KAN RAM ZIRNA KALPHUNG HI

Myanmar buaina vangin Kan unau tam tak Mizoramah an rawn raltlan a, Mizoram Sawrkarin Raltlan Zirlaite tan zirna chhunzawm phalsakin, naupang zirna mumal dawng lova tei rawlai mai mai tur tam tak tan malsawmna a ni chiang mai. He issue-ah hi chuan Sawrkar hi fak loh rual a ni lo.

Raltlan Zirlaite hi a tam ber Mizo ṭawng thiam lo an ni chungin, an luhna Zirna In hmun kipah Grade sang ber ber an ni zel hian ka ngaihtuahna a tikal thui ta hle a ni. Ngati nge India ram aia kawng tam taka hniam zawk nia ngaih, awpbeh leh neksawrna hmun aṭanga naupangte hi Mizoram Zirlaite hian an tluk mang tlat loh; tih hi research beih tham hial niin ka hria.

Zirtirtute lamah chuan Sawrkar pawh a duh tuiin zir dan system pawh CCE/Semester base-in kalpui a ni a, mark pek dan leh mark put dan pawh Elementary lamah chuan, Text book piah lamah Co-Curricular Activities hmangin zirnaa thiam lo deuh tan pawh thiam thil dang an neihte developed theihna ruahman a ni ta; a nih ang tak erawhin a Department ber pawh hian kalpui a nih hi an beiseiin an tum lo ni chek ang chu, awmze neia kalpui School erawh hriat tura bar an awm ka hre lo. He thilin a tum ber nia lang chu, Text book piah lamah naupangin thiam thil ṭha tak dang a neih chuan, chu chu nakina a dinchhuahpui theih nana zirna dawmkangtu leh tiphurtu ni turin Grade pek tur a tihna a ni ber mai.

Hei mai hi a ni lo, CCE kalpui a nih hma kha chuan kum tawp exam kha a pawimawh ber a ni mai a, kum tir exam tih ṭhatin kum tawp Exam result-ah awmzia a nei lo, CCE kalphung hnuah erawh chuan, kum tluana ṭan mar pát ngai a ni tawh thung. Hei erawh a ṭhatna tam tak a awm thei ang, mark put dan hrang hrang Unit test 30%, Exam 50% leh Activities/Project Work 20% marks te hi tlem han sawi zau hmasa ila.

Test aṭanga zirlaiin mark an khawl hian naupang a tiṭangin, an theihna pawh a pho chhuak thei dawn viauin a lang; chutihrualin Exam pangngaia 50 marks hian Kum tir leh kum laihawla an Exam tawh leh zir tawhte a cover ṭhin lo lai hi a pawi ta ber lai chu a ni. Kum tawpah chuan Chapter tawp lam chauh Exam tur a ni tih hre ranin, kum tir leh kum laihawla a zirte chu a nakin hun tana a pawimawh theihzia a chhût phak tawh lo va, Teacher lahin chhut si se peih hek suh, zir nawntir lah peih chuang hek suh, kalpah leh nuai liam a ni ta vel mai mai a, chumi rah chhuak chu pawi tak a ni. Kum tir lama an zir tam tak kum tawp lama an ennawn/zir leh si loh kha pawl sang zelah a pawimawh ber berte a lo ni tawh a, an lo theihnghilh zo titih tawh ṭhin thung si.

Chu aia pawi leh sàwtpui chuan si loh chu, an syllabus chhungah pawh telh leh bituk awm si lo kha, subject tinah PR-a dah luh tur Activities/Project Work telh a lo ngai ta a, Subject tinah Project Work hian 20 marks lai a pu si, naupangten zirna In chhungah an tih ngai loh vangin PR-a dah luh tur a nih ang takin Exam dawnin Project work chu Subject tin Teachers ten class tinah an han bithliahsak ve a, a tlangpuiin In lama tih tura tuk an ni ṭhin. Chu chu nu leh pa hoa tih a ni ta zel mai a, nu leh pa thawhpuitu ṭha nei chu an tiṭha leh nge nge ṭhin, naupang tihtur a ni e, tiin sawi ṭhin ve bawk mah se, an nu leh paten an lo pui leh nge nge ṭhin si. Zirna In chhungah ngei tihtir dawn ila, Subject tinah class tin Project Work han tihtir chu Elementary level ah chuan thil inkhuangrual thei lo tawp a ni. Individual mark tur a nih vangin Group ang zawnga tihtir khan an potential dik tak a hai chhuak zo dawn lo a ni satliah lo va, mi dang thiamna ringa naupangin mark a hmuh ve kha thil dik niin a lang chuang bawk si lo.

