Kawn chei hmanga tourists hip tum hi!

Christmas hunpuiah, tourists hip nan, Aizawl veng hrang hrangah kawn chei a, a chei nalh ber chu lawmmanah Rs. 5,00,000/- pek kan tiam a. A lawmawm khawp mai. 

Kawn chei history: Aizawl khawpui kawn chei hi, kum 10 vel bawr chu kan lo kalpui tawh a, thil ṭha intihhmuh aṭanga ṭan kan niin a lang. Lawmman beiseihna rilru tel lo, mahni veng chei mawi duh hrim hrim vanga chei kan ni hlawm. 

Tun hnaiah sorkar lam aṭangin lawmman kan insawihmuh a, mahse lawmman kan insawihmuh aṭang hian kan chei nep ta tulh tulh mai a, lawmman hian Mizo tlawmngaihna rilru hi a ti ṭhuanawp zawk a ni awm e. 

Sum pek dan thlak a ṭha ang em?:

Hetia kan ramin hunpui kan thlen a, tourists hip nana Aizawl khawpui pawh lo chei mawi ila, khual hip nan a ṭha ang kan ti rau rau a nih chuan, lawmman inpe zawng ni lo hian, kawn chei mawi tur remchang zual thlang chhuakin, kawn an chei nan pawisain ṭanpui ta hlauh ila. Tlawmngaih chhuaha an veng lo chei tura ngen zawk ni se, Rs. 5,00,000/- zet kan sem chuan, mawi tham tak tur a ni. Kan ṭhalaite hi lawmman beisei zawng chuan an che chhuak ṭha duh lo a nih hmel. 

Mipui tuihal: Tourists hipna mai ni lo, mipui pawh hi kan hunpuiah chuan, mit tlaina kan mamawhzia leh chet chhuah kan chakzia chu... Dec. ni 26 zana kan chetzia khan a ti lang. Khami zan khan keini pawh chhungte tlawhin kan vakchhuak ve a, kan haw lam chu leh, Sikulpuikawn-a mipui pung khawm khan traffic a'n ti jam tak tak mai a. Governor gate aṭangin a jam ṭan a, Sikulpuikawn thlen phei nan darkar khat zet kan hmang nia maw le! Hei hian mipui tuihalna a tilang chiang hle mai. 

Mi ramah chuan mipui intihhlimna hmun hi, private chauh ni lo, sorkar pawh hian hmun zau tak tak, an siam dei duai a, keini ve chu sorkar park kan neih chhun lah, City Park tereuhte hi a ni mai a, chu lah chu mipui chet velna tham a ni der si lo. Flower show nan te kan hmang a, chu bak hman ṭangkaina awm nghal lo le! 

Assam Rifle hmun lah hi, kan hnawt chhuak mai dawn emaw tiin mipuiin kan lo thlir a. Delhi lam order ni awm takte kha kan theh darh a, mahse chhuanlam ropui lutuk lem lo hmangin, hnawh chhuah theih lohvin an la awm reng maite hi, mipui chuan he hmun laili ngei mai hi, park atan kan awt ngawih ngawih asin mawle. 

Mipui chet velna tur hmun zau hi sorkar hian an ngaihtuahnaah a thleng pha lo ṭhin. Tawt taka inbeng khawm zawng hian kan kal a. Hmanah sorkar officer pakhatin, kan Assembly House hi, tuna a awmna leh, Government Complex a din, rawtna a awm ve ve a, officer lam rawtna chu Govt. Complex lamah a ni. Mahse kan pute chuan hmun zau zawk chu duh lovin, tuna a awmnaa din hi an thlang zawk niin a sawi a. A va thatchhe rorel em! khawpui tawt laiah Assembly House kan din rup a, session neih lai chuan traffic jam kan siam a. 

Heng hmunte hi mipui tan, mall lian tawk siamna hmun atan te dah ila. Mi chuan mall an siam pawhin, naupang intih hlimna zau tak an dah tel ṭhin. Keinni chuan hmun zau kan neih ve loh avangin, chep takah kan inbeng nghek mai zel a nih hi. 

Kan thupui aṭangin kan peng thui ta mah mah awm e. Tourist hipna atan, kawn chei hi ṭha thawkhat viau mah se, kan hmalakna hi a nep mah mah ṭhin chu a ni. Nagaland chuan ni 6 awh Horn Bill festival te, Manipur-in Yaoshang Festival ni 7 awh te an neih laiin, keini chuan Chapchar Kut ni hnih khat lek hmangtein mi hip kan tum ve a. Mi chuan a hmun tur te an nei ṭha a, an festival hun chhung atana dawr siamna tur hmun zau te, tourist riahna tur in cute tak tak han sak lawkna tur hmunte an nei. Hetiang ti ve thei tur chuan, sorkar hian hmun a buatsaih ve phawt a ngai a ni. Kawn pawh kan chei zel ang a, hmun zau zawk kan neih phei chuan, Tourist hipna tur thil tam tak kan ti thei ang, chu hun chu a va nghahhlehawm em.