Smuggling leh sorkar

Smuggling chung chang sawi hi chuan Assembly House ah smuggling mit kan siai tih kha a lo lang a, tun hnu thlenga Mamit District lam kal tlang tura kuhva smuggling an la kalpui ngam tlat mai hi ngun taka ngaihtuahna sen hnan chi a ni. Eng vangin nge Smuggler hi an huangtau? tih hi kan inzawh chhuah ngam a ngai ta a ni.

Champhai District chhunga smuggling an han kalpui tak tak lai kha chuan; Champhai pa leh pa kha an intin lo chauh a tih kha. Champhai District-ah Khehpuam leh Kuhva kha a kal rual a, Khehpuam kha chu 'Sual' an tia mah se kuhva kha chu 'Thiang' an tih avangin an kalpui a ni. Champhai District chhunga in ṭha leh lian pui pui neitu tam tak hi Kuhva smuggler an ni a, mahse smuggler ti lovin sumdawng hausa tih an ni. Hei tak hi Champhai District chhunga khaw te reuh te te an hausak chhan pawh a ni a, an hausa chak em em a, thingtlang khaw eizawnna sawi tur awm si lo Kuhva vanga truck tam tak tak nei an ni, hei hi smuggling malsawmna a ni Champhai tan.

He Smuggling malsawmna hi Mamit tan ànchhia a ni ve leh daih. Mamit District; a bikin Hachhek tlang dung hi Kuhva chinna hmunpui a ni. Kuhva an ching a, rim takin an thawk ṭhin a, chumi rah chu sengin an lo ṭhangduang a, rim taka an thawh avangin pawisa an lalut a, dan ang takin an che ṭhin. Champhai District kuhva smuggling a lo kal chiah hian Hachhek tlang dung Kuhva hralhna a tibuai a, smuggler vangin kut hnathawktu kan farmer te chuan an tuar ta a ni. Huaisen takin kuhva phurtu motor an man chu an hal hmiah hmiah a, Mizoram sorkar a ngawi dûk.

Eng vangin nge Champhai District panna kawngpui chil chhe khawpa Kuhva smuggling ualau taka a kal theih? Mipuiin an duh lohna an lantir hnu khan Kuhva smuggling venna check gate hranpa ngat siam a nih hnuah eng vangin nge Kuhva Smuggling a la kal theih? Mizoram sorkar hian he zawhna hi chhang rawh se.

- John Lalmalsawma