Concern Department ber pawhin In lama tih tur nge, School-a tih tur tih chungchangah inkaihhruaina mumal a siam chuang ngai hek lo va, Syllabus-ah lah Class leh subject milin Project work chu bithliah a awm lo va, zirtirtu fing leh fing lo karah Project work hi a inthlau thei viauin a lang. He thil hian naupang thiamna leh theihna ni miah lovah mark/Grade a santir dawrh ṭhin a, chu chuan Test leh Exam-ah tichhe mah se, a pumpuia chawhrualin Project work lamah a tihṭhat miau chuan a Grade a in-up phah dawrh thei a, quality erawh a keng tel dèr mai si lo. A nihna leh tum chu a District ṭhelhin kan ṭhelh a, hei hi kan zirna kalphung tihniamtu, naupang inthlahdahna thlentu leh kan mu tàn ni chho mek, la ni zel tur, tih ngei ngai si, naupangin a hlawkpui si loh chu a ni.

He kalphung hi ruahmanna ṭha tak nia lang mah ni se, a nihna leh tum ang taka Zirna In te pawhina an kalpui theih si loh, barh luih an nih vang chauha tih ngai, Sawrkar pawhin uluk taka a en chhunzawmpui si loh, kan Zirlaite tichhe mektu a ni tih hi ziak aia chiang leh fiah a ni.

Sawrkar zirna In te ṭhatna ber chu Teacher an uluk chho hle tih vel hi a ni rih mai a, Private school-ah a rethei ber aṭanga a hausa ber thlengin kan fa naute kan ek chhe beng a, mahse chu'ng School te chuan National Education Policy (NEP) in Class room pakhata naupang awm zat tura a duansa 1:30 ratio pel rawk khawpin naupang an khungkhawm a, Teacher leh Naupang Mental & Physical Health tan pawha him lo tur tih chiangsain Class room pakhatah naupang 50-80 te ṭhuttir an ni kum tin a nih hi.

Tu Zirtirtu mahin naupang che lova rei lo te pawh awm thei lo; 50-80 inkar hi thiam takin an zirtir thei dawn lo tih chu a chiang viau, chuti chung chuan a zirna In neitute leh chu Zirna In hawn phalna petu Education Department lam pawhin an haider a, Department ber a ngawih tlata a en liam mai mai si chuan, School neitute tan chuan han care vak tur awm hek lo, an tan chuan naupangte chu an sumdawnna material ang chauh an ni sia lawm le.

Class room pakhata naupang 50 chuang khungkhawmna School-a naupang hmun thuma ṭhena hmun hnihte chuan, zirna tuihang dik tak 'pure education' kan tih hi chu an tem tak tak ngai dawn lo va, extra tuition kal ve thei lo naupang tam tak chu kan system fuh tawh lo vang hian kan zirna In ngeiah tihchhiat an ni. Kan system hman mekah fail theih loh system ang thawthanga CCE chu kan kalpui miau avangin pawl an sawn ve zel si; a nihphung dik takah chuan fail theih loh ni lo vin, fail thei lo tur khawpa naupang zirtir, Continuous and Comprensive Evaluation a ni. CCE long form leh a awmzia dik tak pawh hre fum fe lo zirtirtute hnenah kan system chu kan barh lui a, an demawm lo e. Kan zirna In hniam zawkte kaltlangin kan system fuh tawk lo hian, zir sang si, Degree ṭha pui pui nei; hmantlak loh mi tam tak a siam chhuak chho hner hnur a, chu rah chhuak chu kan tuar chho dawn chauh a ni.

Kan syllabus-ah ni se, Class-4 naupangin Jonh Keats poem te an zir a, naupang tana a ṭangkai loh chu thu dang, Teacher ṭhenkhat pawhin hrethiam zik tluak bik hek suh, kan vaiin kan chiang lo a nih ber hi.

SMC/SMDC CHUNGCHANG HI LE.

