MNF-TEN RALTHUAM KAN DAHṬHAT HUN CHHUNG HI KUMKHUA ATAN A NI LO – MNYF VP

He thu hi Mizo National Youth Front Vice President-in press-mite a kawmnaa a sawi a ni a. A thusawi hnial duh vang hrim hrim ni lovin kan hnam history-a thudik dah a pawimawh tih vang zawkin a thusawi hrang hranga kan ngaihdan kan han sawi ve a ni.

1. An ralthuam dahṭhat hun chhung hi kum maktaduai khat chhung pawh ni se, kumkhua a la nih loh chhung chuan dăwt a sawi lo tihna chu a ni mai ang a, dawt an sawi loh awm chhun a ni thei mai ang em?

2. MNF hi sawrkar laipui tharum thawha do ngam awm chhun a ni tih kan hria a. Tlăwm awm chhun an ni tih pawh kan hria. Ṭul tih hun huna do leh tur nia ngaih theiha an insawi hi a nuihzatthlakna chin a awm. India ram hi kum 1966 hunlai ai khan nasa takin a lian tawh a. Ralthuam/Sipai chakna hmanga ropui lamah khawvela palina (4-na) a ni a; ‘Economy’ hausakna lamah pangana (5-na) a ni bawk. Mahnia ralthuam nei lovina hetiang sawrkar ropui do thei tura insawi hi a nuihzatthlak kan tih lai chu a ni.

3. Ram leh sakhaw himna hi engtia sawifiah chi nge ni ang? India ram State zinga pachhe ber pawh ni ila, kan ral hma chuan kan him kan tihna em ni ang? Corruption kairualna ber leh natna ṭihbawiawm pui puiina a bawm nasat ber ni mah ila, biak ina inkhawm kan tam chhung leh thawhlawm vaibelchhe tĕl kan neih chhung chuan kan sakhua hi a him kan tihna em ni ang?

4. MNF sipaiten silai an tun chhan chu Mizoram mipui leh kohhranten an ngen vang chu a ni teh meuh mai. Mahse, remna palai hna thawk tura kohhran ngentu chu MNF a ni lo’m ni?

5. ‘Mizo nula leh tlangvalten vai hla thiam leh vai thuam inbelte chu changkannaah an ngai hman hial a, sumdawnna lamah chímralna kawng kan zawh thui hman viau’ - chu’ngte chu MNF-in an ṭhiat a, tun thlenga Mizo hnam leh Kristianna humhima a awmna chhan chu MNF vang a ni, tih tluk thu belhchian dawl lo hi a awm thei chuang em ni? 1966 hma ai khan a lĕt tamin vai inthuam inbel an awm tawh zawk a ni lo’m ni? Kan Kristianna tluka kan hnam nun tichhetu hi thil dang a awm em ni? Kan nunphung leh kan Kristianna-ah Sap nun lemchang kan ni tih hi kan hmuin kan hria a ni lo’m ni? Lal Isua zirtirnate zawm lova kan nuam tih zawng lam hawia kal kan nih avangin Kristian sakhua leh Lal Isua ber pawh kan tihmingchhia a ni lo’m ni?

6. MNF Manifesto hrim hrim ngaihtuah chuan tihhlawhtlin an nei lo tluk a ni zawk a. Assam Rifles sawn chhuah tih te, Contract leh Supply hna pekah ram leilung fate a theih chin chinah duhsak an ni ang tih te (Kamrula hre reng ila), Mizoram Village level Citizen Registration kalpui a ni ang tih te, Inremna Thuthlung angin Minority-te dikna leh chanvo humhalh a ni ang, tih te, Inremna Thuthlung angin Border Trade tipuitling tura hmalak a ni ang, tihte hi “ANG” an la ni deuh vek zawk a ni.

7. An pu berina a sawi lar em em, Traffic Jam Free neih tih te, Kawng chhawng tih angreng te, Leiverh tih angreng te leh a dang tam takte pawh ‘a mumang ram’ an la ni deuh vek rih a ni.

8. Ṭhalai puala manifesto 11 an tihte pawh hi tihhlawhtlin alawi a awm lo va. “Ang” tih deuh vek tho an la ni. Zirlai (Education)-ah phei chuan zirchianna hnuhnung bera India ram puma a chhe ber pathum zinga kan tel hian hmasawn aiin tlakhniam lam kan pan tih a lantir a ni.

9. Nationalism sawi tur chuan intodelha mahni kea din a ngai. Chawmhlawm kutdawh titiha awm reng chunga Nationlism sawi chu lemchanna mai a ni. Nationalism campaign neih hmain Intodelh campaign neih hmasak a ṭul tih i hria ang u.

10. Independent Ram leh Hnam lovin National Anthem, National Song an nei thei lo va. Mahni thu thu-a, hei hi kan hnam hla tia puanzar ve ngawt theih a ni lo. India rama kan awm chhung chuan Jana Gana Mana hi kan National Anthem, kan hnam hla a ni.

Hetiang thu belhchian dawl lo tak tak an rawn auchhuahpui leh ṭhin hi, a hun en hian inthlan lo awm hnaia boruak siam nana an ti ni ngeia a lang hi a politics laiah ngai ila. Tu sawi pawh ni se, inthlan boruak a ni emaw, hun pangngai a ni emaw, buma kan awm loh nan tu pawh kan fimkhur a ṭulzia hriat nana heng thute hi rawn chhuah kan ni e.

- M Lalmanzuala