CM hian Social Media khár suh se
Mizoram Chief Minister hian a Instagram Account hi comment theih lohvin a siam hmak mai. Ram khat Chief Minister hian a mipuite ngaihdan chu a la ngam tur a ni. Vai Politician tak ngial pawhin thil a nihna takin an hmachhawn ngam. Kan Chief Minister hi fak duh pawh ni ila Social Media hmang chuan a fak theih loh. Sawisel duh pawhin sawiselna dawng ngam lovin a account a khar hmiah. Rawtna pawh siam dâwn ila comment section an off tlat, kan Chief Minister hi lo hrilh teh u, Politician dangin heti hian an ti ngai lo.
Kum 2023 hian MLA kan thlang dâwn a, ṭhalaite hian Social Media hmanga biak phak Chief Minister kan duh ve tawh. Chief Minister ni ve si mipui rawtna, mipui ngaihdan hre ngam kan duh ve tawh.Kan Chief Minister hi chuan mipui min face duh tlat lo. Ama tih a nih loh phei chuan a Social Media enkawltute hian Chief Minister hi a tlàk chuan mawh an phur ngei hei tur a ni.
Politician chu mipui ban phakah an awm tur a ni. Politician ni si mipui ban phak loh hi kan duh lo. Mipui hnenah a duh duh a sawi thei a, mipuiin kan sawi duh neih ve te sawina tur kan nei lo hrim hrim, mipui sawi ve na tur comment a off. Mipui ban phak lovah a indah chuan mipui hian an vote châk lo. A bîk tak hian ṭhalaite chuan tun ang khawvelah chuan engkim hi transparent kan duh. Kan Chief Minister hian ṭhalaite ṭawngkam hi engah mah min ngai lovin Comment section hi an off reng chuan kum tawp inthlan hunah amah leh a party, MNF lakah hian vote kan la off ang. Social Media hi khawvel thar a ni tawh, chu khawvel tharah chuan mipui min ngainep lutuk a, a duh duh min sawi khum a, a chet ṭhatna a rawn tar zar zar. Mipuiin 'A ṭha hle mai' kan ti ve duh a, thil ṭhenkhatah chuan 'Hei chu a ṭha kan ti lo Pu Chief Minister' kan ti ve duh bawk. Kan voice hi min ngaihthlaksak duh lo a nih chuan kum tawp inthlan hunah kan nihna kan lantir ve ang.
Chief Minister Social Media enkawl tute hian lo hre ve se, Chief Minister hi a tlak palh chuan a mawhphurhna an lak ngam a ngai ang, a party MNF ang pawhin CM account an off hi chu an inchhir hun a la thleng ang. Thil ho te emaw in tih hi ṭhalaite hian ho kan ti lo, Social Media hi ka khawvel thar a ni a, a taka Chief Minister hmu ve phak lo tan chuan rawtna kan thlen ve theih hun, kan duh kan sawi ve hrim hrim theih hun a ni tih min hriat sak ve se, Mizo ṭhalai inkawmna ber Instagram-ah hian Chief Minister Pu Zoramthanga account hi comment theiha an dah loh chuan inthlan awm turah ṭhalaite hian kan off ve chuan a pawi thui thei zawk a ni.
- Albert L Chhangte, Chanmari West