chhuak a, tun hnaiah ZPM an len chak em avangin an bei lo thei lo tih a sawi kha Congress ang chuan a dik. Opposition-in Opposition beih hna an thawk. Congress dam chhuahna ngawr ngawr ngaihtuah chuan ZPM an beih hi a dik a nih leh nih loh ka man ve thiam lo va, Ruling Party an bei duh ta lo hi a mak ve a ni.

ZPM hi a khát tàwkin bang an awm reng a, Mamit Biala ZPM-a din beisei Pu Remruatpuia a ban khan Mamit Bialah Congress hmingin a ding dawn an tih kha thil ni theiah ka ngai lo va, Pu Zamtea, Joseph Construction neitupa hi ka hmelhriat hnai ṭhian ṭha a nih avangin Covid len lai pawh khan Mamit Bial hi cheiin an zin dun fo tih ka hria a, Pu Zamtea aia ZPM lama ticket chang lo zawk Congress-in an hmang dawn a nih chuan Congress hi an lo té ta hle mai tih loh rual a ni lo. Dampa Bialah Vanlalsailova aia an thlan loh tak ZPM aṭanga chhuak Pu Lalhmingthanga pawh Pu John Rotluangliana aiah an dah dawn tiin an sawi a, hei hi chu thil ni theiah ka la ngai lo va, Ex Minister leh Politician Senior aiah ZPM pawhin Sailova aia an duh loh zawk kha Congress tan dintir duh thu a awm lo.

A ZPM lamah lut leh ta ila, ZPM aṭanga chhuak hian an bei let zék zel a, hei hian ZPM chhungkua hian awmkhawm chung pawh hian an boruak a ṭha lo a tih theih. ZPM chhungah hian pawl pawl a la awm a nih chuan a chhuak apiangin an bei let zel dawn a ni. Thlirna pang lehlam aṭangin han thlir dawn ta ila, tu pawh mahni party chhuahsan hnu sawisel chiam hi chu ngaih khata ngaih ve tur chu an ni leh lawi si a ni.

Opinion Poll lamah han lut ta ila, lehkhaa Opinion Poll lakkhawm ang kha chu hman lai thil a ni tawh a, Facebook Opinion Poll pawh hi mahni party lam kan hnatlan chuan kan sang vah thei. Facebook Opinion Poll lam hi chu ZPM hi an ṭha ṭhin a, Fake Account bakah "Hei Opinion Poll a awm a nia, vote ve rawh" tia inkohkhawm theih a ni a, Fake Opinion Poll tiin ka dah. Youtuber rintlak chinin mipui ngaihdan an lakkhawm hi chu Opinion Poll dik tak, party mi va thlan chhuah ni lova mipuiin an Opinion an sawina a ni. Youtuber ṭhenkhat Opinion Poll erawh chu; mipui chuan kan nuih tet tet.

Youtuber-in College lam an hrût chinah ZPM an san fal dan en hian MNF tan chuan ralkhel dar a tling. Ngaihthah chi a ni lo. SASCI leh SEDP in a nghawng ve loh ṭhalai rual hian MNF leh Congress vote an tum lo niin a lang. He Opinion Poll hi chu 'Fake' tia sira hnawl a nih chuan MNF hi an rin loh deuh hian term khat lekah an tla thei. Opinion Poll hi hnial lovin insiam ṭhatna atan MNF hian hmang zawk se, pawisa ni lovin Piantharna nen zawk vote an zawn loh chuan term khat bak an daih dawn lo tih mipui sukthlekah a lang ta a ni. Congress lam hi chu tun ṭumah chuan an la lang phak lo va, MNF an tlak chuan ZPM hi chírí deuh takin an sorkar nge nge ang.

- C Lalthanpuia, TP Villa