KAN PHERH LEK LEK ANIA!

Kan ram chin, Assam ram chin, a sawi theih tak tak loh a ni ta ber. Tuna kan luah chin ang ang inchi khat pawh tawlh loh chu tihmâkmawh a ni. Chu chu kan ti thei ang em? 

Kan thil tum 'ram chhan himah' kan chian a ngâi. Ramri buai hian buai dang a paipâwn ṭun mai si a. Lirthei dan, intlawh pawh loh, ei bar dan châr, kawngpui dan, in hal, thlâm hâl, huan thlâi suasâm, indo, intual vuak, thuziak lama inbeih, dân hmanga inbeih... a! a tam mai. Ramri humhalh theihnghilh ṭhak hian kan tâl pherh fê thei! 

Mizoram ti-Mizo­ram-tute chu a chhûnga chêngte hi kan ni. Mal ṭan a hlawk lo tih hriaa intêlkhâwm pâwl ṭhahnem tak kan awm. Sawrkar, Kohhran, politik pâwl, tlâwmngâi pâwl, mahni ṭanghma hâi pâwl chi hrang hrang kan kat nuk mai. A ram fâ nihna leh pâwl hian Mizoram a khuh chhuak vek a, hnamah min siam a ni. 

Duh dân inang lo avângin indo tawnin, inhmu sakhi ta vek mai ila, kan khingpuite tân chuan hneh sa, bêl chhunga sa ang kan ni ang a, kan pherh chhe vek ang. 

Ramri buai theih­nghilh ṭhak hian kan inngur thei! Ball pêt theihnghilh ṭhakin, 'ngal bâwt' tiin kan inkheng chau vek thei. Zâwng rual man dân chi khat an sawi chu: mual remchângah zu bêl khat han hûng luau mai ila, a bulah talhtum dah thluah bawk ila. Zawng te chuan zu chu an in ta ngei a, an ruih deuh hnu chuan talhtum chuhin an in vaw let phung tawh mai a. Duh zat zat chhar tawh mai tur an ti! 

Ramri hi kan ruih­pui ang a, khingpuite hmanraw chhawp hmang hian kan invaw chhe vek ang a, hmelmaten duh chen chen ram an valh tawh mai ang tih hlauhawm tak a ni. 

Isua Krista, khawvêl hnehtu thusawi hi a dik tak zet mai: "Khawii ram pawh mahni indo apiang an boral ṭhin; chhûngkhat pawh mahni indo chu an boral ṭhin" (Lk 11:17) a tih hi. Zawlnei Amosa pawhin, "An inrem chauh lo chuan mi pahnih an kal ang em ni?" (Amosa 3:3) a ti bawk a. Kan ṭanrual thiam loh teh zawngin a pawi khawp ang. 

Kan khingpuite hi rin hran nei an ni a, kan ram ngaihtuah chuan an pa lian bawk e. Min hrêk rilṭam an tum a, râlthuam chi dang dang an hmang hreh lo. Fing kherek takin an che a, thutiam leh inremnaah an rinawm hek lo a, min nuthuri zuam a ni ber a, Goliatha ang mai kha an ni. 

Mahse, Pathian mî tleirâwl Davida anga "Nang zawng khandaih te, fei te, feite te kengin i lo thawk a; kei zawng sipaite Lalpa, Israel sipaite Pathian i chova hmingin ka lo thawk zâwk a ni," (I Sam 17:45) kan tih ve phawt chuan, ralthuam mâwlmang 'virvawm' hmangin kan hneh ve mai ang. 

Kan ram chhan nân hian Pathian rinchhan tlat chunga Ṭ-A-N-R-U-A-L chu tihmâkmawh a ni. Ramri hum tuma bei ṭheuh ṭheuh, tihdân leh duh dân a inang vek thei lo ang - Ar talh dân chi khat chauh a awm loh avângin. 

Kan inṭanpui tawn thei, kan inthlawp thei, kan infuih thei, kan in tiphur thei, kan in ṭawngṭai pui thei alawm. Tih fuh tâwk loh lai pawh a awm ve thei. In ngaidam tawn ila, ṭangrualin hmalam i pan zel ang u. Kan pherh lek lek a nia!

"Sakawr chu indo ni atân buatsaih a ni a, hnehna erawh chu Lalpa ta a ni" (Thuf 21:31).