Kelsa kanna bel nen la chhuak lo!
Minister pakhat chuan Lunglei Municipal Council (LMC) thlan dawn kha, Aizawl khawpui chhung aṭangin Assam Rifles te chu an Kelsa kanna bel nen an chhuak dawn niin a sawi a, he thu hian sawi zui a hlawh hle–tun thleng chuan an la chhuak lem hlei lo a!
Tun hnaia chanchin thar kan hriatah chuan, AR insawnna tur MoU chungchangah MHA aṭangin Mizoram sorkar leh Assam Rifles ten memorandum of understanding (MoU) an duan chungchangah Ministry of Home Affairs aṭangin chhanna dawn a la ni lo, tih a ni. Chanchinbu lama kan hmu dan chuan Aizawl khawpui aṭanga AR-te an insawn chhuah theihna tura ṭul leh pawimawh hrang hrangte chu Assam Rifles leh Mizoram sorkar hian an duang dun a, an pahniha duh dan tarlan ve ve a nih hnuah draft MoU an ziak a ni.
Draft MoU chu MHA hnenah thawn a ni a, an thawnna rei tawh mah se, MoU chungchangah Assam Rifles chuan tun thlengin MHA aṭangin thu dawn an la nei lo. Draft MoU hi MHA-in ṭha an tiha an pawm hunah MHA leh Mizoram sorkarin MoU an ziak ang.
Assam Rifles-te chuan Aizawl khawpui chhung, Lammual leh a chhehvel aṭanga Zokhawsanga an insawn hunah pawh tuna an luah ram chu chhuahsan kim vek an tum lo. Assam Rifles-te hian insawn chhuak tur chuan kum hnih leh a chanve vel mamawhin an inhria a; an chhuah fel hmain draft MoU-a Mizoram sorkar tih tura tarlante tihhlawhtlin vek an phût bawk.
Thil chiang taka lo lang ta chu – AR te hian Aizawl khawpui aṭanga chhuah hi an hreh hran lo a, chhuah pawh an pawiti lem lo. Mahse, Mizoram sawrkar lam hian an tih ve tur hrang hrang an tihlawhtling thei vek rih lo niin a lang a, chu chu an harsat chhan niah pawh a ngaih theih.
Assam Rifles-te hian Aizawl khawpuia an hmun chhuahsan loh tura an duh zingah hian Quarter Guard leh Loch House a tel a; hei bakah hian Zokhawsangah sikul din a nih hma chuan Lammual bula an sikul chu chhuahsan an tum loh thu hriat a ni bawk. Heng bakah hian Zokhawsang panna kawng a ṭha tawk lo an la ti cheu bawk.
Kum tam tak chhung chu AR sawn chhuah chungchang hi politics khelh nan kan hmang ta a, kan la hmang chhunzawm dawn ni pawhin a lang. Huaisen taka ka sawi ngam erawh chu an insawn chhuak mai dawn lo a, tuna sawrkar lai hian an insawi leh duh ang ngawt chuan thil an kalpui dawn lo tih hi a chiang ta hleah ka ngai. Tin, lo insawn chhuak ta tehreng pawh ni se – an hmun ruak hman dan turah kan buai nghal. Kan Chief Minister Zoramthanga chuan tun hma deuh khan AR an chhuak a nih chuan, an chhuahsan ramah han Hall hian tawk tak sak a nih tur thu a lo sawi tawh. A piah lawkah Vanapa Hall kan nei reng a, a bul hnai maia Hall lian deuh dang sak leh ringawt chu eng atan nge kan hman ang tih pawh ngaihtuah fe tham a ni. A hlauhawm ta ber chu thing awmsate kitin concrete building kan sa khat leh khup mai ang tihte hi hlauhawm tak a ni.
Tunah chuan AR awmna chhungah hian In a khát deuh a, thingkung mawi leh lian tak tak hmuh tur a awm. Heng thingkungte hian Aizawl khawpui tan boruak ṭha an siamchhuak ngar ngar a, boruak bawlhhlawh lutuk tur tizangkhaitu pawh an ni ngei ang.AR sawn chhuah hi politics khelh nan kan hmang dawn a nih rau rau chuan, a nawr chhuah hrim hrim hi thil ropui a ni lo, a hmun ruak kan hman danin a zir loh phei chuan ṭhangtharte dem hlawhna tur zawk a ni.
Chuvangin, tuna sawrkar laiin AR hmun ruak hman a tum dan hi chu mipui hian kan thlawp lem lo niin a lang a, a chhan chu building leh Hall sak vak hi kan ngaisang tawh lem lo. Party dang hruaitute pawhin lo hria se – AR hi politics khelh nan an hmang duh a nih chuan, a hmun ruak RAM hman dan tur ṭha leh ruahmanna nei zawk rawh se.
- Sanga, Aizawl