Zirna a pawimawh ber

Tunlai chu Social Media lamah sumdawng ṭhenkhat an sumdawnna sawi mawi tum luat avanga lehkha zir a pawimawh ber lo tih mai duhtawk lo va, BA meuh pawh Below Average ti duh Mizo ṭhalai sum atchilh an lo chhuak ta hian ka rilru a tina hle. Hetianga sum atchilhna hi amaha lo chhuak ni lovin, kan ram roreltu aṭanga chhuak a nih rinna ka nei, sum kan atchilh tlang a ni, a pawi khawp mai.

Kan sorkar hruaitu zingah hian zirna ngai pawimawh kawk dawn la kawh tur i hmu mang lo vang, sorkar hruaitute hian PMJVK pawisa pawh Education atan chuan a hmuh ve theih loh an ti. State dang pawhin Education atan PMJVK pawisa an hmang theia Mizoram a nih vanga hmuh ve theih loh hi a dik lo. He thil pawimawh hi kan School Education Minister Pu Lalchhandama Ralte leh Higher Education Minister Pu Dr R Lalthangliana hian an hre lo der nge Chief Minister an ngam lo? Phullem phah tlut tlut zirna in chhe si, zirna quality chhe si, zirtirtu quality pawh below average ang mai, chuti chunga NABARD aṭanga rulh leh tura sikul thawm ṭhatna loan pûk si hi ka man lo. Zirna hi kan dah pawimawh lo, sum kan dah pawimawh tih lanna chu NABARD aṭanga Mizo mipui chan ai aṭanga rulh tur hmanga loan kan puk kan hma dan aṭang hian a lang, firm din chawp te te hmanga NABARD loan hnuaia pawisa khawih vêl hi Education dah hniamna a ni si.

Zirna a pawimawh kan ti kan ti a, kan ṭhalaite chuan zirna aiin sum hmuhna a pawimawh zawk, sum hmuh dawn phawt chuan thil dang chu pawimawh lova a ngaih tawhna khawvelah hian, tu hi nge maw kan kawh dâwn le? Sum atchilh, sum ringawt hmanga public speech nei ṭhin te hi a kui ṭiaktu chu an ni dawn lo vem ni?

- Mahriata, BA