PEACE BONUS-AH HEI HI KA HRIA

Kum 1997 Cong­ress term tawp dawn lamah sorkar sum dinhmun a tlakchhiat em avang khan an Finance Minister Pu J.Lalsangzuala pawhin, ka nghawng­ah Damocle-a ngun­hnam­in a tin reng a ni, a lo ti hial a. Chu sum dinhmun harsa chu MNF sorkar thar chuan an han rochung ta a. Sorkar leiba a nasat em avangin an buai ta takzet a. 

Sorkar laipuia ṭanpuina pawisa dilna atan chutih laia Chief Minister Pu Zoramthanga chuan, Peace Bonus tih hming phuah chawpin, Mizoram ram buai ber pakhat chu remna siama ram ralmuang ber a lo nih entawn tura hmang ṭangkaiin, dilna an siam ta a. Nasa taka an ngen hnuah sorkar laipui pawh chuan dik leh ṭha tiin cheng vaibelchhe 182.45 an lo pe a. 

Chu 'Peace Bonus' pawisa chuan leiba pawimawhte rul theiin, awmze neiin an kal leh thei ta a ni.

Hei hi thikin Sikkim Chief Minister, Pu Chamlinga pawhin, kan ram a ralmuang ve tho alawm tiin 'Peace Bonus' cheng vaibelchhe sangkhat a dil ve leh a. Mahse ram pawh buai lo, inremna siam pawh awm chuang lote pek a nih chuan India ram State dang tam tak pek ve a ngai dawn tih hriain an lo pe duh ta lo va. Chumi avanga a vuithu pawh chanchinbuah a lo chhuak nual reng a ni. Vawiin thlengin Mizoram anga Prime Minister remtihnaa Peace Bonus la hi India ramah state pakhat mah an la awm lo. 

Politics thilah eng ang pawhin sawi hnawm tumin, phuah­chawp leh awm lo ang deuhthaw hial pawhin sawi tum mah ila, hei hi kan hriat chu a ni - Pu Zorama'n PEACE BONUS a phuah hmangin pawisa cheng vaibelchhe 182.45 chu kum 2000 khan Mizoramin lawm taka la chhuak­in ṭangkai takin hman a lo ni tih hi.