Mimal nun pawimawhna
Mimal nun ṭha lo leh hman dik lohna chu ama tan a pawi bakah a chenpuite tan thil ṭha lo a thlen a, khawtlang leh ram tan mi hnawksak an ni fo ṭhin. Mimal thinlung ṭha lo leh rilru kal sualna hmalakna avangin indopui pakhatna leh indopui pahnihna a lo chhuak tawh a. Chutiang avang chuan indopui pathumna pawh chhuak leh mai thei a ni ta.
Kan pipute hunlai khan Mizo tlawmngaihna kha ṭhianzaho leh mimal nunah a bet tlat a. Zawlbuka val upaten thu ṭha an nuna an zawm turte chu ṭhianzaho leh mimalte chuan an zawm ṭha em em ṭhin. Mitthi an awm pawhin zualkoa kal ngai a nihin khaw kar kawng hla tak takah mahni chauh pawhin an kal vang vang mai ṭhin. Aia upa zahna an nei lian em em a, eikhawmnaah pawh aia upa bar hma chuan an eiin an bar hmasa ngai lo.
Taitesena nunah khan Mizo tlawmngaihna vawrtawp chu a lang ṭhin. Hmanlai Mizo pasalṭhate nun tiropuitu chu, mite hriatpui loh laia mi dangte tana thil ṭha an tihte, ral leh sahrang hmaah zam lova hma an tawnnate chu hriatchhuah leh a nihin chu chuan an hming a tithang ṭhin.
Mimal nun ṭha chu ama nunna atan a ṭhat bakah chenpui an nuam a, khawtlang leh ram tan mi hlu an ni.
Tunlai hunah chuan kalkhawmnaah thu ṭha tak tak sawi ho a niin, chu'ngte chu zawm tura rel a ni ṭhin. Chhungkua leh khawtlang tan, ram tana thu ṭha zawm turte an ni fo thin. Nimahsela, mimal thinlung hmin lo leh ngaihdan dik lo chuan thil pawi tak a tih chhunzawm zel a. Chu mi chu ramhnuaiah a va lut a, ramsa leh lui dung sanghate lakah chet dan ráwng tak tak hmangin a va khawsa a. Ama tan a ṭhat dawn phawt chuan thing leh maute pawh a kit rèm zo va. Mi bungrua leh huan thlai thleng pawhin làk a hreh chuang lo. Ruihtheihthil a tih ṭhinna chuan mi te buaina a thlentir ṭhin.
Kan rama eiruknate, thisen chhuahnate, thing leh mau lo chereua lui tui lo kang zel te, nungchate lo rèm ta te, bawlhhlawh a paihna tur ni lova paihte hian a entir chu; mimal thinlung dik lo avanga nun kal sualte thil tih vek a lo ni. Sawrkar, NGO leh pawl hrang hrangten hma an lain mihring nun venhimna kawngah te, kan ram leilung a lo him zawk nan te, nungcha leh thing leh mau an lo rèm mai loh nan tha leh tui, hun leh sum tam tak sengin an thawk nasa em em a. Nimahsela, hengte hi awmze nei lova thlentirtu chu a phèna awm; ṭhianzaho leh mimal nun dik lo hmalakna vang a ni.
Zu zuartute, rukrute, nungcha suat remtute, thing leh mau tichereutute hi mi tlem te, an chhungkaw dinhmuna harsa ve tak takte an ni. Anmahni hi thu ṭha tak hrilh hnuah an tih tawh loh nan chhawmdawlna pek ni ta se a ṭha ang em? Chu chuan thil danga hmalakna hautak takte chu a pumpelhtir thei ang em, tiin ngaihtuahnaah a awm.
Eng pawh nise, kan ram hi a lo him zawk nan mimal nun hmalakna dik lo awmte kan en zui lehzual a ṭul ta hle mai.
- H.Neihchungnunga, Durtlang North