MAHNI KHUA LEH TUI AIIN RAM DANG MI MAW? (An chil per tak ngial pawh a la hul lo a sin!)

Assam nen ramri chungchanga kan buainaah hian Central sorkar hian a khua leh tui dik takte aia Bangladesh ațanga dan loa Muslim rawn pem lutte a hum mah zawk emaw tih tura lang hian India mi dik takte thinlung a tina hle mai. 

Kum khat em pawh a la ral hma, December ni 12, 2019 ah khan dodalna tam tak karah Citizen­ship Amendment Act (CAA) kha India sorkarin a pawm a nih kha. Mizoramah pawh hemi avang hian kan MP (Lok Sabbha) ngei pawh nasa takin kan dem phah hial a ni. He dan hi kan hre vek ang a; tihduhdah leh harsatna tawh avanga himna duha heng Hindu, Sikh, Jain, Buddhist, Kristian leh Parsis sakhaw vuantute Pakistan, Bangladesh leh Afghanistan ațanga raltlan/ tlanchhiate tana India khua leh tui ni tura pawmna a ni ber. 

He dan pawmpui tur hian nasa takin Central-a sorkarna vuan mek BJP chuan hma a la a. He dan pass a nih vang hian India ram hmun tam takah buaina a chhuak nghal a, mi țhenkhat phei chuan nunna hial an chan a nih kha. A bik takin India hmarchhak state mipuite chuan kan duh lo hle a nih kha. All Assam Student Union phei chuan nasa lehzuala dodalin bandh te an huaihawt a. Chuvang chuan Prime Minister Pu Modi-a ngei pawhin an pual liau liaua thu thawnin, "Assam rama ka unau duh tak te, hei hi ka tiam duh che u a ni, in tan CAB pass nimahse hlauhthawn tur a awm lo. In chanvo hi tumahin an laksak lo ang che u," tiin a hnem a nih kha. 

India ram khawpui ber Delhi lamah phei chuan Hindu leh Muslim inkarah intualvuakna te hial thlengin vawiin thlengin he boruak hi a la dai tak tak lo a ni. 

Chutiang taka Central BJP sorkarin a khua leh tuite tana himna tur leh Muslim ni lo zawngte tana dan țha tak ni awm a siam chu tunah a taka hman a lo ngai ta chiah mai le. Kan ram bul maia awm, Bangladeshi Muslim ilegally migrant (dan lo ang pem) ho nen buaina kan han tawk ta a, mak tak maiin BJP Central sorkar chu India khua leh dik takte aiin dan loa rawn pem lutte lamah a țang zawk titih ta tlat mai nia mawle! Hei hian rilru a tina takzet a, a phena an thil tum hi a tenawm hle bawk a ni. 

BJP sorkar hian vote hmuhna tur a nih dawn phawt chuan Bangladesh ațanga dan loa lo lut Muslim te hi hum a tum ngar ngar ta. Sorkar hotu, IAS officer te nen lam an țangho ta zel mai chu a nih hi. Khawiah nge hmanni lawka an dan siam CAA te kha a awm tak le? An chil per takngial pawh a la hul hman em lo asin! Mahse, nakkum March thlaa Assam MLA inthlan lo awm turah heng Bangladeshi ho vote hi an mamawh miau si a le. Chumi avang chuan a khua leh tui dik tak zawk pawh min țan duh bik ta lo a nih hi. Anni, dan loa rawn pem lutte lah Central lamin a țan tih inhre chiang takin an huaisâr hle mai si. 

Hemi tichiangtu langsar tak mai chu, Cachar phai velah khuan Party dangte hi an țha ve tlat niin an sawi. Chuvang chuan campaign nan heng mite tana țha tur awm taka langin BJP hian ramriah buaina an siam ta a ni ber mai. Heta a phusa ber berte hi Muslim an ni deuh vek lehnghal. A piah lawk Bagha, Kabuganj, Silchar etc vela awmho chuan engah vak an ngai lo tlat si. Chuvangin, ramri hmang hian sorkarna siam tumin hma an la mek a, an dan siam ngei ngei pawh an palzut hreh ta lo a ni. 

