'Mizo thar' leh thuneitute

'Mizo thar' an tih tawh chuan beng in tun hrú hlawm ṭhin ti r'u!?

Hmân kum, 2010 hma lamah daih tawh khan Aizawla nula pakhat chu mut pindana khumah mipa pakhatin thla a laksak vel lai vide a darh chiam a, kha ta lang hmeichhe chêt dan kha veng tihhmingchhiatnaa ngaiin pawl ṭhenkhat chuan member nihnate an hlihsak niin an sawi. Khami hnu khan khatiang aia nasa leh chiang tak taka lang saruak thlalak leh 'thil' ti lai thlalak (video & still) darh a tam leh ta hle. Ṭhenkhat chu a mihring pawh tu nge a nih hriat chian theih tak takte a ni hlawm a, pawl anga hmalak zuina erawh kan hre zui tawh lo. Ngaiah kan nei zui tawh a niang!

Tun hnaiah social media a lâr hle a, ṭhalai mai bakah, nu leh pa, pitar leh putar, naupang chenin kan khawih fer fur tawh. Thil tih theih pawh a tam lehzual ta hle. Saruak thlalak leh mipat hmeichhiatna mai bakah, mipat mipatna leh hmeichhiat hmeichhiatna lam hawi thlalak/video chenin a darh ta suau suau mai a ni. 'Mizo thar' hi a khât tâwkin a awm zauh zauh reng mai.

Tun hnaiah Instagram-ah mipat hmeichhiatna hmang lai video live hmiah an awm a, pawl/authority (MSCW?) ṭhenkhat chuan an ngaimawh a, dan angin hma an la zui ni pawhin a lang. Heta hma an lak dan hi, mi tuin emaw mumal takin report thehlut lo a, suo moto an tih ang chi hmangin hma an la zui mai niin an sawi. A ṭha e; dan ang takin kalpui zel se a ṭha.

A hma pawhin saruak thlalak leh video darh a awm fo tawh a, ṭhenkhat chu social media-a mahni account ngeia live-a tichhuakte pawh an niin a lang. Kha'ngahte pawh khan ngati nge hma an lak loh tih hi ka rilrua awm rauh rauh a ni. IG account-a live (live lo pawh ni se) tihlan meuh hi chu a titu leh neitu chhui chhuah harsa awm lo tak a ni bawk si. Mi ṭhenkhatah dan anga hmalak a, mi ṭhenkhatah hmalak si lo chu a fuh tâwk lo ve thei.

Thuneitute hian an hmuh ve reng thilah pawh thil ṭhenkhatah chuan report a luh kher an nghak nite hian a lang thei deuh roh a. Report a luh kher ngai loa bawhzui nghal theih an hmu ve foin a rinawm si a, report a luh kher nghak loin, tun hnaia thil thleng pakhat, mipat hmeichhiatna hmang lai IG-a live-a tihchhuah chungchanga hma an la mai ang hian, hma la zung zung thei se a ṭha viauin a rinawm. An duha an tum tak tak a nih chuan bawhzui tur a awm nual âwm asin. Bakah, mit, beng leh kut han lên zauh lehzual se a ṭha ngawt ang.

- Zoramchhana