Zofate tawrhna thlentu ABCI Infrastructures P.Ltd. REL LEI CHIMA THI TE AN LAINATAWM HLE

Sairang Kurung Lui chunga ABCI Infrastructure Pvt Ltd te lei dawh mek chima nunna chan zingah West Bengal, Malda District (Disha Community) mi 18 lai an tel avangin, an Community hruaitu (Ministry of Rural Developement) Pu Ziarul Haque chu Inrinni kalta (26 August 23) khan Mizoram lo kalin, chetsualna hmun a tlawh nghal.

Pu Ziarul Haque chuan, He Lei chima nunna chante ruang lainatawm takte hmuh kim a nih hnua; Thlawhna hmanga thawn pawh hlawh zo lo va, by road-a kalpui a ni leh, Dt 27 /8/23 (Sunday) a West Bengal thlenpui chauh an nih thu ah, nunna nei tawh lo mah ni se lainatawm a tih thu a sawi. He chhiat tawh thu hian Disha Community te a ṭhawng hle a, chetsualna hmun pawh rang takin an rawn tlawh nghal niin thu dawn a ni.

BJP Mizoram Pradesh pawhin thuchhuah siamin, damdawi Ina hliam 2 awm mekte an tlawh bakah, Pu Ziarul Haque in ABCI Infrastucture Office ISPAT @ Lengte a tlawhnaah an ṭawiawm tih an sawi a. A ṭul ang zela hmalakpui an inhuam thuin an thlamuan bawk.

THU BELH

ABCI Infrastucture Pvt Limited neitu hi Hemant Baid niin, an unauho hi BAID BROTHERS tia hriat an ni. Kum 1990 hmalam mah aṭang khan Baid Brothers te hian Mizoramah hna lian pui pui an lo thawk tawh ṭhin a, anmahni duhsaktu leh khawi ngamtu chu Congress Sawrkar a ni. An zinga Jodhraj Baid phei chu Pu Hawla hnena thamna pawisa tam tak petuah puh niin; Supreme Court-a PIL thehluhah khan a hming a lang a, mahse he Case ah hian Pu Hawla khan, chengkhat mah ka eiru lo tiin thiam a chang a ni awm e. Jodhraj Baid pawh tun thlengin a zalen phah ta a ni.

ABCI tih ringawt hi tun hma lama kan hriat dan ṭhin a ni a. Kha'ng hunlai pawh khan hna lian tak tak an thawk reng a, an hmingpum nia lang chu Anupam Bricks & Concrete Industry tih a ni. Tunah hian Infrastructure Pvt Ltd tih an belh ta a nih hmel.

Anni company hi tunhma aṭangin hna thawk chhia leh muang tih an ni reng a. Mahse Congress sawrkar hnuaiah thil tihsual an nei hlei thei lo. Revise Estimate tichhuaktu leh ngiat thiam tak an ni bawk. An hnathawh zawng zawng deuhthaw hi a hunah an zo ngai meuh lo tih a ni.

Congress sawrkar lai (July 2012) khan Lengte ramah ISPAT (Investment Support and Promotion Agency of Turkey) tih hmingpuin ROD SIAMNA industry din a ni a, he Industry neitu hi tu nge tih mipui tam berin kan hriat ngai loh rualin, tun ṭum chhiat tawh vanga Mizoram rawn tlawhtu Disha Community hotupa Pu Ziarul Haque zarah kan lo hre ve ta hlauh hi lawmawm tak a ni.

He ISPAT Industry hi Congress sawrkar khan Land Lease kum 99 chhung atan an pe a, khatih lai Opposition Party MNF khan an helh hle a nih kha. Assembly House-ah nasa taka chai a nih hnuin, a kum zat thuah sawrkar lam khan kum 25 chhung ni turin siam ṭhat (ennawn) an tiam a, boruak lumzual a reh thei hram. Mahse, an lo siam danglam (ennawn) awzawng lo a ni ang chu, hmanni State Ligislative Assembly (Monsoon Session)-a Pu Lalduhoma'n he ISPAT tan hian Mizoram Sawrkar chu Quarantor ah a ṭang a ni, tih a sawifiahnaah khan (an siam ṭha lo tih) a chiang hle.

He ABCI Infrastructure hi black list tura ngaih an nih hnu pawhin kaw thar hreuhin hna dang an hmu chho zel a, ISPAT Lengte khu an Main Office lo ni reng chuan! ISPAT neitu Hemant Baid bakah hian a unaute, Pawan Baid, Buth Mal Baid leh Jodhraj Baid te hian ABCI hming hian Mizoramah hna hrang hrang an nghei miah lo tih theih a ni. An hnathawh apianga Revise Estimate beisei ziah tih theih he Company hi Mizoram hian a mikhual rei ta mah mah niin a lang.

An sulhnu pawr (Lui lung/Balu) an lakna khuar an hnawh leh loh avangin Hnahthial nulain a boral phah a, Court Case an nei mek. Kum 2022 November ni 15 khan an Quarry chimah mi 8-in nunna an chan tawh bawk. Heng bakah hian an hnathawh sawisel hlawh leh Lei dawh chim eng emaw zat an nei tawh bawk. Tun ṭum Lei chima nunna tam tak chan a nih piah lamah hian, thil pawi tak chu Rel Kawng hawn hun tur nasa taka tihkhawtlaina a hringchhuak leh ngei dawn a. He thil khawtlai hian Revise Estimate tho a hringchhuak leh ngei bawkin a rinawm.

Heng zawng zawng ngaihtuah leh vanduaina thleng zozaiah hian he Company hi Mizote tawrhna nasa tak thlentu an ni chiang. Anni hian tuar ve tho angin lang bawk mah se, Sum lama ṭan lak an thiam tlat avang hian Mizote hlohna hi a nasa fe zawk ang tih a rinawm.

- Vanlalhuma Kawlni, Ramhlun South.