Sawrkar hna thawk kum Ziah naupan leh kum 62
Mizote hi hnam la upa lo tak leh sikul naupangte pawh hmathlir chungchanga la kaihhruai ngai tak kan ni, a bik takin, a mi nawlpuiin mobile/internet kan neih hma leh, kum 30 hma lamah khan. Hei vang hian 1990 hma lamte kha chuan HSLC exam form dah khah dawn khan a tlangpuiin kum ziah dan thuah zirtirtuten hmangaih takin an naupangte an kaihruai ṭhin a. Mahni hmathlir (career) ruahman lawk thiam chu tlem té an nih avangin leh; hna zawn chhung a rei ṭhin avangin zirtirtute chuan hmangaih takin an naupangte chu inziak naupang turin thu rawn an pe ta ṭhin a; hei hi naupangte kaihhruaina a nih avangin zirtirtute kha an fakawm a; kawng danga sawi chuan, an kum an ziah naupansak ti ila a dik zawk awm e; sawisel chiam chiam chi a ni lo va, kan sawisel leh ṭhin hi a mawi chiah lo a ni. 1990 hnu vel aṭang erawh kha chuan pian veleha pian ni, thla leh kum chhinchhiah a nih avangin khatiang kha a tih theih tawh loh a, an lo ziah naupantir (-sak)te pawh kha Sawrkar hnathawk an nih chuan 2025/26 velah chuan an chawl zo vek tawhin a rinawm.
FMGE&W: Tunlai hian FMGE&W chuan khawvel ram dang ṭhahnem taka an tih ang leh India rama post ṭhenkhat luahtute angin, naupangten an nu leh pate thil an dil angin, Sawrkar hnathawkte chawlh (pension) kum, kum 62-a tih san turin State Sawrkar an ngen mek a. Hei hi a titheitu chu Thu neitute an ni a, keini lo sawi ve chi emaw sawi theih emaw a ni lo va. A engti zawng pawhin thu tih tluk pawh lo ni se, nu leh paten ṭha tura an ngaih chu pawm thiamin sawrkar hnathawkte chu lungawi taka awm mai tur an ni.
Thil pakhat erawh chu - Federation meuhin a titlu tawh a nih chuan tho thil ang ṭhapa awm mai tur an ni a. Vanglainiin mi tlem azawng an kawm khan anmahni awmna ngei Federation thu kalhin an sawi a, kha erawh kha chu Federation member tan chuan a zahthlak ngawt mai; an duh lo takzet a nih chuan hetiang thu rel a nih lai khan sawi mai tur hi a ni a. Sawrkar hnathawk ṭhenkhatte hi chuan pension kum tih san hi an duh lo ni lovin, an pu hrawn mekte kum 2-a an retire tlai tur hi an lo helh zawk niin sawi a awm ve bawk. Titi pakhatah chuan, College zirtirtute pension kum pawh hi 62 aṭanga 65 rawt a nih lai khan tu emaw pension har phah tur kha ṭhenkhatin an lo buan lawk a, "Ani hi a chhuah (pension)hunah 65 chu kan nawr dawn nia," tiin an rawt a ni awm e. A pu chu a lo pension hnuah Sawrkar an han ngen leh a, a hma angin thil a lo awlsam tawh si lo ni tur a ni.
Driver leh Group D-te pawh hi, a bikin matric hnuai lamte hi, thil hre zawkte thurawn anga inziak naupang hi an ni nawk ang, sawisel lova an service a rei thei zawk tur chu lawmpui hle zawk tur a ni. Mizo hnam thil (issue)-ah leh thil dang engah pawh rorel thutluknaah rinawm ila; khunkhan taka chhut lawk lo va, a pawnga puia insawisel mai lovin Christian kan nih vek avangin Krista zuitu tih dan tur a nih leh nih loh hi insel hmain ngaihtuah hmasa ṭhin ila, Kristian nun dan mawi zawk a ni ang a, Mizo hnam din chhuah nana thil pawimawh tak a ni bawk awm e.
- Dr J.T.Vanlalngheta, Vice Chiarman,
Govt MZ Law College Alumni Association.