Congress CM candidate Pu Sawta
Mizoramin MLA inthlanpui kan hnaih tial tial a, party lian pathum aṭanga candidate tur àwmte leh an dinna bial turte a hriat ruak tawh a; ṭhenkhat erawh a la chiang lo thung. Dinna tur bial la chiang lo zingah hian Congress party chief ministerial candidate leh party president ni bawk Pu Lalsawta pawh a tel. Chutihrualin, Aizawl South-I bialah a ding dawn chiang tawha sawite pawh a awm bawk.
MNF president leh an CM candidate (ni tura ngaih) Pu Zoramthanga chu a dinna tur a chiang a, a bial ngai Aizawl East-I a ni. East-I biala ding chungin bial dang, tuna MLA an neih lohna bialah a ding tel mai thei bawk. ZPM party chuan Tuichawng bial tih lohah chuan an candidate turte an puang chiang tawh a, an CM candidate Pu Lalduhoma pawh a bial ngai, Serchhipa ding tur a ni.
An khingpui party pahnihte CM candidate-te dinna tur a chianna a rei tawh laiin, Congress CM candidate Pu Sawta dinna tur erawh a chiang hlei thei tlat lo a, a chhan ni bera lang chu–a tlin theihna tur bial a vân vang niin a lang. Tun hnai tê aṭangin Aizawl South-I bial chhungah hian a bengvar thar riau mai a, thil eng eng emawah a kal ṭhina sawi a ni. Hei vang hian he bialah hian a ding ngei dawn niin a ngaih theih.
Sawi tawh angin, Pu Lalsawta dinna tur bial a chian har viau chhan hi chu a tlin theihna tur bial a vân em vang a ni pakhatin a lang. Khawi bialah hian nge a tlin ang, tiin inzawt ta ila, chhan dik harsa tak tur a ni reng a. South-I bialah ngei pawh hian mi tam zawk chuan a tlin zawh ring lo niin a lang. Tling lo ta se, a political career hi a tawp zui ve mai ang em?
Pu Lalsawta hi mi ṭha, mi dik a nih thu an sawi ṭhin a, Congress party mite pawhin chhuanna lai leh an sawi tam ber pakhat a ni. A dik pawhin a rinawm. Minister a nih laiin Finance department a enkawl laiin hna ṭha takin a thawk a, a fakawm hle. Department dang a enkawl chungchangah erawh mi dang aia han fak hluaina tur sawi mai theih a tam lo. A chungah thuneitu tak tak zawk leh party an awm miau avangin, dik taka thil tih a duh ang takin a ti thei bik lote pawh a ni ang.
Engpawhnise, Pu Sawta hi mi ṭha a ni a, thil reng reng dik taka tih duh mi a ni a, party lian pakhat president a ni bawk nen, tun ṭum kan inthlanah turah hian tling ngei se ka duhsak hle. Party lian pathuma an hotu lu berte hi chu Assembly House-ah ṭhu vek thei se tih hi ka duh dan a ni. Mahse, chutiang chu a thlen rin a harsa rih bawk si!
- Zoramchhana