INTHLANNA ZAWLNEITE: A DER LEH A DIK (Election Prophets: False and True)

Mizoram chuan kumin (2023) kum tawp lam, November thlaah inthlanpui kan hmachhawn leh dawn ta reng mai. Party ticket puan, ticket chang lote nuar, party member nihna leh hruaitu nihna aṭanga báng, lawmluh, lawmluh laia an thusawinaah an party hlui sawisel leh sawi chhiat, an party thar sawi ṭha, manifesto ropui leh ṭha, thutiam hlen leh hlen lo, sawrkar leiba, Assam Rifle sawn chhuah, etc. ten social media-ah leh chanchinbuah te hmun a luah tam leh ta hle a, choka titi thlengin hmun a luah mek a ni. Chumi karah chuan zawlnei intite pawhin tling tur leh tling lo turte an inhrilhlawksiak sup sup a. Social media a tikhawhar lo a, a nawmna chin pawh a awm ve bawk e.

He article-ah erawh chuan, inthlannaa tling tur leh tling lo tur hrilhlawknate hi thupui hlapuia lak chi a ni ang em? Chutianga hrilhlawktute chu zawlnei dik an ni ang em? tih leh inthlanna chungchanga zawlnei dikte rilru put dan tur leh sawi dan turte sawi zau kan tum dawn a ni.

Thuthlung Hlui hun laiah chauh ni lovin, Thuthlung Thar hunah pawh zawlneite an awm ve. Tirhkoh Pawla chuan, “Tirhkohte leh zâwlneite lungphûm chunga rem in ni, chu lungphûma a kil lung pawimawh ber chu Krista Isua hi a ni,” a ti a (Ephesi 2.20). A sawi zelnaah, “Tin, rinna leh Pathian Fapa hriatna kawngah chuan thu khat vuaa, puitlinga, Krista famkimna lenzia tluka kan zaa kan lo awm hma loh zawng, rawngbâwl hna thawk tûra mi thianghlimte tihfamkim nân, Krista taksa siam ṭha tûrin ṭhenkhat chu tirhkoh atân te, ṭhenkhat chu zâwlnei atân te, ṭhenkhat chu Chanchin Ṭha hriltu atân te, ṭhenkhat chu kohhran châwmtu leh zirtîrtu atân te a pe a,” a ti a (Ephesi 4.11-13). He Bible bung leh changte aṭang hian, Thuthlung Thar hunah pawh zawlneite an la awm zia kan hmu a ni. Thuthlung Hlui zawlneite chu kan hria a, Thuthlung Thar huna zawlneite chu tute nge an nih, eng rawngbawl hna nge an thawh, tia zawhnate a awm thei.

Thuthlung Hlui zawlneite leh Thuthlung Thar zawlneite hi rawngbawl hna inang thawktute an ni. An rawngbawl hna lairil ber chu, rinna leh Pathian hriatna kawngah puitling a, Krista famkimna kan tawm theihna tura Pathian Thu puan, thuhril leh zirtir a ni. Thuthlung Hlui zawlneite thusawi ngun taka kan zir chuan, hrilhlawkna (foretelling) lam an sawi tam ber lo. Hrilhlawkna zaa panga vel an sawi zingah pawh chuan a chanve vel chu Mesia lo kal tur hrilhlawkna a ni. An sawi tam ber chu forthtelling a ni a, chu chu ram leh sakhua hruaitute leh mipuite sualna leh thiltih dik lohte sim tura vaukhan a, Pathian hnenah kir leh tura sawmna te a ni.

Thuthlung Hlui zawlneiten thupui bera an neih chu dikna leh rinawmna a ni a (Amos 5.24, etc), ram leh khawtlangah dikna leh rinawmna a tuallen theihna turin roreltute leh sakhua hruaitute kokiah mawhphurhna a nghat lian ber a ni. Tunlai Mizorama zawlnei intite erawh chu, dikna leh rinawmna Pathian Thu tlangaupui leh dinpui aiin inthlannaa tling tur inhrilhlawksiakte an tuipui zawk emaw tih theih tur dinhmunah an ding a ni.

Kum 2020-a America (USA) inthlannaah khan, Pu Trump-a tling lo tura hrilhlawktu zawlnei intite an awm a. A han tling lo tak tak mai chu zawlnei dik an nihna fiahtuah an ngai a, an inchhuang hle awm e. Kha inthlannaah khan Pu Trump-a tling lo tura sawitute zingah khan USA leh khawvel dangah te mihring million 80 (nuai za riat) aia tam an awm ang a, chungho zingah chuan Pathian ringlotute pawh tam tak an tel ang. A nih leh, chungho zawng zawng chu ringlotute telin, zawlnei dik an ni vek tihna em mi ni ang? Ni lo ve. Social media, TV, Youtube, chanchinbu, etc leh a boruak aṭangin an thlir a, tling tur leh tling lo tura an rin thu an sawi mai a ni. Ṭhenkhat chu Pu Trump-a a tlin loh an duh avanga a tlin lohna tur lamah an sawi uar a, tlintir loh an tum a ni ber. Nakkum (2024) November thlaa an inthlanna turah pawh Republican Party ticket-a ding tur zawnnaah Pu Trump-a chu sang ber a ni leh rih. “Trump’s come back” kum ni tura ringtute tam tak an awm. Chumi karah chuan USA inthlanpui zawlneite an rawn chhuak leh sup sup ang. An awm nual tawh zawk awm e.

