Congress Candidate set dan leh Zoram Politics

MNF leh Congress hian official in Candidate han puang se, tun kum tawp lama MLA inthlan awm turah hian tute nge seat chang tur, tute nge chang lo tur a hriat tawh dawn a ni. ZPM hovin hma deuhah an puanga an buaina kha a kal liam tawha ngaih theih a ni a, Party pahnih hian buai an la hmabak dawn nge fing takin ro an rel thiam dawn? tih i lo thlir dawn teh ang le.

Congress hi Pu Lal Thanhawla chawlh hnu hian thawm chauh an ni ta. Chakma Autonomous District Council tih loh inthlan dang zawngah chuan Congress hi an che chhe char char a, party insiksawi hi chu tu pawhin an zo lo a ni, Pu KS Thanga chu a chhuak phawta chhuak tur dang an nei dawn em? I lo thlir zel ang.

Pu KS Thanga chhuah hi Congress tan a ṭha hauh lo anga a lo lawitu ZPM tan pawh a ṭha hauh chuang lo thei a, vote a ken luh zat a sawi kha thil awihawm loh tak a ni, Nl Baryl Vanneihsangi tana ṭha tur anga lang si hi a chhiatna inṭanna a ni thei tih hi politics chhiarkawpah chuan a dik, 1+1 hi 2 a ni kher lo.

Congress sawi takah chuan candidate tur list Facebook lama mi kha a dik turah ngaiin ziak ta ila, kha list en khan a hmaa an sawi lawk kha a dik tih a rawn nemnghet, Pu John Rotluangliana a lang lo, Pu Robiaka pawh a lang lo, Pu Mavala pawh a lang lo, Pu Zodintluanga supporter Ex MLA zawng chu an chhawk hmawk. Dr Lalmalsawma chu Aizawl West 2 lama vawi hnih a tlak hnuah a duhna ber bial Aizawl South 2 a la chang thei bik a, amah aia senior Pu John Rotluangliana chuan seat a chang lo. Pi Lalawmpuii chu By Election lama a tlinna Hrangturzo a chhuahsan hnuah Kolasib pèk a ni, Chalfilh bial aṭanga a duh lo chung paih chhuah Dr Ngurdingliana chu a lo tâl nâl tawhna Chalfilh leh Kolasib a chang lo ve ve a, Aizawl West 2 bialah an dah dawn an ti. West II bial huam chhungah seat beisei ve Congress mi leh sa pahnih pathum chu an ngui nghuai ang.

Aizawl East II Bialah MNF Mayor hlui Pu Lalhmingthanga an sawm chhuak hi chu beisei phak bak a ni, mi ṭha leh fel a ni a, Armed Veng South MNF chu an hek deuh ang. Aizawl East II hi Congress lo chak tawhna ṭhin a ni a, tling zo tura beih erawh chu a sak ve ṭalh ang, biak tingaihnawmtu a ni phak ang.

Aizawl East I-ah Pu Lalsanglura an dah tur tih hi chu Congress tan chuan tlawmna a ni, ZPM duh loh seat pek hi Pu John Rotluangliana te tan pema chi phul ang a ni. Politics lama mi lian leh chal lang ni lo, mi hmingṭha leh zuitu leh tunlai ṭawnga fans nei pawh ni si lo Congress hminga dah hi a mak hle. A mak loh dan pakhat chiah a awm thei a, Congress hian East I hi an chân dâwn tho tho tih an hria a, ZPM vote la hek thei bera an ngaih an dah a nih hmel a, Congress leh MNF hi ṭang dun si lo hian ZPM an beih rawn dan hi a chiang chho tawlh tawlh. Tuna Congress Leadership hian tlin an khel tawh lo va, ZPM tlin loh tur an khel a ang khawp mai.

