Chanmari - Chaltlang kawng hi

Kum khat kal ta aṭang tawh khan niin ka hria a, Chanmari - Chaltlang kawng sir mihring kalna siam hna hi thawh a ni a. Kawngpui an tizau deuh bawk nen a va ṭha dawn em tiin ka lo phur hman hle.

Mahse hei tunah kum a vei ta der mai a, chutah vawiin ni thlengin he kawngpui hi one way bakin a la kal hleih theih der lo a. Engtia heti taka rei chei nge an nih tih hi ka buaina chu a ni. 

Contractor hi eng party mi nge a nih tih lam tu chhungte nge tih lam chu ka buaina a ni lo; kei chuan ṭha takin siam zo vat se, hna ṭha leh rintlak thawk se mipuiin he kawng hi chhawr thei thuai ila tih hi ka duh zawng chu a ni tawp mai. 

Contractor te demna lam leh party inbeihna lam hi chu ka tih tur pawh a ni lova, ka eizawnna tur pawh a ni ve dawn lo bawk. 

Chu ai chuan eng hna pawh hi thawk ila, thawh hun chhung tura bitukah thawk ila, hna thawh dan tur anga sawi, lung leh balu thlengin dik takin hmang ila a ṭha mai. Buaina siam belh zawnga chet hi kan ramah a thleng fo tawh. 

Lungrem chim tih te, side dain chhe leh mai ṭhin te, lei dawh chim fo mai te hi a pawi ka ti a, a zahthlak viau bawk a ni. Rokhawlhna lian tak a awm a nih erawh chuan ṭha takin sorkarin puangzar se, chutah thil tih awm te a nih ngai chuan estimate te thlengin revise sak mai tur pawh a ni. 

Tunah chuan he kawng hi eng vanga siam rei em em nge an nih tih te, sorkar hian he kawng siam hna hi a vei lo em ni tih te hi ka ngaihtuah chu a ni ber e. 

Rokhawlhna lian tak pawh a lo awm ve reng thei e, mahse chutianga mipui nawlpui hriat phak bak harsatna an tawk a nih pawhin mipuiin nitina kan hman mamawh kawngpui pawimawh a nih avangin harsatna awm ang ang pawh chu puanzar ve mai ni rawh se tiin rawtna mawl angreng tak ka rawn siam a ni.

Ziaktu ṭhenkhat ziak leh social media post lama kan hmuh Ramhlun kawngpui tih zim pawh hi a veiawm khawp mai, traffic a jam phah fo a ni.