INTHLAN RESULT A CHHUAK

Mipuiin Local Council/VC inthlan hmachhawn kan huphurh em em chungin sawrkarin a kaltlangpui lui a, ni khat thil thua hri kai tam ber ni 10/9/2020-a kan  thlen nachhan kha Local Council inthlan buatsaih luih vang kha a ni kan ti lo thei lo ang. Hri kai ni khat thil thuah mi 141 kan awm a, chungho kaihhnawihte chu chhui zui an ni a, kai an awm belh nual a rinawm a, veng ṭhenkhat lockdown a ngaih phah a, mirethei zawkte ei leh bar zawnna a nghawng a, an rum mek a ni. Inthlanna buatsaih a nih chuan inthlan buaipui tura ruatte'n hri hlau chung chung pawhin inthlan an buaipui a ngai a, inthlan leh a kaihhnawih avanga hri kaite hi an  khawngaihthlak tak zet a ni.

Hri do kawnga sawrkar chet dan en hi chuan vantlangah hri a darh chum chum hi pawi a ti lo em ni? tih theih hial a ni, chutianga sawrkar han puh em chu phal lo mah ila, an chet dan en hi chuan an rinhlelhawm a ni. Mithiamte'n December-ah chuan hri kai mi 5000 an kai tur thu an sawi lawk a, December-ah hian vawi leh khatah mi 5000 rual an rawn dam lo thut dawn tihna lam a ni lo a, December-a a vang lai thleng chho tur hi tun aṭang hian a inṭam chho a, inthlan hmangin he mithiamte thil sawi lawk hi kan lo tidik a, December-a phun sawn turin COVID hri kan kûi ṭiak a, kan hardening vel mek a ni ber mai!

Hri len lai phei hi chuan kan ram hruaitute hian lalna leh thuneihna ringawt hi buaipui tawh lo se tiin Zoram mipuite kan rum mek a ni. Hripui len vang laia inthlanna buatsaihte phei kha chu 'Lal chak vang' tih lohah chuan a chhan dang puh tur dang a vang khawp mai.

Mipui fimkhur thiam lote pawisa kan chawitir ṭawk ṭawk laiin a sawrkar ber hi a fimkhur thiam lo leh ṭhinte hian mipuite rilru a tina a. Hri kai enkawl mekte an enkawlna hmun aṭangin a chhuah lui thul, ramriah screening neih a tum tawh loh te pawh kha mipui lam aṭangin nasa taka dodalna awm lo se chuan kaltlangpui a ni ngei ang! Chutih rual chuan hmai tuam lo man tumin kan sawrkar lah a hmanhlel thung a. Social distancing zawm lote manna tur dan kan siam laiin inthlan kan buatsaih mup mup a, mitthi tak ngial pawh kan inlenpui theih loh laia inthlanna chak avanga lo lam leh chaw eikhawm mup mup tawk lah bo lo.

Hri do kawnga sawrkar chet dan hi chu sawisel leh sawi sawp hrim hrim duh tan phei chuan a bua chhuah tham sawi tur a awm ngei ang. Chutih rual chuan, tun hi inbeih hun a ni lo a, amaherawhchu, kan sawrkar hian ram mipuite himna turah chuan mipuite mar dek chungin, opposition te thurawn pawh hi ngaichang ṭhin se, lalna leh thuneihna ringawt ai chuan mipuite himna hi ngai pawimawh rawh se. Sawrkar hi mipuite avanga sawrkar a ni a, sawrkar theia siamtu mipuite himna ngaihtuah hi tuna kan sawrkar ding laiin a tih tur ngei ngei a ni.

Mipuite rilru nat ruala rilru na ve thei sawrkar kan mamawh a, mirethei zawkte sum lakluhna a buai avânga rilru hah ve thei ram hruaitu hi eng tikah Zoram hian a neih ve ang? House rent allowance leh in chei ṭhatna tur allowance  la ṭun ṭun chung chuan in luah man avanga ram mipuite buaina hriatthiam a har mai thei a, medical facillities ṭha chung chuang mahni leh mahni insiamsak hnuah chuan midangte damlo tur uluk taka han ven chu ṭul kan ti vak lo a ni mahna, mahse hei hi dawn teh, Aw sawrkar! I mipuite hi kan thih vek chuan i sawrkarnain awmzia a nei lo ang, mipui tel lo sawrkar a awm ngai si lo! Inthlan result hian sawrkar beng harh rawh se!