Media – hman fimkhur inzirtir a ngai
MJA, Lawngtlai district leh Lawngtlai District Election Office chuan August 31 khan Lawngtlai Press Club-ah political party-te leh an media cell-te tan 'Media awareness campaign' an buatsaih.
Lawngtlai journalist-te hmalakna hi chanchinbu lamah ka lo chhiar fuh ve a, a lawmawm hlein ka hria. Tun hnaiah political party-ten social media ṭangkaizia hriain, an hmang nasa tawh tih a hriat a, tun hmaa kan hriat ngai loh 'Politics Facebooker' tih thlengin kan hre tawh.
A tlangpui thuin politics-a inchiah a, social media lama party tana theihtawp chhuahtute hian ṭawngkam an duhtui loin, midang beih hi ni tin hnaah an nei em ni aw, tih mai awl tak a ni.
Ṭhian kawm hlimna tura siam social media kha inbeihna tual zawlah a chang a, hmai chhana zah taka inbe ṭhinte pawh, social media phen chunga han incho takah chuan ṭawngkam pawh kan lo duhtui lo tlangin, Pathianni apianga sunday school kai kan ni, tih theihnghilh palh mai awl tak a ni.
Hemi a nih avang hian kan political party-te hi media hman dan kawngah fimkhur tur leh, tihdan chin tawk hre tura zirtir hi an ngai hle niin a lang a, Lawngtlai MJA lamin hetiang hun buatsaihna chang an hria hi a lawmawm takzet a ni.
Ṭawngkam ṭhenkhat, feiki bar pui pui kan hman hi chu a taka kan hman duh miah lohte an ni a, hei hi tihdan phung pangngaiah neiin, kan ni tin nunah kan seng lut palh mai ang tih palh mai pawh hlauhawm tak a ni.
Social media chauh a ni lo, inthlan a hnai a, political party tin pawh kan ṭang hle tih a hriat. Mahse, hengah te hian midang beihna ṭawngkam uchuak, media-a tarlan tlak loh khawpa duhawm lote hi hman loh hram kan inzirtir a pawimawh takzet.
Hei vang hian media awareness hi Lawngtlai district chauh ni loin, Mizoram puma kan political party-te pawh hian an mamawh niin a lang a, Mizoram Journalist Association lamte hian hma han la chhunzawm zel thei se, a va duhawm dawn tak em.
Hetihrual hian Mizorama kan media zirna in neih, Mizoram University lama Mass Communication department-te pawh hian ram tana rawngbawlna remchang tak a ni tih hriain, heti lam hawi zawng hian awareness te pawh han buatsaih thei se a duhawm hle ang.
Sports & Youth Services minister Robert Romawia Royte pawhin, Republic Veng YMA Hall-a Central Higher Secondary School Annual Sports khârna hun a hmanpuinaah, social media-a thu leh hla thehdarhah belhchian dâwl lo a tam avangin rin dan chin tâwk thiam turin zirlaite a chah a nih kha.
Hei vang hian kan political party hruaitute pawh hian ṭawngkam mawi lo leh thuthang dik lo awm ṭhin hi an vei ve tho niin a lang a, anni pawhin anmahni party chhung ṭheuhah inzirtir uluk lehzualin kalpui se ava duhawm em–chuti lo zawng ni tina media-a kan thil hmuhte hi thil nihdan tur emaw tiin, kan faten an lo ṭhanlen pui hlauh ang e.
- Lalawmawia