Fachuam Ministry

Assembly Session neih zawh takah khan Congress leh ZPM MLA te lam khanin Mizoram sorkara Sports Minister ni mek Pu Robert Romawia Royte chu 'Chief Minister-in a duhsak bik a, CM-in pawisa a pe tam bik a. SEDP pawisa a pum hmawm a, Minister dangte thlen ve phak loh a thleng thei,' tiin an han puh chhe ve nak nak a. A tawpah Pu Robert Romawia chu a ding chang (last laugh) ta zawka ngaih theih turin Fachuam Ministry a nih thu mawi takin a rawn sawi ta a, politics move nalh tak a niin ka hria a ni.

Politics hi chu thil a inhial a inhial ṭhin a, a tawpah chuan sor­karna siam thei apiang hi 'winner' an ni tih hi Indian political scenario kan thlir chuan a dik tlat. Congress lamin Mizoram­ah kan pawm duh loh Chakma vote hmang ṭangkaiin rei tak ro an lo rel tawh a, chumi chu MNF pawh in harh chhuah phahin Chakma zingah 'Mizo' national front an la din ta tak tak mai chu Vibrant Chakma Nation tiamin Chakma ni na na na kha Mizo National Front an nih tir thei tlat a, a tawpah Sap hovin 'last laugh' an tih ang kha an nei ta. MNF chu Mizoramah an sorkar bakah MP inthlanah pawh khan Chakma lam bial pakhata an san fal avangin MP an rawn nei leh ta nalh a ni. 

Kan chhut chian tur chu politics a nih hi chuan thil hi 'dirty' a awm tak tak thei lova, hel pawl tia kan sawi ṭhin lai pawh khan HPC leh HPC (D) kha chu kan political party zawng zawng khan vote duh vangin an lo be ṭha zel mai a. Tunah pawh Paite lamah pawh hei bawk hi hman ṭangkai a ni mek tih chu Sialkal tlang dung lam hian an hre chiang a, inthlan dawna an boruak pawh kha an la hre dawn a ni. Chumi karah chuan MNF bawk an rawn survive leh avangin 'Politics an lo thiam hle mai,' tih hi kan sawi dan chu a ni ta tho a ni.

BJP hian Congress MLA tla thei lo tur Dr BD Chakma chu thiam taka thlem lutin ani hi Chakma nationalist a nih vangin Congress aiin Chakma a dah pawimawh avangin Congress in minister aṭanga an paih hnuah BJP zawmin a MLA zui leh ta tho a ni. Hei pawh hi BJP politics thiam vang a ni leh mai a ni lo vem ni? 

Sports Minister pawhin CM aṭangin sum a lo la tam thei bik a, a lo dil chhuak thiam bik a, Fachuam ang hiala opposition lamin an lo hmu a nih pawhin politics a thiam vang a ni mai lo vem ni? Demna tur a awm lova, Fachuam Ministry tia mawi taka a rawn phuah thiam te kha Fachuam ang hiala an hmuh theih chhan a fin vang a ni zawk lo maw?