SEDP cheng 25000/- aiin Phuihnam kung khat a hlu zawk

Social media lama ka thil chhar hi a nuihzatthlak si, a dik bawk si, Mizoram budget engmah tham lova an chân sin a, vote zawnna tura an thei sem chiam mai hu a ṭha ta ti lo va, he thuziak hian a rawn hrilhfiah chiang ta a ni.

"Phuihnam kung khatah hian tel thumin vawi hnih kar tin hralh tur a awm thei a. Tel khat Rs 30-a chhutin kar khatah 6×30 = Rs 180, thla khatah kar li awm angin chhut ta ila; 180×4 = Rs 720. Kum khatah thlà 12×720 = Rs 8,640 a ni a. MLA term kum 5 chhung chuan 5×8640 = Rs 43, 200 a ni a. MNF-in kum nga chhunga mipui rulh tura leiba hmanga an sem tur SEDP Rs. 25000 aiin phuihnam Kung khat enkawl ṭhat a hlu zawk a ti, ka Pa Khuma'n,".

SEDP hi an sawi dan kha chuan mi rethei khai chhuahna tur a ni. SEDP an sem dan hi chu vote zawnna liau liau a ni. Sorkar pawisa dawngtu tur hi sorkarin a thlang tur a nih laiin; MNF Unit leh Block-in an thlang, dan bawhchhiatna lian tak a ni. Sorkar pawisa hi an MNF pawisa sem hmiah hmiah a, Unit ṭhenkhat chuan 'SEDP dawn in duh chuan MNF-ah member fee in pek a ngai' an ti a, sorkar pawisa dawng tura political party-a inziah luh a ngai a nih chuan; sorkar pawisa ni lovin Party pawisaa mi tur a ni a, an sem hi sorkar pawisa a ni si a, mipui bumna a ni.

Din chhuahna tham pawh ni si lo, mipui hnena pawisa lo thei sem chiam mai hi inthlan dawna an kalpui dan en hian vote zawnna a ni a, SEDP hi vote zawnna atan an hmang. Congress khan Rs 1,00,000 tiamin an tiam zat kha an sem a, an tla tho, MLA 5 chiah an nei. MNF hian Rs 3,00,000 tiamin phuihnam kung khat aia ropui lo; kum nga chhungin Rs 25,000 in an sem a, an tlak kan ring em?

- Lalremruata