Congress-in mahni goal-ah khung palh
Pu Lalthanhawla chawlh hnu hian Congress hi an hniam tawlh tawlh em ni? tia inzawh pawh ngai lo hian an hniam zel a, tuna an dinhmun ang em hi chu thleng turin ka ruat ngai lo. Sorkar hnathawk chhungkua politics rawng nei lo chunga MNF aia Congress hi an mimal zawk avanga lo ṭan ru ṭhin tan pawh ZPM lan vang ni hauh loin, Congress hniam ta hian ṭan chhunzawm tui awm loh khawpin anmahni an insawp chhe zo. Pu Hawla nge nge a lo ngaihsanawm khawp mai tih hi, Hawleka tia au ṭhin khan an hre chiang tawh hle ang chu.
Pu Zodintluanga Treasurer aṭanga a bàn chhan kha Congress President thar Pu Lalsawta hruainaa a lungawi loh vang a ni. Pu Zodintluanga khan Congress a chhuahsan si lo, a lungawi si lo kha politics pawn lam chuan kan hrethiam lo va, Pu Lalnunmawia Chuaungo Vice President atan an dah hian thil awmzia a lang ta kuarh a ni. Pu Zodintluanga kha MLA ni bawk, Congress lama Pu Sawta aia senior ni bawk chung khan thil pawimawh tam takah ràwn a ni lo va, a vui thu kha a banna lehkhaah a lang a, Pu Nunmawia Vice President a nih tak chiah hian Pu Zodintluanga te rawn lova hmalakna chu a lang ta. Kum tharah Congress hian President an thlang dawn a, Pu Nunmawia tan kawng sialin Pu Zodintluanga lam hi paih an tum ta niin a lang.
Congress hian Ruling Party MNF pawh bei lova ZPM an beih hian sorkar tumna an nei lo tih an nemnghet a. Kum 2028 inthlanah kum 10 rorel tawh MNF hneh an tum. Kum 2023 chu Party insawh nghehna atan an hmang dawna Pu Zodintluanga lam an paih thla fai ang a, MNF an sorkar leh law law anga kum 2028-ah "Congress Thar" tiin hmel thar nen ke pen an tum dan a lang chiang chho ta a ni.
MLA hlui ṭhiau leh Congress kum hlun Pu Chalrosanga, Pu John Rotluanga leh Pu Lalrobiaka te an chhawk hi thil mak tak a ni. Pu Nunmawia an candidate tur hi chu thil inhmeh tak a ni a, IAS meuh a ni thei a. Congress Candidate tura an sawi mi dang lut thar hi chu ZPM seat chang lo rual mi thiam an nih pawh hriat ni lote an ni a, Congress hian an mi hlui Politics tawn hriat ngah hi dah se an ti fuh zawk ang. Tunah hi chuan football ho ṭawnglam chuan own goal an thun a ni. Mahni leh mahni an inbei a ni. Thapui nen ZPM beih ngai bawk, rûn dalah MNF beih ve ngai bawk, mipui hipna atan BJP beih ngai bawk mahni inbei bawk an ni a, an ti fuh lo.
Congress Minister hlui Pi Lalawmpuii pawh a ṭawng duh barh barha a hàk phah ta a ni. Ellinary Lianhlawng ZPM in an lak luh tirh khan, Mizo hmeichhe politician langsar khan Mizo politician lut thar beiseiawm tak kha nawmsak duh avanga hnam dang pasal nei tiin a khak a. Tunah hnam dang nupui Pi Miriam Hrangchal chu Congress on candidate atan an sawm leh si, hei pawh hi own goal tho a ni.
Congress party ruh rel lian, rorel thiam a hun taka che ṭhin kha awmze nei lovin an muang sual chho ta. Candidate invuah fel lovin chhungkaw hrang hranga campaign thei lovin an indang chep a, MPF-in home to home campaign an khap chuan candidate pawh hmelhriat hman lovin bial tam taka Congress mipui hian inthlan an thleng dawn, neutral chuan a vote-pui nasa lo ang tih a rin theih a, hei pawh hi own goal bawk a ni. Party inrelnaah chuan MNF aia lian leh rintlak an tih kha an te tial tial a, an thawh leh dawn chuan Congress mi hlun tilungawi leh se, mi thar politics tawnhriat nei lo hi vulh lian lo se, Politics khel tur chuan sawm Politician nge nge an ṭha, Congress tan chuan Pu Hawla kha a ngaihawm nawn ṭhin dawn a ni, tuna an kal dan hi chu mahni lama pet goal ang a ni si a.
- K. Lalsiamliana