Ka ngaihtuahna tikal thuitu

Hman zanah Fake Account tih hriatsa a ni chung chung David Sailo an tih thu ziak hi ka chhiar a, August 30, 2023 khan a rawn ziak a 'Zan Rei Nawi' tih thu a ni a, vawi thum vel ka chhiar chhuah hnuah pawh thil nawi ni lovin thil khal a ni tih hi ka ngaihdan a ni. Mipui tam zawk chhiar atan ka rawn chhawp chhuak a, thiam angin kan sawi zui ve bawk dawn a ni.

"Kan Sorkar leiba, Point 5 lek tarlanah Tluklehdingawn 4 a tlin thu ka Post-ah khan NABARD sum pûk, SASCI Etc. a la tel lo zawk tih hre thar leh ila. Hei mai a ni lo, RBI lama OMB kan tih mai, Open Market Borrowing lam kan la thai lang lo che u. Sorkar hnathawk hlawh lak dawn apiang deuhthawa kan Treasury chu RBI lamin min LILAM dan kan la sawi thleng lo zawk a ni!"

"Heti chunga Party Worker ten a rulh dan tur Source mumal tak Sorkar in a duang tih sawi tur hre lova a ngaihna hria a piang chhuahsantute mawihnai taka inti thlah fahran, an chhuahsan tak an beih zui chiamna awm si lova, mahni chhuahsan ram beih chu hna ṭul bera ngai si te Politics Politeness hi kan Politics Social Media ah a thang mek a, tute emaw hi chu an insuih zuih ṭût dawn a nih hmel."

"MNF hian Flagship emaw, Manifesto emaw an la chai pha lo va, Candidate ah an la buai ber niin a lang. An in-Set fel ang a, Manifesto chu hnûm hlarhin an la rawn chhuah maithei. Pu Hawla'n "Manifesto chu kan inziah ṭhatsiak mai mai" a tih leh "Bat tam hi changkanna" a tih thuhlâah chuan MNF hi a ZUITU FEL TAK an ni! Active Politics chawlhsan tawh thu hla hi MNF hian an zawm ṭha ber."

"Pu Hawla hnuaia hun rei tak lo tâl tawh, khatih hunlaia Mr. Clean tia hriat hlawh ngai miah lo chu tunah a rawn Clean thar leh em em a, Nuai 25 chungchanga inpuhna chiangkuangah chuan inpuh hmingchhiatna, Defamation Case hial a File dawn emaw tih laiin "Ka sawi nge Pu Ksa sawi in rin zawk?" tih chu nawizel taka Nuai 25 chungchanga a hnukharna a ni zui! Mr.Clean inti em tur chuan a tawp kharna hi a ho lulai ve em a ni!"

"Thuruk zêp hlei thei lo, ṭawng tam, kam tam tamna ZPM chuan Candidate an puang fel dêr a, Ruling lamin puan hun tura sawi an thlak sek a, pathumna ni mek Congress lah an buai tho! Ram hruai an tum dan, mipui kaihharh an tum dan, an Manifesto, an Flagship ah an bûr hleithei lo. Candidate Set buaiin an buai a, THURUK a awm erh urh mek hlawm a ni. An puan fel meuh chuan mipui harh hawkna tur Flagship chuan hun a chang tlem tawh viau mahna!"

"Kan Politician lawkte hi fakna lem lem hmanga bâwl nuam ber ber an la ni a, takna aiin telna an ngah satliah a, hruaina fing aiin bâwlna ril an luhchilh hlawm a, ram aiin Party bawk an hmachhuan mek a, leiba ngaih thutak aiin inlei tlin tumin an hmanhlel a, tuna kan dinhmun mek chhe fahran hi siam ṭhat tuma Sorkar tumna aiin "Kan invulh ve hun" tih an thlir rân vek a! Mizoram chu a sirah a tlu let hual mek a nih hi."

"Tu hian nge Party hmangaihna dah ṭhaa Zoram hmasak ni? Tu hian nge leiba sukiang tura hreh tak chunga Sorkar tum? Tu hian nge chhungkaw tlakran phah khawpa ram hmangaih tum?"

"Mizoram hi hmangaih tlak a ni tawh lo va, Mizoram chan chhe taka awm mek hmanga inhai vur tum zel Politician kan hrawn zui a nih chuan Chunglam hian thisen chhuah a la remti khawpin ka ring!"

Khi thu khi a nawi ka ti ve lo. Thu khal tak a nih bakah thudik a ni. Zawlnei naran ai chuan kan hmabak tur a sawi thiam. Amah a ziaktu lamah buai ta lo ila, a thu ken khal tak mai ka chhut ka chhut hian, Mizoram hian he thu hi chu a ngaihtuah ngun loh chuan kan hmabak hi a thim. Zawlnei puan thim thuah hnih ni loin fake account thu puan thim a ni, a thim dan hi a hnaivai si a, i ngaihtuah nawn ang u. Ka ngaihtuahna a kal thui a, Kohhran mi ṭhenkhatin an ngaih theih loh politics kan ngaihsak loh avang hian kan la buai dawn chauh a, i harh ang u, Mizoram hi chhan tlak a la awm e.

- C. Lalfakzuala, Bawngkawn