MIZO SOCIAL ACTIVIST
Social activist tih ṭawngkam hi tunlai hunah Mizo ṭawng ang maia kan hman nasat a nih tawh avangin a awmzia hi chhiartute tan hrilhfiah hranpa a ṭul loin ka ring a. Hriatthiam awlsam thei ang bera hrilhfiah dawn chuan khawtlang nunah a ṭha zawnga thil thlentir tura beitu, chumi kawngah harsatna a lo awm a nih pawha huai taka su mai ṭhinte hi social activist tia kan hriatte chu an ni.
Tun hma aṭangin Mizo zingah social activist tia koh theih kan nei ve ta nual a, thil lawmawm tak a ni. Hnam ṭhang mek kan nih avangin Mizo hnam hian thil tam tak a pal chho a, pal tlûk leh pal buakte pawh a awm ṭhin a. Chutiang karah chuan social activist te tihtur leh ṭangkaina tam tak a lo piang zel a, rintlak leh rinawm taka thil ti ṭhin an nih chuan ram leh khawtlangah danglamna ṭha zawk siamtu an ni thei a ni.
Khawvel zau zawk thlir ila, India ram chauhte pawh hi han thlir ila, social activist ropui tak tak sawi tur an tam a, an chanchin hi lehkhabuah te, TV ah te, internet ah te, zirlaibuahte hmuh tur leh chhiar tur ngaihnawm leh hmuhnawm tak tak a tam em em a, an chhuanawmin an ngaihsanawm a, an chetna mual ṭheuha khawvel siam ṭhatute an ni.
Heng social activist te hian thil (issue) buaipui bik an nei deuh zel a, chumi kawngah chuan an búr ngar ngar mai ṭhin a, an chhehvelah thil tam tak lo tlan sup sup mah se, an seh tawh chu an seh ngar mai a, thil dang thil dang pet lawrin an inham buai lo. Thiam bikna leh buaipui bik (specialize area) an nei a, chumi kawngah chuan rintlak leh rawntlak (expert) an ni. An thil buaipui chu mi dangten an ngaihven miah loh lai pawhin tha thlah hauh loin an birh ngat ngat a, issue lian pui a nih leh nih lohah an buai lo a, lar khelh nan maia ti ve satliah an nih loh avangin mi dangin an tuipui leh tuipui lohah an buai hek lo.
A then chu hnam hnufual awpbehna (tribal/dalit issue) chungchang beitu an ni a, a ṭhente chuan kum tling lo naupang hnathawka chhawr luih (child labour) an buaipui a, a ṭhen chuan zirna (education) lam te, a ṭhenin mihring hralh ruk (human trafficking) lam te, a ṭhenin min hualveltu thing leh mau leh nungchate vawnhim (environmental issue) lam te, a ṭhenin loneitute hamṭhatna (farmer issue) an buaipui a, a ṭhenin hmeichhiate awpbehna doin an hamṭhatna tur (women issue) an um zui a, a ṭhen chu tuai leh patil (LGBT) te tan an ding a, a ṭhenin ram chhuhsak (displaced people) te an buaipui a, a ṭhenin acid hmanga inbeihna (acid attack) an do a, sawi sen a ni lo.
Social activist zingah child labour sawi apianga rilrua lo lang vat ṭhin an awm a, human trafficking sawi apianga rilru a lo lang ṭhin te, farmer issue sawi changa rilrua lo lang nghal ṭhinte an awm a, chutiang zelin. An tihna lamah taima tak leh ṭhahnemngai takin an kal ngar ngar a, fak tlak khawpin an bei a, mi ngaihah pawh an tihna lamah kher chuan expert an tling a ni.
Mizo zinga kan social activist tia koh theih ṭhenkhatte hi chu chutiang chu an ni miah lo, an pet lawr kual kawi nasa khawp mai! Kan ṭhiannu pakhat phei chuan fiamthu deuhin, “Larna tur a nih dawn phawt chuan issue lian apiang hi themtleng té zawk an sawi ang maiin an lo um ve vat emaw tih mai tur an ni,” a ti. Buaipui bik pawh an nei lo a, birh ngar ngarna bik leh expert-na bik pawh an nei chuang lo a, rampum anga thawm nei thar apiang hi an lo vei nghal em em thei zel mai a ni!
A ṭhente phei hi chu an fawr angreng a, eng thawm (issue) pawh lo ri se; anmahni hi vei ber, mi dangte ai daiha vei em em, mi dangte chu vei ve miah lo, ngaihven ve reng reng lo angin an inlantir hreh lo a, ṭhahnemngai ber anga inlantir an tum luatah an ṭawngkam bungrua pawh a tuihnai vak lo fo a ni.
Sapin ‘Jack of all trades, master of none’ an tih ang deuh, issue lian tham deuh chu vei nghal em em thei zel, mahse, a chhungril chungchang engmah hriat (expertise) nei tak tak lo, ràwn tlak pawh ni chuang lo, bel ruak ri an sawi ang maia thawm na tak, issue a len lai chuan arbawm hal ang hlauh, issue a reh ruala reh zui leh ta mai te pawh an awm niin miin an sawi a, mipuiin chutiang deuha hmuhte pawh chu kan nei a ni awm e. An issue buaipui chu an hre thûk lo a, hriat thûk pawh an peih chuang lo a, tute emaw sawi danah phei chuan an thusawi leh an thuziakte hi miin an ziahsakte a ni; zuk ti a!
Lar hrim hrim lungkham luat avangin hetiang hian a chet buan buan theih a, mi hriat hlawh nih chakna boruak hi a lian ve thei hle. An thil buaipui (issue) aia a buaipuitu zawk lansarh tum tlatte pawh thil awm thei a ni a, tunlaiah hetiang hi a nasa zual an ti. Tin, rampum huap issue lian deuhte hi fing verther taka sum leh pai siam tumna hmanruaah hman theih a ni bawk, hei hi a hranpaa sawi zui chiam tham a awm.
Kan Mizo social activist zawng zawngte hi chutiang chu an ni vek lo a, rintlak leh innghah ngamna, sum leh paia rinawm si, mualpho hlau em em, thuhnu dawn lo leka thil bawh buan buan lo, fim raih a thil ti chi eng emaw zat an awm a. Ri hluai reng lo, mahse an tih chinah heng mite hian danglamna an thlen zel a, a hnam ang pawhin thla an timuang viau a ni.
- Dr. Lal Nunsiama Sailo