MZP ṭang fan fan

Mizo chu Mizo, hnam dang chu hnam dang an ni a, engtikah mah Mizo hi hnam dang kan ni thut dawn lo a, chatuan pawhin hnam dang hi Mizo an rawn ni thut dawn lo, hnam chu thisena inthlahchhawn a nih avangin mahni duh avanga inthlak ngawt theih a ni lo – Saphun chu thuhran daih a ni.

August 21, Thawhṭanni khan Mizo Zirlai Pawl (MZP) General Headquarters, Aizawl Executive Committee Meeting chuan thuchhuah an siam a, chu an thuchhuahah chuan, MZP-in December 19, 2022-a Political Party hrang hrangte hnena hnam dang kawppui neite MLA Candidate-a chhawp chhuak lo tura ngenna a lo siam tawh chu tun thlenga Political Party ten an la zawm tlat avangin lawmawm a ti hle.

MZP chuan hnam dang kawppui neite Candidate an nih hian inchimralna kawngah nasa takin bu a khuar zel dawna a hriat avangin a do tlat tih an sawi. Hnam dang kawppui neite chhawp chhuak; Political Party an awm a nih chuan kan hnam him zel nan heng political party-te hi hnualsuat ngam turin Mizo mipuite a ngen a ni.

Ngun takin MZP thuchhuah hi chhiar nawn ila, tu pawi mah an sawi lo tura ngaih a ni. A chhan chu mimal hamṭhatna tur ni loin, party mal leh veng/khua mal hmingṭhatna tur an ngaihtuah lo a – Mizoram leh hnam a himna tur thil an ngaihtuah vangin huat tur a awm lo.

Kumin tawp lamah inthlanpui kan hmachhawn dawn. Mizoram chhunga party lian zingah ZPM chuan candidate tur an tifel hmasa ber a, candidate an puan dawna sawi hlawh tak pakhat, social media lama mi tam takin an khel luai luai chu candidate atan an telh ta lo – an telh ngei dawn tih chiang lo mah se, mipui lam aṭanga nawrna tak awm lo se an telh mai thei, hei erawh zeldin thu a ni tawh thung.

Tunah chuan Mizo mipuite hian Congress leh MNF party ten candidate an puan hun kan ngaichang ṭhup a, party lian pahnih hi hun rei tak chhung sawrkarna lo chelh tawh leh tawnhriat nei ṭha an ni a, mi leh sa an ngah bakah an thawm a nat ṭhin avangin an candidate an puan tur hian ngaihven a hlawh lo thei lo.

Congress party hruaitu zinga mi, minister hial pawh lo ni tawh Pi Vanlalawmpuii Chawngthu chuan an party-in hnam dang pasal nei an thlawp loh tur thu leh, an party chuan hnam leh sakhua venhim chu an ngaihpawimawh thu a lo sawi tawh a nih kha.

MNF hruaitu lawkte tun hnaia an thusawi kan ngaithla ṭhin a nih chuan, hnam leh sakhua an sawi nasa. Chuvangin kan party lian pahnih te hian ram leh hnam an vei takzet tih a chiang a, a thlamuanthlak hle a ni – an thusawiah an dingnghet em tih chu mipui lamin kan lo thlir reng thung ang.

Mizo hmeichhiaten hnam dang pasal an neih hian an fate chu hnam dang an ni tawh. Mizorama an chen rei vang te, kan ṭhenawm hnai an nih vang te, kan party mi leh sa an nih vang te, pawisa an ngah em avang te, kan ṭhian hnai tak an nih vang ngawtin Mizo an ni thei chuang lo.

Hnam leh sakhua a him hi Mizo kan himna tur hmasa a ni a, chuvangin MZP ngenna hi party tinin ngai pawimawh vek se la. A zawm thei lo party an lo awm palh a nih pawhin MZP hian Mizote tana ding a nih ang ngeiin na takin hma la se, an hnungah Mizo mipui kan ding tlat ang.

Mizo kan tam lo a, chuvangin hnama kan chian hmasak a ngai a, chu chu kan himna tur pawh a ni. Tunah chuan Mizo chu Mizo ti phawt ila, hnam dang pawh hnam dang ti phawt ang u, nakin hun chu nakinah kan la sawiin kan la ngaihtuah tlang leh dawn nia.

- Thanga Mizo Tlangval