PEACE BONUS NI LOVIN... PIECE BONUS ZAWK A LO NI E

Tun Assembly Session chu a pui e. Kum 34 kal ta a, India ram tibuaitute'n (Vai hovin Helho min tih sak, keini erawhin Mizo Hnam Pasalṭha kan tihte) India nena Remna Muanna thuthlung (Mizoram Peace Accord) an lo signed tak avanga India sawrkar lawm ta lutukin a hnu lamah Mizoram sawrkar, MNF ruling lai ngeia a bik taka India sawrkarin lawmthu sawina atan... a sipisial takin, State dangte beisei ve phak loh, dawn ve theih loh hrim hrim, a hmingah pawh PEACE BONUS an rawn tih vel vei ni ngei  anga kan lo ngaih chu, MNF-in India an tih buai hrep hnua an rawn overground leh tak avanga India sawrkarin a lo Welcome Congratulate thang huamna nia sawiin, chitiang taka kan lo ngaih tawh,  kan lo intih dawn sial ve em em leh intihtheih pui chu le... Ka rei maw... 

Tun ṭum Assembly Session-ah Pu Duhoma MLA taimakna leh thil man thiamna a zarah... Central Sawrkar- in North East Region Special  Deve­lopment Packages a siam NLCPR (Non Lapseable Central Pool of Resources) hnuaiah percentage tlem min lo pe ve lek a lo ni reng si... tih kan han hre chhuak leh ta hlawl ringawt pawh hi a Mizoram leh Hnam ang pawha hmasawnna chi khat chu a ni e. Lawm tur kan ni lawm mi? 

A chhan chu kan CM te pawh hi keimahni ang bawka Adama thlah kal zel ni ve bawk a, thin phut det pawh nei lova dawt sawi hrat ve deuh deuh, thil risk huai ve deuh deuh an ni tih kum 20 zet District Council kan nih hnua kum 15 vel kan UT leh leh hnua, kum 33 zet kan State leh hnu meuh chuan kan man chhuah ve tak ngat asin le... le le le. 

India Central sawrkar hi Domestic Law & Order problem (Home Affairs) han chalai velah, a bikin Hel pawl han dawr velah hian a sang teh mai a nia! Khatia kum 20 zet kan hel hnua, State dinhmuna min hlan kai dawn khan hel vak a, Overground leh vela State hi sawi chhuaha nih theih a ni lo tih chian nan kan rualin Statehood kha hel ve eih lo Arunachal Pradesh leh Goa an pe ve hmiah mai a. Min dah bam thiam hle. 

Chutah lo ngaihtuah chiang deuh ila chu kan MNF hotute'n Peace Pays, Peace Bonus  kan dawng an tihte pawh kha a lo awihawm loh hle mai tur hi a ni ngai a.

A thuhrimah Central Sawrkarin NLCPR a siam chhan chu North East Region hi kawng tam takah kan hnufual a. Dik tak chuan Central (Mainland) kan tih vaiho khu chuan Aizawl chu sawi loh Guwahati a rawn in transfer chhoh ringawt pawh khu Punishment Transfer hialah an ngai tlat mai a ni. 

Central sawrkar hian he NE Region-ah hian Scheme Project hrang hrang han duang ve ṭhin mahse... tih hlawhtlin (implementation) lam a chau rau em ṭhin avangin ... khaw nge Central sawrkar Department zawng zawngin an Plan Budget 10% tal North East Region atan an hmang ngei tur a ni tih ngaihdan an nei thar kha a nia. (Plan leh Non Plan budget kan neih hran lai khan...) 

Khawi department pawhin an hman theih loh emaw zawh loh chu chutih ruala Central sawrkarin Department a din thar DONER (Department of North East Region) enkawl turin NLCPR fund-ah an dah tur a ni tih a nih avang khan he Pool-ah hian Fund kha a pung chak hle a. NLCPR hnuaia Fund awm hote hi Project based a demand siam a, sawi chhuah tur a ni ber. 

