MNF SORKAR HNUAIA ESTRICTED TENDER KAN TIH FO HI!

December 15, 2018 a MNF Ministry lakluh chuan nasa taka an vua leh vâng duhsakna lantirin, ‘Central lamin hmanhmawh turin min nawr’ tih chhuanlama hmangin COVID-19 avanga kan buai mup mup lai leh sorkar hnathawk hlawh hial puk a ngaih laiin kum 2019-2020 hnathawh tur Open tender ngei tura ngaih hna tam takah Restricted Tender hmangin thil ti theitu Minister ten hna an sem nasa hle. 

Sports Council hnuaiah phei chuan ‘Various Sports Infrastructure under SEDP 2019-2020’ tih hming vuahin, Mizorama hna hming vâng tak kara awm chhun ni turin Congress Block pakhat President hmingin chêng nuai 479.52 man lai Sports Minister-in hna a pe mauh bawk a. MNF Party mi leh sa contractor an ṭhathnem tehlul vei nen, a ti mak ka ti ngawt mai!

Hnam Rûna Party worker active leh hah tak takte kal kânin, hna hrang hrangah hian Chief Minister chhungte hming hi langsar zingah tel lehin Mamit Multi Indoor Stadium sakna tura laih hi CM unaupa hnathawh a ni a. Tin, Hmanni lawk, September ni 1-3 chhunga Sixth Mizoram Legislative Assembly Session,2020 zawhna chhannaah PWD Department ringawt aṭangin hna lian tak tak Restricted Tender hmangin an duhsak zâwng contract an pe ṭeuh tih a lang bawk a. Chekawn to North Vanlaiphai road December 6, 2020-a thawk zo tura tih pawh hi CM vua leh vâng zinga mi hna a ni a. He hna estimate amount hi chêng nuai 1386 chuang lâi a ni nghe nghe. Tin, CM vua leh vâng, a quota aṭanga hna an pek tih lang chiang em em, a address-a Aizawl Venglai tia la lang, mahse amah hi Aizawl Venglaia chêng tawh lo hming a lang a, Restricted Tender hmangin ama hmingin hna pathum chêng nuai 1158 man lâi pek a ni bawk a ni. MNF sorkar kum hnih chauha upa hi kum 5 a ral meuh chuan tute emaw vua leh vângte'n an hausak pui leh viau dawn niin a lang. 

Local Council inthlan kan neih zawh taka Aizawl veng lian tak pakhata MNF Local Council Chairman Candidate chuan kum 2019 aṭanga 31.8.2020 chhungin hna pathum lai Restricted Tender hmangin, ama hminga hna chhuak cheng nuai 1696.67 chuang man contract a hmu a, a hna hrang hrang hi kumin 2020, 2021 leh kum 2022-a thawk zo tura tih a ni. An hming ka hriatchian chin aṭanga ka rawn tarlan pawh heti zat zeta hna lian hi a ni a; list-a lang, anmahni ka hriatchian lohah hian CM leh Minister-te hian tute tak duhsakin vulh bik ang maw? An ti dawn rau rau a nih pawhin Party chak theihna hmanrua, Party tana theihtawp chhuahtute dah pawimawh hmasak hi a fuh fo zawk a sin. Hei aia thûk zawk hian thil kan chhuizui zel dawn a, uchuâk taka induhsakna lantir hi MNF hian sim tawh se a ṭha ngawt mai. A àwm tawk chu a awm ve e. Tuirial Hydel Project pawh kha tun kan sorkar kal meka tute emaw chhungkua chuan an hlawkpui viau tawh hlawm a nih kha. Falkawn Referral Hospital tur pawh Congress sorkarin din thar leh lo se chuan ar in tur ang lek a ni tih sawi pawh a awm thin hi. Kha thil ngaihtuah lêt khan, Mizoram tan assets ṭha leh puitling tak siam turin nasa takin ṭan la se tih hi ka chah duh pawimawh ber a ni.

A bik takin kumin March, 2020 kan chuangkai a, hripuiin min nang chho a. Mi inphalte hnen aṭangin CM Relief Fund for COVID-19 pawh a lut zel a, tun thleng hian chêng vaibelchhe 21 chuang zet a lut tawh a ni. MPCC chuan CM Relief Fund chêng vaibelchhe 6 lai chu Relief measures atan ni lo hman a nih thu an lo puang tawh bawk a nih kha. Sorkar hian mawhphurhna a hlen ngei ngeina âwm, mipuite thawhkhawm chauh ni lo, sorkar sum awm thei ang ang pawt khawma a chêt ve hunah sorkar aṭanga sum hman tur a awm loh thu a aupui châmchî a, sorkar suma RT-PCR khawl leina tur pawh kan nei lo a nih hi. Chutih mêk lai chuan chhuanlam fahrah te te hmanga Contract hna hmanhmawh pawh nilo tam tham tak chu kan sorkar hotute vua leh vâng tan an sem chur chur mai a ni. Hnam Rûn kal kân 'Restricted Tender' hi mi ṭhenkhat tan chuan a fair lo ngawt mai. 

Mizoram sorkarin sum awm lo, sum neilo inti kara contract hna chhuak ur ur, COVID-19 lai mah nise a thawk thei ina an thawh mek hna chi hrang hrang hi chhungkaw pakhat sum siamna tur chauh nilovin Mizoram hmasawnna tur tak tak ni vek se. A thawktute pawhin uluk leh ṭha taka thawk turin ka'n chah ve ngawt mai ang che u. "Sawi sawi mah sela, ka nghei dawn chuang lo," tih hlâ ang deuh khan engkim hi luhlul takin a kal mup mup a; 'Se bo hnua se kawngkhar ang' lek a ni tawh si a. COVID-19 dona atana natna hrik endikna khawl BSL-3 pawh sorkar hminga kan la neih theih loh laia kan hrilêng atana ṭangkai lem lo hna han sem chur chur mai chu a kawng hmang lo khawp mai. 

Kan economy a tlahniam dawn tho tho kan ti a nih pawhin hri kâi tlem ila, inkaidarh lo hram ila tih hi a pawimawh ber si a. Sorkar hnathawk hlawh hial pûk ngai khawpa kan sum dinhmun a tlahniam kan tih lai leh COVID-19 dona atan pawh sorkar sum hman tur kan neih loh laia contract hna lian tak tak 'Restricted Tender' hmanga duhsak zâwng pek chhuah chur chur mai chu! "Lalpa, Mizote hi eng nge maw kan nih a min hriatreng ṭhin ni," ka ti hial ṭhin a ni. Sawi ngaihna pawh ka hre tawh lo.