A tawi zawngin, Silchar-ah khuan Muslim aiin Hindu an tam zawk a. Anni hi chuan India mi nihna hi thinlung takin an pu a. BJP ni ve tho mahsela Lailapur vela Bangladesh Muslim, dan loa rawn lutte țan viau hi an ba lem lo tih an chiang. 

Tunah pawh Mizoram House-a tangkhang mek Mizote an țanpui zut reng mai hi. Chu mai a la ni hlei nem, sorkarin vote zawn nana ram dang mi a pawng tih țhat chiam mai hi ram leilung fate tan chuan ngeiawm tak tur a ni. Mahsela tunah chuan sorkar pawh a beidawng ta deuh nge ni, Assam sorkar Finance Minister, Hemanta Biswa Sarma chuan nakkum MLA inthlan zawhah ramri chin fel a nih tur thu a sawi daih thung. 

BJP sorkarin vote zawn nan ramriah harsatna a siam a, keinin theihtawpin beihletna tur ruahman­na kan siam mek laia an duh hun huna tihbuai theih ang leka min ngai hi Mizote hian kan hriatthiam a hun takzet a ni. Heti maia zuih ral tir chi erawh a ni lo ang. Kan sorkar hian hma la zel teh se. 

Han peng zau leh hlek ila. Hetiang hi kan boruak a nih mek karah chhim lam, Lawngtlaiah chuan ni 29 October 2020-ah khan Central Tribal Affair Minister, Arjun Munda chu lo kalin Mizorama Autonomous District pathumten dinhmun țha zawk an chan theihna turin state sorkar kaltlang loa sum an hmuh theih nan India danpui Sixth Schedule siamțhat a nih thuai tur thu sawiin BJP tan a rawn campaign bawk a. Heti tak maia an vote zawnna tura kan ram leh hnam min zah ta lo hi a thinrimthlak ta hle mai. Mizoram BJP te pawhin hei hi lo hrethiam mawlh teh se. 

Ramriah kan buai phah mek a, ram chhungah kua an hreuh ngar ngar bawk si a. BJP hrim him hi chu huat ngawtna chhan tur a awm chuangin ka hre lo. Mahsela kan ram leh hnam himna tur tiderthawng zawnga an hmalakna hi chu tarlan ve zel a ngai a nih hi. 

Ramri issue hian kawng hrang hrangin nghawng a nei. A bik takin Kohhran anga Chanchin Țha kan hrilhna thlengin ngaihdan danglam deuh kan neih phah lek lek ta mai. An zinga missionary intirh  te hi a ngai em ni, ti zawnga sawi te an awm ta nual mai. Kan hriat tel atana țul chu, tun țumah hian Mizote tana hnawksak ber chu Bangladeshi Muslim ho khu an ni ber tih hi. Mak deuh maiin Cachar hmun tam takah chuan Bengali Kristiante chu tun țumah hian a phusa ber berah an țang lem lo tlat. 

CAA-ah khan Kristiante hi India khua leh tui nihna chang thei an nih miau avangin an tan Muslimho anga BJP ball-a țan vak hi a țul tlat lo. Chuvangin, ramri buaia kan focus ber turte chu Bangladesh ațanga dan loa lo lut Muslim te hi an ni tih hi hriat reng tur. 

A tawp nan sawi nawn leh ka duh chu, Sorkar laipui hian dan a siam ang ngeia a khua leh tui dik tak te aia dan loa lo pem lutte hma khua a ngai zawk tlat a nih chuan a pawi tual tual ang. Chu'ng bakah polical ball atana hman theih mipui nih hi i tum lo ang u. 'Pathian leh kan ram tan' tiin Zofate hian kan ram himna turin i bei zel ang u.