Central Sawrkar department tam berin North East Region ah schemes  projects lo nei peih hlawm heklo. Kei a thawh ve na thin, Department of Mines erawh chu ka lo zawm ve hman hlauh bawk avangin NE States ho khan a tam thei ang berin he Special Packages fund hi hmang ṭangkai se tihna ka neih len avangin kan 7 Sisters & 1 Brother States te ka round hneh hle reng a. Fiamthuin... ka Division ve ah chuan Governor 8 leh CM 8 an awm ka ti uangthuang ṭhin. Chuvangin kan Department hotuten Guwahati ah Regional Office an hawng thar sauh sauh va, kei lah chu vanneihthlak takin... kan Department pumpuia Mizo awmchhun nih chu sawi loh North East Region pum, State 8 aṭanga mi leh sa Officer awmchhun ni mauh hek i...Officer Incharge-in ka awm ta chat a, peih hmel bik lo deuhvin kan awm kikawi sawi vel na nga, phur tak kha ka ni. Vaiho duhsak tur chiin... fin lutuk tawh zawk avanga inti a inti mawl derin... thu awih em em àwm takin...hriat zawk reng thil te pawh... Sir, ei sa he kya ... bahut bariya hai... ka ti vel peih ṭhin hle kha a nia. Kan te ber... Serchhipa kan inpui nghaktu, Hruaitea kan tih dan takah... Ka u, a lal lal, a chapo po hi bawl chu an lo nuam zawk asin... a ti pek a. 

Chuti chuan he NLCPR a chhung lut ve miah lovin keini Department of Mines ve chuan kan 10% Plan Budget hmanna tur chu kan hre hnem chho ta hle reng a. Kum 2005  -2010 chho phei kha chuan kan Controller General, IBM, Nagpur khan he Special Budget hman hi a tui over a, 10% of Plan Budget mai duh tawk lovin, fund a dil belh ṭhin zu nia. Kum ṭhenkhatah phei chuan entir nan 100 Crore chu kan 10 % Plan Budget ni se, 250 Crore hial te a hman chang a awm zu nia. Amaherawhchu, North East Region hmangaih tak tak vanga hmang uar ni hek lo le, a pension fel chiah tiin CBI hovin case an siamsak a, Jail chhungah zunthlum sang lutuk complications avangin a boral ta hlauh bawk. He vaipa hi ka hnial peih lutuk avangin Guwahati aṭangin 2010 khan Punishment Posting in Bangalore Regional Office ah min transfer vel. Manipur sawrkarin an mamawh an dil ang pe si lova, kan supplier neih (outside NE Region ami hlir lehnghal) hisap a kan pek ṭhin, an lungawi loh thu min hrilh kha kan pu ber, CG,IBM (Controller General, Indian Bureau of Mines) chu kan hrilh mauh mai a, min transfer chiang teh asin. Kan service-ah kha chuan Guwahati te khu vai dangho tan chuan kan Punishment Posting, kan Tongkolong ve a nih laiin kei erawh Guwahati aṭangin Punishment Transfer in Bangalore ah min sawn vel kha a ni a, dangdai ve riau asin. 

Kan pu ang hi vai officer-ho zingah an awm ve ṭeuh avangin NLCPR zem pawh a liam pur pur tawh lem lo chho a ni awm e.

PAWIMAWH

Tunah pawh hian Central sawrkar leh Naga helho inbiakna hi abikin kan Politician hovin an follow uluk hle a ngai. Mizoram Accord-a Goa leh Arunachal Pradesh te buai ve map lo, khawvel hnena Terrorism Does not Pay tih an show duh nan State an pe ve ngawt ang khan tun ṭumah pawh Naga hovin an ṭhenawm State chhunga Naga-ho tamna area-ah Autonomy sang tak neih tal an nawr mek a. (An Naga original demand ...All Naga inhabited areas to be under one Administrative Umbrella lah chu India in  a pek theih hmel si lova...). Chu lam hawia an insawi remna lamah  Mizoramah hian Chakma-ho hian Greater Autonomy nei inrelbawlna thar an nei ve ringawt ang e. 

DAWT SAWI LEH INHUAT BAN SANIN...RALTIANG KAI ZAI I REL VE TAWH ANG U HMIANG... Mizo leh Mizo han inbum/inbawl leh tur chuang kan awm lo ve. Dear Piece Bonus Chief Minister... ti raw.