ZU ZUAR SORKAR KAN TIH KHA MIZORAM TANA MALSAWMNA THLENTU A LO NI

Congress ministry liam ta kha nasa taka chirhthehin, Zu zuar sorkar tiin kan han sawisel viau ṭhin tak na a, COVID-19 hripui leng vanga kan han buai tak tak chuan zep rual lohin an hnathawh ṭhatzia a lo lang ve leh tlat mai. 

MNF sorkarin a tih hlamzuih, Ar vulh nana an hman mai mai tawh Falkawn Referral Hospital chu Congress sorkar khan Hospital ṭha takah an dinchhuak a. Falkawn Referral Hospital behchhan hian Medical College an dinfel hman bawk a, medical hmanrua ṭha pui pui a lo bun ṭeuh hman a, Aizawl Civil Hospital aiin Falkawnah bungrua an nei ṭha zawk daih reng a ni. Falkawn Referral Hospital leh Medical College hlutzia chu COVID-19 hripui leng karah hian a takin kan hre ta si a, awm lo ta se, ar vulh nan khan lo hmang tlang ta mai mai se chu COVID-19 vanga kan buaina hi a nasa lehzual hle dawn a lo ni. 

'Cho-ak bak a ṭum lo ang' tia hmusit taka an deusawh chungin Congress sorkar bawkin Lengpui Airport a siam hlawhtling a. Bairabi relkawng pawh rel lian zawk tlan theihna turin a lo tilian hman vek bawk. Airport siam leh Rel kawng tihlen ṭangkaizia chu COVID-19 hripui leng karah hian a takin kan hmu chho leh ta zel a ni. Airport leh Rel kawng hi awm lo se chu kan buai nasa hle ang le.

Congress sorkar liam tain sorkar building ṭha pui pui tam tak a lo sakte chu COVID Care Centre atan te, Quarantine Centre atante ṭangkai taka hman an ni hlawm bawk a. Mizoram hmun hrang hrangah Congress hnathawh ṭhat zar kan zo mek a ni. MNF sorkarin Compensation hmanga a tih hlamzuih tawh Tuirial Hydel Project an tihlawhtlingte hi a ropui tak zet a, Mizoram hian a la chhawr ṭangkai dawn chauh a ni.

Congress hunlai chu ni se, tunah pawh hian RT-PCR hmanga chak zawka sample test theihna tur BSL-3 Laboratory hi 2/3 tal chu kan nei tawh ngei ang. Awm lo ata Medical College pawh din thei leh, Falkawn Referral Hospital pawh tuaithara tihlawhtling theite tan BSL-3 Laboratory din hi thil harsa tak tur niin a lang lo. Tunah lah, COVID-19 vanga thla 6 dawnlai kan buai chhung pawhin COVID-19 test theihna RT-PCR khawl dahna tur BSL-3 Laboratory pakhat pawh kan la sualchhuak thei si lo. Falkawn-a Medical College behchhana mimal, researcher pakhatin BSL-3 Laboratory a din mek hawh chawpin, mi thil phalte pek leh hawh chawp khawl ringin kan la khawsa mai mai chu a ni si a...

Ngun zawka ngaihtuah chuan Congress Ministry liam ta kha Mizoram tan hian a lo thawh hlawk hle a lo ni. Party dangten zu zuar sorkar an tih avanga kan sel luai luai kha a takah chuan Mizoram tana hmasawnna ruhrel leh bungrua, asset hlu ber ber siamtu a lo ni daih zawk nia! Mizoram a kan asset liantham ho hi Congress siam deuh vek a lo ni. Mizoramin COVID-19 kan dona kawnga kan hmanraw ṭangkai ber ber - Falkawn Referral Hospital leh Medical College te, Airport te, Bairabi Rel kawng te leh quarantine centre leh Covid Care Centre zawng zawngte hi Congress sorkar kutchhuak vek an ni tlat nia! Party dangten an chirhtheh nasat em avanga kan sawisel ve ringawt ṭhin, zu zuar sorkar kan tih mai kha a tak takah chuan Mizoram tana 'Josepha Buhzem' siamtu, malsawmna thlentu ber an lo ni e!