Social Media mi khawngaihthlakte

Tunlai chu inthlan dawn a nih vang a ni thei em aw? Facebook ah hian patling pui pui khawngaihthlak deuh deuh ka va hmu hnem ve. Patling ni si, Mizo ni bawk si; nileng lenga Facebook leh WhatsApp-a Politics bual at an tam avang hian ka rilru an ti hah hle a ni.

Zing thawh hlim aṭanga zan rei thlenga party dang nei ngar ngar patling an awm a, heng mite hian ei an zawng ve ngai lo em ni aw? tih ka ngaihtuah lai chuan hlawh neiin an lo post ṭhin tih ka hre leh ta hnuhnawh. In hmun hlawh tawh Facebook-a thu post ṭhin pawh a awm an ti. Contract hmu ṭhin pawh an lo awm a, hna tenau te te an pe a, Two Wheeler Taxi Permit pawh an lo post chhuak ve tho a, "Kan fak ṭhin ang che," an tih loh leh "I Biala i khingpuite hi kan lo bei ve ang," tih te chu inremna a ni. Kan Social Media star, an Venga miin an ngaihsan loh te hi a ruk chuan chawmtu an lo nei ve tlat. Mizo; patling ni ve si, Social Media post hmanga ei zawng hi an awm ta chu a ni reng mai.

Heng mite hian Pu-Chuam an nei fer fur a, chuti chuan an Pute an va hmu zauh zauh a, a tawpa tawpah chuan pawisa hmanga intih lawm tawnna a ni. Facebook leh WhatsApp lama patling ei zawng kan nei a, pa vanduai an ni.

Kan politics hi a hniam lulai khawp a, hetiang mite hi an zak bawk si lo va, a ṭhen chu Boxing te an khel dâwn an ti a, kan boruak hap a hniam a ni; Politics-ah hian. Kan ram hian hma sawn ve tawh se kan tih em em lai hian inthlan dawna boruak siamtu kan tih te chu heng mite hi an ni a, patling Social Media nilenga vil ṭhin an tam hi a buaithlak a ni.

- Lalchhanhima