Local Council by Election leh Aizawla MNF dinhmun

August ni 22 khan Aizawla Luangmual Veng leh Salem Veng chuan Local Council By Election an hmang a, ZPM Candidate an tling ve ve. He inthlan result hian Aizawla ZPM dinhmun leh MNF dinhmun a tilang kan ti thei ang. Hei hian Pu Robert Romawia fin fàlzia a tilang bawk ang. Miin Aizawl a hlauhawm tih a hriat hma khan MNF zinga Aizawl aṭanga insawn chhuak hmasa ber ni turin; Pu Robert Romawia chuan Hachhek Bial a lo pan tawh a, tlin nawn theihna a zawng a, a tifuh dawn hle a ni.

MNF hi an performance a ṭhat loh avangin Aizawlah hian an tling dawn tawh mang lo tih hi Pu Robert Romawia hian a lo hmu thiam làwk a, MNF Minister langsar ber lawr lak ni siin a chenna veng Chhinga Veng chhuahsan a thlang a, a thlan chhan a chiang a ni. August thlaa By Election hi ka en chuan MNF ṭhatna veng ve ve a ni a, an chak lo ve ve. Remna Run awmna Luangmual hi tun hma aṭanga MNF ṭhatna veng a ni a, By Election neih zawh takah MNF chu ZPM-in an hneh ve ve thei a ni. Mipuiin ZPM vote tlin hrim hrim an tum.

Aizawlah hian MNF MLA Pu Zoramthanga, Pu Lalruatkima, Pu Lalmuanpuia, Pu Zothantluanga, Pu Lalnunmawia an awm a, an tan Aizawla din nawn hi a him tawh lo. Chumi hre chiangtu chu Pu Robert Romawia a ni a, a chhuak fel tawh.

ZPM vanneihna chu Congress tla chhia hi a ni. Congress ruhkawl chuan Congress an la vote dawn tho tho. Mahse, Congress voter ni ṭhin sorkar hnathawk leh inziak lut ve lo chuan ZPM an vote din hmel. MNF hian party mi leh sa ngah hle mah se, tling tur chuan neutral leh sorkar hnathawk vote a ngai a, an chang dawn lo tih Luangmual leh Salem ah hian a lang. Luangmual MNF candidate hi MNF LC member thi ta fanu a ni a, Salem Veng MNF Candidate hi Pu Lalthazuala footballer lar thin leh chhungkaw hung an ti bawk a, an tlin loh chhan hi candidate ni tawh loin mipuiin MNF vote loh a tum tawh vang a ni.

- KC Lalsangliana