HNA EXAM HUN INRUAL ṬHIN HI
Mizorama sawrkar hna lak buaipuitu lian ber pahnih Mizoram Public Service Commission (MPSC) leh Mizoram Subordinate Services Selection Board (MSSSB) ten August thlaa hna exam an buatsaih turah a hun a inrual tlat mai. MPSC hian July ni 3, 2023 khan Junior Grade of Mizoram Forest Service Written Examination neih hun tur Notification a tichhuak a, a hun atan 16th to 22nd August ruahman a ni. Optional Paper hrang hrang exam tel a ngaih avangin a hun chhung pawh a rei phah deuh a. MSSSB hian July ni 12, 2023 khan Combined UDC Written Examination (Tentative) neih hun tur Notification tichhuak ve lehin a hun atan 17th August, 2023 (Ningani) ruahman a ni. Hei hian Forest Service Exam hun tur kha a rawn bawh buai ta chiah a ni.
MSSSB hian Forest Service Exam hun nen a inrual tih an hre lawk bik lo niin a lang a, an demawm lutuk lo ve. Chutihrualin, hna la tu Board/Commission lian pahnih awm hi a ṭhatna tam tak kara a ṭhat lohna lo lanna pakhat a ni ve bawk. Mi tam takin Gazetted Officer leh Group B leh C pawh kan exam kawp vek a, sawrkar hna nghet hmuh phawt kan tum vek avang hian a indem ngawt theih bik loh. Group B leh C-a inziak tling, a hnua Officer liana inziak tling zui leh ta pawh an awm fo reng hi.
He exam hun inrual hi kaltlangpui a nih chuan ṭhalai hna zawng tam tak, a bikin Science leh Engineering Graduate ten a eng emaw zawk zawk hi an exam thei dawn lo tihna a ni. Exam/Application Fee an chawi thlawn dawn bakah an hna hmuhna hun ṭha neih a kiam dawn tihna a ni bawk. Forest Service hi post 3 lak tur niin UDC hi post 50 chuang lak tur a ni a, chuvangin, a khawi emaw zawk zawk hi exam dawn lo se a uiawm ve ve hle bawk si a ni. Tin, Board/Commission-te hian kohhran pakhat hnen aṭanga Inrinnia exam buatsaih lo tura ngenna an dawn bawk si avangin an tan hun leh hmun ruahman pawh a harsatzual phah niin a lang.
MSSSB hian UDC exam hun sawn dilna an dawng tawh niin a lang a, Notification chhuah hnuhnung zawk an ni bawk nen ṭhalaite hmakhua ngaiin exam hun hi sawn hram se a duhawm hle mai. Tin, hun lo kal leh turah chuan MPSC leh MSSSB bakah Department tin hian exam hun ruahman chungchangah official-a inrawn a rem loh pawhin a rûk deuhin website kaltlangin inngaichang thiam ṭhin se. An hna thawh chhan leh an service pekte mi thuhmun tho kan ni si a. Tuna exam hun inrual pawh hi a ranglamin ṭhalaite hmakhua ngaiin tidanglam thuai se a lawmawm ngawt ang.
- Lalramnunmawia