Sawrkar enkawl Middle School chin hnuai lamah, School Management Committee hi din tura dan awmsa a ni a, chutiang bawkin High School chinah School Management Development committee tih a ni ve bawk. Heng committee-ah hian, Secretary leh Treasurer atan zirna Ina thawktu Teachers te aṭangin Headmaster leh zirtirtu pakhat thlan tur an ni a, Chairman leh a bak committee members dang zawng chu, School Naupang nu leh pa kalkhawmten an zing aṭangin an thlang tur a ni a, members dang atan VC aiawh, NGO aiawh leh chu zirna In Area aṭanga Lehkhathiam pakhat thlan tur a ni.

Dân ang chuan SMC/SMDC chu School tam berin din ve bawk mah se, an din ni bak chu thil dangah Committee chu Zirna In thuneitute leh Sawrkar ang pawhin biak rawn leh Address an ni tawh ngai lem lo. School ṭhenkhat headmaster fel deuhin an School mamawh ruahmansa hmangin Committee hnenah a hminga mawiin, sum an neihte hman dan tur an thlen changte chu a awm mahna. School ṭhenkhat; a hminga sawrkara SMC/SMDC din dan report pe ve mai, a taka SMC hruaitu leh members pawh awm lem lo School eng zat tak awm ang maw? Headmaster/Headteacher te hi School-a lu ber an ni lo va, Staff te chunga thuneitu ber a ni mai chauh zawk a, School enkawl dan tur chungchangah a bikin, Fund/Grants leh Mid-day meal chungchangah te, sum hman ral dan tur te, School Administration chungchangah te, Teachers-Parents meet neih hun tur chungchangah te SMC/SMDC chu thuneitu ber a ni a. Amaherawhchu thuneihna pe pumhlum phal erawh kan ramah hian School hriattur an awm bar lo. Education Department ber pawh hian din leh din loh chungchang bak hi a buaipui phak/peih lo a ni tih chu tu phat rual va ni suh!

SMC/SMDC Account kaltlanga Institution te sum hmuh hi Committee Chairman signature tel loa lakchhuah theih a nih loh vangin, Committee mumala din duh lo zirna In te chuan tute nge Chairman-ah hian an ruat ruk ṭhin ang tih hi chu ngaihtuah zui peih ik chuan a hre ngei turah ngai mai teh ang. Dan ṭha em em kan neihsa hmanga committee pawh vila en zui peih lo - Officer leh Ministry enkawltu mipui thlan lalte hian, eng rilru puin nge kan zirna kalphung hi hmasawnpui an tum ang le?

Kan Society-a Mobile phone leh a ken tel Social media te'n, Zirna In leh zirna chungchangah a chhe lama (negative influence/Impact) nghawng a neih nasat tawh dan te, chumi counter letna tura hmalak a ngaih nasat tawh dan te, Corporal Punishment phal loh bur a nih vanga Teachers ten harsatna namen lo an tawh chhoh mek dan te, chumi nghawng chu kan Society-in kan tawrh chhoh mek dan te, Hostel/Boarding Attach zirna In ten Sawrkar dan zamsa milin naupang an enkawl reng em? Chutah chuan Concern Department-in a tihtur a ti ṭhin reng em tih te; Tin, Government Zirtirtu inthlahdah uchuak, rui mai mai ṭhin, dan ang chauha class la ve mai mai ṭhin te, School kal peih miah lo, thiam bawk si lo, in-upgrade tum bawk si lo, Hna thawhna hmun aia Kohhran leh NGO lama lansarh tum zawk ta tlat ho te chungah hian, Concern Department-in eng nge a tiha a tih loh tih te, zirna In hniam zawka naupang nemno zawkte enkawl tura thiamna nei tlem Degree hniam zawkte thlan an ni fo ṭhinte hi kan tuar tawh em, nge kan tuar mek... tih te, Primary School level-a Peon/Chowkidar/Sweeper dah an nih ve miah loh te hi a ṭhat lohzia te, Sawrkar Zirna In ten Clerk an nei miah lo te, Technology sang chho zel ah, Digital Age-a awm kan nih mek lai a, Graduate hnua a hrana Computer Certificate nei tura exam la ngai leh rih tlat te, kan zirna Syllabus-a telh mumal la ni thei rih der lo te, a pum pui thlira kan zirna system fuh tawk loh dante pawh hi chip zui tur a va tam em.

Kan zirna leh zir dan system fuh ziktluak loh vanga zirlaite berin an inhriat loh kara an chhiatpui mek a nih si chuan, kan ram hma bak chu sawi thui tur a va vang em!

@Chhuantea Lai