Rs 73,493 lakhs : Khawiah nge?

Kan Minister pakhatin budget pawn aṭanga a department chan 3 in cheng nuai 73,493 an hmuh thu a sawi kha a pui hem hem hle mai a! Tak tak a nih chuan chu'ng pawisa chu khawia mi nge ni ang a? khawiah nge a awm ang tih hriat a chakawm hle mai. SEDP-ah cheng nuai 3 zel pawhin sem dawn ila, chhungkaw 24,497 lai a daih tlat… Tu nge zawng peih?

Sorkar budget kan tih hi sorkar sum che vel, sorkar sum bawmpuia sum lut leh chhuak chhinchhiahna a ni a. Sorkar sum hmuh – central puihna te, kan thawhchhuah leh kan puk ilo zawng zawng chhinchhiah vekna a nih avangin, Mizoramin sum kan hmuh zawng zawng hi receipt budget-ah chhinchhiah vek a ni a. Budget pawn aṭanga sum hmuh a awm thei lo.

Kum 2018-19 aṭanga 2023-24 chhunga sum hmuh leh hmuh tum ka tarchhuah hi kan en chuan heng department 3 ten kum 5 chhunga an sum hmuh belhkhawm hi cheng nuai 61,557.15 (2018-19 leh 2022-23 inkar) emaw cheng nuai 59,067.31 (2019-20 leh 2023-24 inkar) a ni a. Minister-in budget pawn aṭanga an sum hmuh nia a sawi aiin a tlem zawk.

Sorkar chakna leh sorkara thuneihna hmangin tu pawisa tur emaw, khawi aṭangin emaw, sorkar sum bawmpuia lut si lo hmuh a awm a nih chuan chutiang titu chu man ngei tur a ni a. Mipui bum nan thu dik lo a puang a nih chuan engtia tih tur nge ni ang ka hre lo.

- Vanlalruata