MAMIT KAN VANGLAI - X

TAR LUNGLENG : Kum 60 (sawmruk) dawn liamta Mamit kan vanglai Community Development Block hawntirh lai, in 100 zet chauh an nih hunlai leh motor luh tirh chanchin te awmkhawhar lunglen changin a lo lang ṭhin a, hetih hunlai khawtlang hruaitute leh ṭhian ka thawhpui ṭhinten mual min liamsan zo tawh bawk nen, tun hun ṭhangtharte tan lah ngaihnawm an tih lam a nih hmel si loh, a hre pha tlema zawngte leh an tu leh fate tan erawh an lungte pawh a leng ve mahna, tiin kan ziak ve leh thla rawk ṭhin a.

Inthlan a hnai a, politic lam hawi leh articles ngaihnawm leh ril tak tak kara lo inzeh ve ṭhin chu ka inthlahrung deuh nain, ziah tur a la awm lo maw? ti tawk lo awm ve khanglang nen, chu bakah Dt 17.8.2023 Aizawl Post-a Pi Zoremi Hmar Zote in TAR KHAWHAR tih a rawn ziah khan min tiphur deuh bawk nen, TAR LUNGLENG tiin kum 50 zet liam ta, Mamit dai vel ka chet dan te kan sawi mai mai teh ang.

Kum 50 (Sawmnga) hma lam kha chuan Mamit Tlangdung “Vachhe Tlang dung” an tih ṭhin khu Ngawpui chhah tak Chhura rual Ngiau, Char leh Zihnghal leh Bul thinglian pui puiin a khat a, Ngawpui hnuaiah Hruipui, Thilte, Thilthek, Kawihrui, Sairil, Leihruisen leh Selu chenin a awm a. Thei vawkpui leh Thei sehret thlengin dai bul hnaiah a awm a, Vahrit, Ramar leh Ramparva ten an tlan a, thlasik ah Ngiau rah tlan, Kawl hawk, Vapual leh Vahai chenin an thûm huk huk ṭhin. Bullut, Vahui, Tawllawt, Tukloh leh Vate ho tlan tur Bul, Chawmzil, Phuanberh, Kelbuh leh Saphut te dai bulah a tam khawp mai.

In leh lo dina chhungkaw bul ka ṭanna hmun a ni a, Pasalṭha silai nena ram vak chi ka ni lo na in, pasalṭhate hnungzuia Sazuk, Sanghal, Sakhi chena hlawhtlinpui chang erawh ka nei ve ṭhin. Dai vel erawh ka hrut nasain hetiangte hian hun ka hmang ṭhin.

THANGTHLENG KA KAM : Ni khat chu kan ṭhenawmpa Pu Ralliana buh phur haw hian Tuklo hi a rawn khai haw ṭeuh mai a, ka lo leisak nual a. Engtia in man leh khawilai hmuna in man nge tih dilchhut angreng takin ka lo zawt a. Thingpui no dawm chungin, “Sihhung Zotui bulah sawn Saphut rahtlan Thangthleng ka kam a, buh phurh pah hian ka rawn en hawng a lawm maw le,” a ti a. Ka chhinchhiah ta ran a, kum thar lamah kam ngei turin a rah sen tirhte aṭanga hauh (hum) hmasak ber ka tum ta ran a.

Kum thar September thla tirah ka ram kalin, Saphut kung chu ka va hmu ta, Vaimim fang tia ṭhelh hian a lo sen tawh a, Saphut kung lian tak sang tak a ni a, ka hum zui ta a, a lawn pawh a awlsam lem lo, an lo kam fo tawhna ṭhin a ni a, a zar hmawrte an thlak kawlh a, a lo chawr ṭan leh a rah kher mai. Helai hmun hi tuna Deputy Commissioner, Mamit Office thlang tlaklam Sihhung Zotui khur thlen hma, kawng chunga awm a ni, tunah chuan khawlai ang mai a ni tawh.

Phur takin Thangthleng ka puah ṭan a, a hruiah parachute hrui zai ka hmang a, ka puah zo thawkhat a, ka va hum ta. Thang panga vel chauh kam theihna turah, Thangte ka dawh kalh ṭuk a, a zar hmawr tak thlengin thang sawm zet ka kam a, thal ngulah Rawnal leh Rawthing Fek ka hmanga, a rul ve mai lo a, a ṭha khawp mai. October thla tawp lam a hmin hma aṭangin Savain an rawn hèl ṭan a, Tuklo hi a tam ber an ni.

November thla kan kai a, a hmin ṭan, ka inpuahchah hma bawk a, ka awk thei kher mai, nikhatah vawi hnih, zing lam leh tlai lamah ka en ṭhin a. Thang zawng zawnga a awh kim chang te pawh zuk awm ṭhin a. A bul hnaia Saphut kung te deuh te leh Phuanberh rah te pawh chu ka kam belh ta zel a. Tawllawt leh Mute thlengin ka awk a, a hnuai lamah Varihaw thawm ka hriat ṭhin te pawh Beai leh Sahdal thang hnih lek kamin ka awk a. Mute leh Mu-Arla hian han awm loh hlek chhung hian thangawk an lo ei ṭhin a. Thangthleng dawhah Tuklo ka phuar bet sauh sauh a, thuk takin a dawh ka kam sang a, a hnuai lamah biru takin ka enthla a, thawklehkhatah Mu-Arla ráng ruk mai hian, chak tak maiin a zuk ṭham chu le, a ti fuh lo kher mai, thangngul a khauh ṭha bawk a, Mute pakhat ka awk bawk a, hemi hnu hi chuan min tibuai ta lo.

Season khat chhunga thangthleng kamah, kei aia sava awk tam hi awm tak maw? Thla hnih chhung ka vil a, Tuklo ringawt pawh 500 (zanga) zet zuk awk nia maw le, a hmul pawh naupang lukhama siam tham zet zuk ni a. Tun hnua a hmun leh hma te hi kal remchan nikhuate hian ka zuk fang thuak thuak ṭhin a, lungte hi zuk leng phian ṭhin a, TAR LUNGLENG tih takah.

- LALHMANGAIHA SAILO, Holy Cross Bakery,
Ph : 9436360275