ZPM-in seat an pek loh, candidate atana an duh loh Pu Lalhmingthanga chu Pu John-a bial hauh mek Dampa bialah an dah dawn a, Congress mi nghetsa hnawla ZPM duh loh dah hi Congress tana ṭhahnem ngaihna vang a ni thei lo, ZPM sorkartir loh hrim hrim tumna a ni tawh zawk. Pu Remruatpuia, Tlangnuam Veng hi Mamit Biala ZPM Candidate nih beisei ZPM-in an thlan tak loh a ni, Mamit Bialah Congress-in a ding dawn. Congress aṭanga Mamit Bial Viltu Pu Zamtea Joseph Construction neitu aia sawm luh chawp an dah hi a chhan a awm thei a, Mamit Bialah Pu Remruatpuia hi Congress hmingin tling zo dawn lo tih chiang hle mah se, Aizawl South 2 bial (Tlangnuam) lama Congress candidate-in a hlawkpui beisei avangin Pu Zamtea chu hnawlin ZPM duh loh hi Congress hmingin an dah dawn. He ta Congress game ril tak chu 2023-ah chuan MNF tlin nawntir a, ZPM tlintir loh hrim hrim hi an game a ni tawh a, 2028-ah ZPM aia Congress an len zawk theih an beisei.

Pu Mavala an paih chhan hi ama duhthlan a nih loh chuan thil mak a tling, Pu Hawla monu Pi Rosie-i nau a ni a, Pu Hawla power pawhin a din duh chuan seat chang ve awm tak chu a ni. Pu T Sangkunga, Pu Rohluna, Pu R Vanlalvena an dah lo hi anmahni duhthlan a ni nge an drop vang ni ang le? tih pawh ngaihtuah tham a ni a. Pu Laltlansanga hming pawh a lang lo va, Pu RB Malsawma pawh a lang lo a, Congress ṭhangthar beiseiawm tak takte an lang mang lo va, tuna Congress hruaitute tum hi 2023-ah ZPM tlak theih dan tura Candidate set phawt a, 2028 hi beihpui thlak an tum a nih a rinawm ta rum rum a ni.

Pu Hriata Chhangte hi Social Media lamah a lang tam tih loh chu ram hruaitu ṭha ni tura quality nei ṭha a ni a, MLA Bial 40 awm zingah seat pakhat pawh an pe lo hi thil mak tak a ni nawn a, Pu Hriata quality hi kum 5 hman ṭangkai lova awm tur chuan a uiawm tham, seat chang tur zinga beisei seat hmu lo tur a ni. Pi Zodingpuii, AMC Councillor pawh hi seat chang thei se Congress ah rau rau chuan tun inthlanah chuan vote hmù hnem tur a nih a rinawm a, seat an pe lo.

Congress chhungkaw titi lam chu 2023-ah an tla a nih chuan 2024-ah Congress President thlan a awm dawn a, Congress mi leh sa dik tak President atana thlan tih te an sawi ri tawh a ni.

Congress hi Party lian leh hlun an ni a, kum 20 chuang an sorkar chhungin Mizorama mi hausa tam tak siamtu an ni. Congress zarzoa hausa leh mi langsar hi khaw tinah an awm a, mahni veng leh khuaa mi chhuanawm tak tak nei niin party phûr thar ZPM te ai chuan an la nghet zawk. He party lian tak hi Leadership lah thil fing awm ang taka chhut kual chhut kual avangin an awngrawp tawlh tawlh a, an Candidate list leak out en hian tun hmaa Congress hruaitu ni ṭhuau ang kha an awm lo. Chief Secretary hlui meuh Pu Lalnunmawia Chuaungo an lakluh pawhin boruak a siam phak lo va, Congress hian inennawn hrim hrim chu an mamawh a ni. Pu Vana, LPS te hi mi thiam ni lem lo mah se milar leh thil ṭha tih kawnga mi hmelhriat a nih vangin boruak siam tura ngaih a ni a, boruak an nei thei tlat lo. Congress hi inngaihtuah nawn se, Politics khel tur chuan Politician bawk an ṭha a tih angin; an Veteran Politician hi thukru lovin dintir se, tál tak tak se Congress tan comeback leh theih a ni. Tlin politics khel lova 'ZPM tling tur dan politics' an khelh chuan 2023 ah hian pathumna hniam fal tak an ni ang a, 2028-ah chuan BJP pawh tiat lo Party an nih chuan a mawhphurhna chu tuna Congress Leader rual hian an lak ngam a ngai ang.

- Lalremruata