AMC LEH CITY BUS TERMINAL

Aizawl khawpui enkawltu tur AMC hmasa ber chu 2010 khan kan han thlang ve a. Politics thil avangin tluk leh din fawmkemin an kal a, party hrang hrangin peizawn kual an nih avangin hna pawh an thawk chak thei meuh lo. 

An term tawp dawn lamah erawh Aizawl khawpui tih thawlna turin City Bus Terminal sawnna tur Melthum daiah an lai zawl a, an tih puitlin hmain an term a tawp. 

AMC Term hnihnaah khan MNF chuan sawr­kar nghet tak an siam a, an duhna lam hawiin hma an la thei ta. Anni hi Aizawl khawpui chep lutuk veitu an in ti bawk a, mipuiten beiseina sang tak nen kan thlir laiin AMC hmasain Melthum daia City Bus Terminal tur an lo ruahman tawh chu engkhaw sawi set set lovin an hlam­chhiah hmak mai a. 

Sawrkar hmasa thiltih chhunzawm duhlohna hri chhia kha an la vei zel a ni ber. 

Khawpui (City) reng reng chuan City Bus Terminal mumal tak an neih vek laiin keini ve chuan Ngaizel kawng sir zau laiah kan ekbeng a. Chhim lam kawtchhuah pawimawh ber, Referral Hospital kawngpui ni bawkah sawn bus 100 rual inher mup mup reng sawn Traffic a ti jam reng a nih saw. Hemi siam ṭha tur hian kan sawrkar hian hun ṭha tlemte a la nei tih erawh in hre teh se. 

Mak tak mai chu heti chung hian MNF sawrkar chuan Aizawl traffic jam free tih hi ring takin an la sawi ngam tho zu nia! Tihngaihna dang an hre lo a nih pawhin AMC kal liam ta hmalakna tal kha chhunzawm mai se mipui pawhin kan hrethiam deuh tur. 

Aizawl Smart City pawisa vaibelchhe 500 zet a awm reng a, vaibelchhe khat lek pawhin Tuirial lamah emaw Muallungthu lamah emaw hmun han lei mai se. Traffic jam free hmalakna ropui tak ni mai tur, chu ai chuan Zemabawk dai tam CM bialah parking atan nuai 200 te, nuai 100, nuai 50 te a thlawnin an pe hmiah hmiah mai a ni. 

Kum hnih dawn an sawrkar tawh a, nuai sang tel parking siam nan an sanction tawh a, motor pakhat pawh kan dah chuang reng reng lo chu a nih hi! 

Kan hma lawkah AMC kan inthlang leh dawn, heng thil fel lo zawng zawng siam ṭhat theihna kawng a inhawng dawn. Aizawl khawpui enkawltu tur atan tunge kan duh le? 

Hei hi chu ram pum huap thil a ni ve lo a, hnam dang hmuh atan pawha zahpui awm lo Aizawl din turin hmalak ni se, mipuite pawhin hemi kawngah hian mit leh beng i chhi ang u.