AMC leh Aizawla lei min

Aizawl khawpui mai ni lova Mizoram tibuaitu chu Azawl chhehvela lei min lian tham tak tak thleng ṭhin hi a ni. Lei min tam tak hi chu laih min a ni. Aizawl Municipal Council hian lei laih phalna a pe chhuaka lei lai tur pawhin pawisa chawi a ngai tawha he mi hnua lei lai min chin hi chu a lai min tute hian an chawi dawn lovem ni?

Keini ang dan lam hre ve tan lo chuan thil sawi huai a harsa em em a. Mahse ka sawi duh chu lei min kan tih hi laih min a ni. Hman deuhva Rangvamual lei min reng pawh kha a hre chiangte chuan laih min an ti. Lei lai lo se min lovang an ti a, ni tam tak Mizoram klhawpuia lirthei vak vel a ti buai a, kha lei min buaipuina sen so kha tunge pe ta le? AMC huam chhung a nih leh nih loh ka hre lova, lo ni ta se AMC chet na tur a ni em?

Vanduai ve hrim hrim hi a awm. Fimkhur loh vanga lei min a awm bawk. Vaivakawn Zohnuai hi a hre chiangte chuan a lei hi a nghet lo, tun hma pawhin a min ṭhin an ti. Laipuitlang lei min rapthlak tak pawh kha tun hmaa lei nghet lo an ti bawk a, a hriate sawi a nia keini chuan kan awih ve mai ang chu. Vaivakawn hi a min hma hian a hnuai lamah lei an lai tih thuthang a awm a, a dik leh dik loh kan hre lova, AMC hian a area chhung a nih chuan zir chiang ve hrim hrim se, Geologist nen in hmun lei laih pawh an buaipui tawh avangin tun aiin vil uluk se a dik a ni.

AMC hian in hmun laih a vil uluka mipui tan harsatna a thlen zawk hial a. Hetiang hnu hian lei hi a la min zela, vanduaina vanga dan theih loh a nih lai hian laih vanga lei min ṭhenkhat lian tham lo te te mahse ṭhenawmte leh a veng mite tana harsatna thlen ṭhinte hi AMC hian pawisa a chawi tir thei em? AMC hian khawpui hi vil uluk zu/al zel thei se a va lawmawm dawn em.

- Lalnuntluanga Ralte