MLA Nih Tum Ngawr Ngawr?
Aizawl khawpui ṭhalai bik hi chuan, kan thupui ang mihring khi kan thliar thiamzia i hriat duh chuan Two wheeler taxi driver, ṭhalai infiammi, zirlai leh hnathawh avanga mipui hma leh Youtuber ṭhenkhat bula ngaihdan sawi ngai lo tur chin hi titipui la, an ngaihdan zawt zeuh la – anni ho chuan MLA nih tum satliah ve tawp te hming an hrilh nalh nalh thei ang che. Hetiang hi kan khawpui ber ṭhalaite rilru a nih avangin, kumin inthlanpui chu eng emaw ti tak hian ngaih a ṭha a, thuneihna ûm satliahte hi a rampum huapin kan hnawl hunpui kan thleng dawn a ang ta riau mai!
Inthlanpui apianga kan hmuh ṭhin, Snollygoster (a person you can't trust) an tih mai, mihring rin ngam loh; a bikin politician zingah hian hei, an rawn ther leh ta fur e. An awmna political party-in an policy leh principle pawh an thlak lem loh, thuneihna leh sum ìt avanga mahni ṭanhmun thlak thut thung – MLA a engti zawng pawha nih tum ngawr ngawr ang chi ho 'transfer' boruak hi tute mah hian kan thlir liam satliah ta lo tawp mai – tarlan tàk angin khawpui ṭhalai politics lam hnungchhawn deuh ngut ṭhinho rual, eng political party maha hming pe ngai loten ram hruaitu tur hi kum 5 zet a nih avang leh, chumi nghawng thui tak chu chipin kan chìk ta ṭhup e.
Mahni bialtu MLA bathlara mimal hamṭhatna uchuak taka thlen tum a, inlan ngai lo tur hi khawpui ṭhalai kan va tam em! "Mipuite hi hruai ngai lo se, hruaitu an awm a ṭul nang," titu Pu RK. Lianzuala thu vuakthlak kha darthlalangah hmangin – party bil, duhsak zawng leh a pumpui tlang chhah laite chu fatu chanpual anga ngaihna hi kalphung hlui a ni tawh; hruaitu ṭha chuan ram leh hnam a huap ang chu maw le! MLA nih ngawr ngawr 'tactic' nena mipui hmaa rawn inzuarte hi khawpui mai ni lovin, constituency tinah lo vil uluk ang u hmiang.
Hei ṭhalai leh a ngaihna hria, politics huangah ring rawlh lo mah se, a hnam ang pawha kan chhuan tak takte hian ram hmangaihna avangin ke an rawn pen chhuah mek hi – chawikangtu nge mi ṭha awp hlum thei zawk Chief Minister tur ni ang tih tinzawn chungin VOTE thlak ang u.
- Ṭpa Bunghai