MIMALA COVID-19 SWAB SAMPLE TEST CHUNGCHANG

Hmanniah Covid-19 a contact tracing kal zelah positive ve mai thei dinhmuna ka din vangin ngaih a ṭha zan lova. Veng chhung LLTF chuan kan veng (Mission Veng)ah chhui tur an ngah bawk si a, swab sample test a ngai tam dawn nen, khawtlang hotute thuhla nghah ngawt ngawt ai chuan nih tur ang ang tihchian vat kha ṭha in kan hria a. Ka ṭhianpa te unau nen sum sen huamin ZMC ah kan va tlan phei a. A hnuah midang pawhin a tihdan phung hi min rawn zawh ve nual tak avangin nakin zel pawha la chhawr ṭangkai an awm theih nan tihian midang chhiar theihin ka rawn chhawpchhuak a ni. 

Mimal ṭhahnemngaihna mai a ni a, Health Department emaw ZMC lam emaw thu hmu a ziak ka ni lova, test kalphung leh a man te pawh hi dinhmuna zirin a danglam thei a ni. 

ZMC ah RT-PCR Zoram Medical College, Falkawna kan va thlen chuan gate pui veilamah swab sample test na  kan zawt a, awlsam takin a chhung casualty lamah min tlan chhoh tir a, kan lirthei ken te pawh kan luhpui thei a. Motor park zawhah test-na hmun chu security duty dang kan zawt a, min lo kawhhmuh zel a. Swab sample test-na hmun bulah form fill up tur a lo awm a, pen kan ken hmang chuan kan fill up a. (Pen hi a hmunah an chhawp tho) Form fill up chu banga doctor phone number an tarah chuan whatsapp hmangin a thla la in kan thawn a, tichuan a fee Rs. 4500/- chu bawmah kan thlak a, registration leh fee receipt an ziahfel chhung minute hnih pawh tling lo kan nghak a, sample chu min laksak nghal a. Midang an awm ve lo bawk a, a awlsam khawp mai. Sample an lak zawh veleh kan haw leh nghal a, a tuk chawhnu lamah sms in kan result chu a negative thu min rawn hrilh a. Sample result hi a hard copy-in an siam bawk a, chu chu sample lak ni tuk chawhnu dar 1 bawr velah sample an lakna hmunah chuan a lam theih nghal bawk a. Thawktute an hawihhawm em em a, han chiaina tur a awm eih lo a ni ber mai. Kalna turte pawh han zawt ila min kawhhmuh thlap zel a, bona tur a awm lem lo. Swab sample lak hi chhun dar 12 hma in a tih theih a, chawhnu lamah chuan an la tawh lo ni awm tak a ni. Test tur chuan office timing 1st hour a thleng hman tura kal hma a finthlak mah mah ang. 

Kan dinhmun hi a chiang lo chho zel dawn a nih hmel ta. Hripui hi tun aia a darh nasat chuan contact tracing ringawt pawh a har tulh tulh dawn si a. Mahni in rinhlelh deuh emaw lo positive te nen kan lo hnimhnai palh a ni tih hriat leh hnuhnawh chuan a nawlpuia swab sample test nghah ai chuan mimala va tih mai hi a awlsam. Senso erawh chu inhuam a ngai na in positive thei dinhmuna awm chuan kan chhungte, kan chenpuite ngei kai ve thei dinhmunah an din phah a, kan ṭhiante leh kan thawhpuite pawh kan kai darh thei zel bawk nen. Midang kai darh thei kan nih bakah rilru nuam lo deuhvin keimahni vangin an lo awm reng phah thei a ni. Chung zawng zawng ngaihtuah chuan swab sample test tir nana Rs. 4500/- chawi mai kha a la zia zawk fe in a hriat. Kan lo positive a nih pawhin midang kan kai chhawn loh nan hma a lak vat theih zawk a, kan lo negative a nih phei chuan a lawmawm hlei hlei. Chhung tin sum dinhmun erawh a sawi theih vek chuang lo na in private a kan va test tir khan sorkar pawh a senso lamah tlemin kan pui ve leh bawk a, a ṭha vel vek mai niin a lang.

Hriat tur erawh chu kan va in test tir a nih pawhin kan dinhmun a in ang vek dawn lova, ṭhenkhat chu symptomaticasymptomatic te kan ni thei a, a ṭhen phei chu phai lama lehkha zir hnathawh chhunzawm zinna atana certificate mamawh vanga va in test tir kan ni thei. Heng zawng zawngah hian kalkawng velah tumah hi kal lam leh haw lamah peng kawi lovin in aṭangin damdawiin pan ding nghal ila. Falkawn hi kal tluan chuan Aizawl aṭangin minute 25 bawr vel lekin a thlen theih a, rilṭamna hman vak a awm lova, thingpui kan in duh a nih pawhin aṭanga pai law law kha a fuh zawk ang. 

Quarantine laia kan in test tir duh a nih chuan LLTF hnenah hriattir ngei ngei tur a ni. Result a lo negative a, kan thaw a veng hawk a nih pawhin primary/ secondary contact kan neih aṭanga chhiarin ni 14 tal chu inah la in khung tho tur a ni. Hei hi Standard Operating Procedure (SOP) in a ken tel a nih vangin zawm tur a ni. 

Pathian zarah kei pawh ka hriselna a ṭha viau a, result duhawm nei mah ila negative hnuah pawh inah ka la inkhung char char a, positive nen kan in contact ni aṭanga chhiara ni 14 a ral hnu-ah chauh ka chhuak thei dawn a. Negative result ka neih hnuah pawh kar khat chuang inah ka tawm a la ngai tho tho a ni. 

District dangah mimal anga test duh tan chuan Chief Medical Officer (CMO) leh LLTF hruaitute biak hmasak phawt a fuh berin a rinawm bawk.