China-in Offical Map Thar siam chungchang
Vanglaini 1st September, 2023 page 4-a tarlan angin China-in Official MAP thar a siam chungchangah India chuan nasa takin a sawisel a, China Map thar hi India chuan a pawm ve loh thu an puang chu; China Foreign Ministry thupuangtu Mr. Wan Wenbin chuan China Offical Map thar siam chu China thiltih ṭhin dan pangngai reng a nih thu a sawi a. "Dan anga kan rama thuneihna lantirna atan ti mai kan ni. India pawh chiai mai lova rilru zau tak pu chunga la thutak lutuk lo turin ka duh a ni," a ti a.
China hian an Official Map thar an siam chhuahah hian Arunachal Pradesh chu a ram chinah a rin lut a, ni 30 August, 2023 khan “National Mapping Awareness Publicity Week” an hmannaah official map thar 2023 edition of the standard chu an tlangzarh a. Arunachal Pradesh pumpui leh AKSAL chin area-te chu an ram chhungah an rinlut a ni. Offical Map tharah hian 2023 April thlaa an lo puan tawh Arunachal Pradesh-a khaw 11 hming an phuah te pawh tarlan a ni a; heng khaw 11 hming an phuah zingah hian Arunachal Pradesh khawpui Itanagar khaw bula mi pawh a tel.
Kum 2023 China Official Map thar an tihchhuah hi Ministry of Natural Resources (MNR) siam a ni a. Hemi Official Map thar an siam rual hian digital Map an buatsaih nghal tur thu an sawi lang bawk.
He China Official Map thar an tihchhuah chhana lang chu, BJP India Leadership hnuaiah India-in G20 Summit a thlen tur duh lohna dodalna niin Senior Politician tam tak chuan an ngai. Mahse, China Presdient Xi Jinping chu G20 Summit-ah hian tel a tum thung.
Kumin 2023 hi People’s Republic of China Communist hnuaia Law of Surveying and Mapping din kum 30-na Anniversary a ni a; he dan hian survey bakah Maps siam leh enkawl chungchangah China Sorkar tha tichak tura siam a ni. China President Xi Jinping hian kum 2022 khan Border Law thar siamin ramri enkawlna kawngah khauh lehzualin thil a kalpui a. An ram chhunga khua leh hmun hming tihdanglamna Article 7 hnuaiah dah a ni a; tin, Article 22 hnuaiah China sipaite chu ramri bulah drill nei ṭhin turin order a pe bawk.
- Tluangtei Pa, Ph : 9862860181