Rev. Zairema lehkhabu I NI MIN PEK HI sawi fiahna

Vànglaini, September 10, 2020, phék 9-naah khán ka pa Rev. Zairema lehkhabu 'I Ni Min Pék Hi' phék 337-a Bible hàl thu ziah kha dik táwk lo angin Upa R. Hnehthanga (s/o Pi Thanmawii) khán a rawn chhuah a. 

Upa R. Hnehthanga khán ka pa lehkhabu ziah kha a chhiar chiang tâwk lo a ni. Phék 336 paragraph 1-naah khán Suangpijang, Haflong khaw hnuaia Synod neih thu a ziak a. Chumi kal zélah chuan Pi Thanmawiin a rawn tlawh thu chu phék 337 tlar 1 aṭanga tlar 4-na thlengin a ziak a. Tlar 5-naa Hmàr ṭawnga Bible neih thû leh tlar 6-naa Mizo Bible hàl thû kha Pi Thanmawi sawi a ti miah lo. 

Ka pa khán a hriatrengna aṭanga a ziah a ni. He thu hi Pi Thanmawii thusawi nèn inzawmna a nei lo. A nihna takah chuan "Hmàr ṭawngin Bible an han nei a... " tih aṭang hian paragraph thara dah àwm tak a lo ni a; chhut leh hunah chutiang chuan dah a ni tawh ang.