Tribal-te an ṭan vang a ni lo, BJP tihmualpho an tum vang a ni : MP Vena
MP Vanlalvena chuan Rahul Gandhi leh Opposition hruaitu dangten Manipur buaina an ngaihven chhan chu tribal-te an ṭan vang leh Manipur an ngaihsak vang ni lovin, BJP, kaihhruai sorkar tihmualpho an tum vang niin a sawi a.
1. Manipur-a thil thleng rapthlakzia chu khawvel history-a thil la thleng ngai lo ang deuhthawa ngaih a ni a. Chutiang thil thleng ngaihventute chu tu pawh ni se, sawisel ngawt chi em ni ang?
2. A hmun ngeia kalin thil awm dan an zir chiang a. Bawhzui zel dan pawh ruahmanna ṭha tak an siam a ni a, eng vanga chutiang titute chu sawisel tlat ta nge a nih? Mawhphurhna neitu, tun thlenga engmah tih la nei mang lo zawk te hi sawisel tur chu an ni lo’m ni?
3. Chutiang thil rapthlak thlentirtu chu hai rual lohvin State sawrkarah leh Central Sawrkarah BJP a ni a, eng vanga thiam chantir tum hram nge a nih?
4. Manipura thil thleng hi a rapthlak em em a. Indopui laia War Crime an tihte ai pawha rapthlak a awm a. Mimal inbeihna mai ni lovin mihring mihrinna (humanity) pawisawina leh pawikhawihna a ni. Chutiang thil thleng duh lova sawiseltute chu tu pawh ni se dem tur an ni lova, thlawp zawk tur an ni.
5. Manipura thil thleng rapthlak tak sawisel lova, ngawihpui zawk tlat ram hruaitu liante hi, a sawisel ngamtute aiin an demawm zawk a ni. Hetiang thil thleng lo duan lawknaah an tel ve ngei nia ngaih loh theih a ni lo va. An ngawihpui zui hian an nihna chu a tilang a ni.
6. Manipura thil thleng ang hi hmun danga an kalpui chuan India ram inpumkhatna tichhe thei tur khawpa hlauhawm a ni a. Hetiang thil thlentirtute chu ram hmelma anga ngaih hial tur an ni ang.
7. Hetiang thu kan MP-in a rawn sawi hi rilru te tak te pu-a, a dik emaw dik lo emaw, an lam ṭang lo apiangte chu sawi chhiat zel maina a ni a. Politics chhangchhe tak a ni ang.
Ani hi, ‘Kan Chief Minister, kum 20 International Politics khel tawh, Chief Minister dangte chu National Politics chauh la khel pha, chuvanga kan Chief Minister-ina a hnuai en vek, annin an chungen vek,’ tih thu lo sawi tawh kha a ni a. ‘We will kill them all’ tih thu te pawh. Tunah pawh hian a sawi awm tawk a rawn sawi leh mai a ni e, kan ti dawn em ni ang?
Chuti a nih chuan kan ram politics hniamzia lanchianna a ni ang a, engtin nge kan kal zel ang le?
- M Lalmanzuala