KAN RAM MAMAWH INTODELH!
Danish thufing chuan ‘Pathianin savate a châwm a, mahse an bû-ah a hrái lo’ a ti a. Chumi awmzia chu, ‘Pathianin nungchate hnenah ei tur a pe a, mahse, a zawnkhawm hna chu an thawh ve a ngai’ tihna a ni. Hei hi khawvel kalphung a ni a, kan velah ei leh in tur, hausakna tam tak awm mah se, chumi nei tur chuan hna kan thawh a ngai a, mi taima leh thawkrim apiangin an chang tam mai a ni.
Tunlai India ram politics vir vel han thlir hian BJP leh a sangawi zawnpuite hian Zo hnahthlakte min nek chep an chak hle tih a chiang a. Tuna harsatna kan tawh hi nakina kan la tawh tur ngaihtuah phei chuan a la nep viau mai thei. Chuvangin, eng harsatna pawh tawk ila, kan dinhmun tiziaawm turin ei leh bara kan intodelh phawt mai hi a pawimawh hle.
Kan ram hi kawng tinrengah kan intodelh lo a, chu chuan kan huaisen tur angin min tihuaisen thei lo a, ṭhenawm state nen buaina kan neih apiangin kan thaw dep dep zel chu a nih hi! Ei leh bara kan intodelh chuan thil dang chu zawimuanga ngaihtuah dan a la awm a, ei tur ber kan neih loh erawh chuan harsatna dang su kiang turin chakna kan nei lo ang.
Kan ramah hian thlai chin theihna tur ram âwl a la tam em em a. Khaw hnaivaiah mi hausaten ram patta fer fur tawh mah se, thingtlang khaw hrang hrangah hmun âwl a la tam a. He’ng kan hmun âwlte hi awmze nei leh hlawk zawka kan hman phawt chuan intodelh mai bakah, sum chang thlai hmangin hausakna hial min thlen thei a. Ram changkang zawkah pawh thlai chin hi hausakna atan an hmang nasa hle a ni.
Chuvangin, kan ṭhalai lehkha thiamte pawh hian kuthnathawh ṭhatzia hi hre thar ila. Sorkar hna sang vak lo leh sumdawnna tenau te te buaipui ai chuan a hlawk thei zawk daih tih hriain, kan thiamnate he lamah hian kuai her ila. Lehkha thiam lote pawhin zirlaibu keu hranpa ngai lova zir thiam mai theih a ni tih hriain, phur takin thawk ila. Mi tam takin din chhuahna’na an hman hunah chuan hna zahawm a nihzia kan hre chuak ang a, tuna thawh châkna nei lote pawh hian phur takin an la rawn thawk ve ngei ang.
Chutih hunah zet chuan ei leh barah kan intodelh tawh ang a,ṭhenawm ramte nen innek nikhuaah pawh zam mai lovin, sorkar sum sem tlemte te chu eng ruaiah kan ngai tawh lo ang a, hnam dang mithmuhah pawh kan zahawm sawt ang. Hawh u, kan ram leh hnam din chhuahna’n kuthnathawh uar ila, intodelh turin ṭan i la sauh sauh ang u.
- T. Ruata, Dinthar