Pu Duhoma hektute kha an in-candidate dawn em?

Kum 2020 khan serchhip Bialtu MLA Pu Lalduhoma chu MLA aṭangin ban a ni. Ban a nih chhan hi a eiruk vang a ni lo va, thil sual lian tham a tih vang a ni lo va, "Independent MLA ni si; a ZPM lutuk," tiin MNF-a MLA 12-te chuan anmahni aia senior zawk an hèk vangin Speaker chuan "thil dik duh vang" tiin Pu Duhoma chu a bàn ta a ni.

Pu Duhoma ban a nih hian mi pangngai tan chuan MLA0ah a tling nawn thei tawh lo tura ngaih a ni. By Election ah Mizoramah Ruling Party ni lo an tling ngai si lo. MNF pawhin an ban chu tifuh inti tak maiin an rawng huai Pu Vanlalzawma an rawn ser a, kum 2018 inthlana tla tawh chu MLA nihtir leh tumin Chief Minister hova campaign beihpui thlakin pu Duhoma ban hlen an tum a, inthlan result a chhuah chiah chuan vote 3000 dawnin Pu Duhoma a chak ta a ni.

Information Department Website kan en let chuan November 27, 2020 khan hei hi a lo awm – "Aizawl, the 27th November 2020 : Vawiin khan Mizoram Legislative Assembly Speaker Pu Lalrinliana Sailo chuan MLA 12-in Pu Lalduhoma MLA a nihna aṭanga ban tura Petition an thehluh chungchang thutlukna a siam chu dar 11:00 khan Assembly House-a a pisaah a puang. Speaker chuan Pu Lalduhoma, 26–Serchhip (ST) Constituency aṭanga Independent MLA-a thlan chu Mizoram Legislative Assembly Member a nihna chu hlihsak (disqualify) a ni ta tiin a puang."

"Speaker hian Pu Lalduhoma MLA aṭanga ban (disqualify) a ni tih a puan hmain hemi chungchanga hma a lak dan te, MLA 12 te Petition a zirchian dan te, Pu Lalduhoma insawifiahnate pawh uluk leh ngunthluk taka ngaihtuah a nih thu Speaker chuan a sawi a. Supporting document zawng zawngte uluk taka zirchian a nih bakah Petition thehluttu MLA (Petitioner) te leh Pu Lalduhoma (Respondent) te a huhova amah hmaa ṭhutkhawmna neiin sawi duh an neih ang angte sawina hun siamsak an nih thute pawh a sawi lang," tih kan hmu a ni.

Pu Duhoma hi hek vanga paih a ni. MLA 12-in an hek a ni. MLA 12 Pu Duhoma hektute hi kum 2023-ah hian MLA nih an la tum ngam em le? Mahni MLA-pui tla hlen tura hek duhtute chu :- Dr Vanlalṭanpuia, Lunglei North; Pu C Lalmuanpuia, Aizawl North 3; Dr F Lalnunmawia, Aizawl South 3; Pu Lalrinsanga Ralte, Serlui; Er H Lalzirliana, Mamit; Pu Zothantluanga, Aizawl West 1; L Thangmawia, Lengteng; Pu H Biakzauva, Lawngtlai East; Pu Lawmawma Tochhawng, Lunglei East; Dr K Pachhunga, Lunglei South; Pu Ramthanmawia, East Tuipui; Dr ZR Thiamsanga, Champhai North te an ni.

Heng mi zahawm tak takte hian an MLA-pui, anni aia Senior zawk Pu Lalduhoma chu ZPM tana a campaign avangin an hek a, ZPM Party thiltiha a tel ṭhin avangin an hek a ni. Pu Duhoma chauh ni lovin MLA dang panga hi Independent tih hming pu, ZPM aṭanga thlan tlin an ni a, ZPM Flag leh ZPM Symbol nena campaign an ni. Pu Duhoma hektute hian eng vangin nge Pu C Lalsawivunga an hek ve loh? Eng vangin nge Dr Vanlalthlana an hek ve si loh?

An hekna aṭanga thlir chuan tunah hian "Independent MLA" Pu C Lalsawivung, Dr Vanlalthlana, Pu Lalchhuanthanga, Pu Vanlalhlana, Pu Zaithanzama te hi hek tur an ni. ZPM chuan heng mi an party Member pawh ni lo 'Independent MLA' hi tunah hian ZPM Candidate turin an puang a, ZPM hmingin Street Campaign an nei a, ZPM hmingin party mi an lawm lut a, ZPm hmingin an zin a, ZPM hmingin khuallianah an ṭang a, eng vangin nge hektu 12-te hian an hek leh si loh?

Heng mi 12 te hi MLA ah an lo in-candidate dawn a nih chuan an MLA-pui hek duhtu an nih kha lo hre nawn ve leh ula, in la thlan duh leh duh loh chu in thutlukna tur a ni.

- K Vanlalchhuana