Zoram Politics Tibuaitu ZPM

ZPM lo lan hma Mizoram leh ZPM lan hnu Mizoram hi a inang lo tih hretu zingah hian ka tel a. He ZPM lo lan hma kha chuan October bawrah hian Candidate kha a chiang ṭhin a, ZPM hian June thlaah Candidate an tihfel avangin anmahni an hûi hmasa ber a, tunah Party dang an tibuai leh a, ZPM hian Mizoram party an tibuai zo ta a ni.

ZPM awm hma kha chuan Candidate pawisa a tam thei ang ber ei kha Unit leh Block hruaitu pawhin a rûka an tum ran ran a ni a. ZPM lo lan hnu chuan Unit zawkin Candidate tih hautak lohna turin Sum tuak hnatlang an nei a, Candidate zawk an pui lêt ta a, a letling ta hû a ni. ZPM chuan heti hian an ti thei si a, MNF leh Congress Unit hruaitu an hawi he haw a ni.

ZPM in Candidate an pek chan ve tak lohte chu Congress-in an lo chharkhawm ve ta a. Congress zinga candidate beisei ṭhenkhat chu paih an ni a, ZPM lama Candidate chang lo an sawm luh chawp chu Congress candidate an ni dawn ta a. Pu Lalthanhawla kha chu President la ni se chu Candidate atan ZPM duh loh hi a duh dawn lo a, ZPM chuan Zoram Politics a tibuai zo ta.

MNF-in Ruling ni chungin mahni timing anga Candidate set fel an ngam lo va, inthlan dawna puang lovin a indawtin an han puang chho ta a. Chief Minister bial Aizawl East I lama Journalist J Sawma Vanchhawng chu mi dang zawng aia hmin, Serchhip Candidate atan CM hian a puang a. Nomination Committee pawh an ṭhutkhawm hmain a puang fel a, ZPM Leader hlauh vang leh Aizawl East I lama mi sawm chhuah a hlauh deuh kha a lo thlem chhuak a, a lo puang ve hmiah a ni. Pu Robert Romawia chu tlanchhia ni loin tlin theihna zawngin Hachhek a pan a, East II bial chu ZPM an pe fel dera ZPM hian a tibuai hle a ni. Chalfilh Bialtu Pu Lalrinliana Sailo an paih duh si, paih ngam si lo buaiin MNF zawk an tal awk mek a. ZPM-in Candidate an siam fel hma em avanga Politics buai nghawng zel a ni.

- Lalhmunsiama (Mahmuna)