Khawi ah nge Mizo pangpar

Pangparte hian mihring nun an tihlimin an tihahdam ṭhin. Kan taksa chauh laite, kan rilru hah laite'n pangpar vul chuk mai kan bulah a awm chuan chu chuan min tihahdam huai huai ṭhin. Pangparte hi khawvel pum timawitu an ni. Engkim siamtuin thil siamte tihlim tur leh timawi tura a lo din pangparte chuan rimtui an pek chhuah bakah zu tam tak an siamchhuak a, chu'ngte chu phengphehlep leh khuaiten an tlàn a, an zu siamte chu mihring tan chaw leh damdawi ṭha tak an lo ni leh a.

Khawvelah pangpar sáng tam tak awm mah se; Mizo pangpar dik tak, kan pi leh pute hunlaia an lo chìn tawh chuan Mizo leh Mizoram hi an mawi ber mai. Zokhuaah chuan lo lamah thlám bulah an ching ber a. Ni sensa hnuaiah hah hnepin hlo kan thlo a. Chhunah chawl turin thlam kan pan a, thlam bulah chuan pangpar vul chuk maite chuan min lo hmuak a, par zu tlan phengphehlep ṭial mawi leh khuaite chu an lo thlàwk delh delh a, thlifimin a rawn chhém bu siau siau a. Kan taksa ngei pawh chu thliin a rawn chhem dài ta a. Hah kan hre tawh lo a, chutiang nun chu a lo hahdam ber mai. Nun thlakhlelhawm ber a lo ni. Tunlaia natna lar ber miten an thihpui nasat ber, thisen sang leh zunthlumte chu kan umbo chiang ṭhin khawp mai.

Aizawl khawpuiah phei chuan Mizo pangparte kha hmuh tur an awm ta lo. Mizote hi kan mak khawp mai, thil thar lawm mi kan lo ni a. Kan kawt leh bathlarte chu mi ram pangparin a luah khat zo ta. Rual ute mit a la ve lo a, an rilru a tihlim ve thei lo. Han en mai pawh hian lunglen a kaichhuak ve thei lo. Hmanlai mite leh rual ute chuan sawi tur an va ngah dawn em!

Haw u, kan in bul leh kan kawt vela ram dang pangpar kan khàwite hi a remchan chuan Mizo pangparin i thlak ve tawh ang u. Mizo kan nih chuan kan pangpar neih vete kha kan ching uar tur a ni ang.

Mizote hian hnam dang pangpar kan ngaisangin kan la lut ang hian, mi ramten kan pangparte hi an hlut ve ang em le? Pangparte hi an hunbi taka lo par ṭheuh an ni a. Mi ramte tih angin Mizo Original Flower-te hi ching ṭheuh ila, mi rama thawnchhuah tham khawp kan thar theih chuan sum hmuhna ṭha tak a nih a rinawm.

Kan state flower-atan mi ram pangpar kan lakluh hmang lovin kan pi leh pute hunlaia an lo chin tawh kan hman zel hi a inhmeh a ni. Anthurium Festival-tih ai chuan Zamzo Festival tih chuan Mizoram hi a timawi bik a, Mizorama Zofate a ti-Mizo bik.

- H. Neihchungnunga, Durtlang North