Mizoram dinhmun pawh, chu tiang chu kan ni ve. Zawlnei intite hian, an duhsak zawkte an tlintir a, an duhsak lohte chu an tlintir lo mai a ni. Ṭhenkhat chu Pathian aṭanga an thu dawn ni lovin, social media, TV, Youtube, chanchinbu, etc leh khawlai titi boruak aṭangin tling tur leh tling lo turte an hrilhlawk mai niin a lang. Pathianin tu hnenah mah November thlaa Mizoram inthlanpuia tling tur leh tling lo turte a rawn hrilh a rinawm lo. Chuvangin inthlan zawlneiten tling tur leh tling lo turte an hrilhlawknate hi thupui hlapuiah lak loh a ṭha ber ang. Mizoram Kristiante hi, chutiang level rinna aiin kan puitling zawk e.

Zawlnei intite inlarna leh hrilhlawkna tam takte hi chu, Pathian inlarna ni lovin anmahni suangtuahna, mumang, rin thu leh nihtir duhte ni maiin a lang. Inthlannaa tling tur leh tling lo tur hrilhlawkna te phei chu, a rau lem lo, a khawvel tlat. Pathian Thu kan nei a, Pathian Thu anga nung a, Pathian duhzawng tih hi, ringtute tan kan tihmakmawh chu a ni.

“Mumang a tam poh leh thu lawi lo a tam a ni si a. Pathian chu ṭih zâwk rawh” (Thuhriltu 5.7). A dik. Pathian hriatna leh ṭihna neih a, a duhzawng ti tura min hrilhtute leh zirtirtute hi zawlnei rawngbawl hna dik tak thawktute chu an ni. Kan ram inthlannaa zawlnei rawngbawl hna dik chu hei hi a ni: Eirukna leh thil ṭha lo dangte avangin kan ramin a tuar a, hmasawn tur anga hma kan sawn thei lohna te hailang a, “Inthlanna kan neih leh hunah chuan, Lal Davida ina dikna leh thiamnain ram a kaihruai ang khan (Sam 78.72), Pathian tihna nen ram tan hmathlir ṭha nei, corruption do ngam tur mi dik, mi rinawm, mi taima, thawkrim leh ram kalsiam hrethiam leh thiam turte dintir ila, chutiang mite chu i thlang ang u,” tih hi zawlnei thudik (prophetic message dik) chu a ni.

Roreltute thiltih dik lo hailangtu leh puangtu zawlneite chu roreltute leh an khawnbawlte chuan an làwm lo hle ṭhin. Chuvangin an tiduhdah a, an that hial ṭhin a ni (1 Lalte 28.4; Zeremia 38.1-13, etc). Pathian Thu a nih tlat avangin, zawlneite chuan an nunna dahkhamin an rawngbawl hna an thawk chhunzawm zel tho a. Thuthlung Thar hunah pawh, zawlnei Johana kha roreltu thiltih dik lo a sawi chhuah avangin thah a ni (Mathaia 14.1-12).

Zawlnei Ezekiela hun laia Israel ram dinhmun leh tunlai Mizoram dinhmun hi an inang hle. Ezekiela 22.23-31:

Lalpa chuan heti hian mi hrilh a: “Mihring fapa, Israel-te hi hrilh rawh. An ram chu ram then fai loh a ni a, thinurna ni avânga ruah dawng lo ram a ni. An lalte chu sakeibaknei sa hauh rûm ang an ni; mi an that a, mi sum leh thil hlute an lâksak a, mi tam tak an tihmeithai a ni. An puithiamte chuan ka dân an hmusit a, ka thil thianghlimte an tibawrhbâng a, thianghlim leh thianghlim lo an thliar thei lo va, a thiang leh thiang lo mi an zirtîr thei hek lo. Ka sabat ni an hai der a, an zînga tu mahin min zah lo. An officerte chu chinghne koham, a hmuh apiang seh zêl ang hi an ni: hlâwkna tûr a awm phawt chuan mi thah an tîm lo. An zâwlneite chuan inlârna an hmu der a, dâwt thu hril lâwkin, chinai an hnawih mawi bang ang hian, roreltute, puithiamte leh officerte thiltih dik lohte chu an sawi mawisak a; ka sawi loh pui, ‘Lalpa Pathian chuan heti hian a ti,’ an ti a. Mipuite pawhin mi dang an nêkchêp a, rawk an chîng a, retheite leh pachhiate an tiduhdah a, ram dang mite dik lo takin an hnehchhiah a. Thinura ram chu ka tihchhiat vek loh nân a bang chim rem ṭha tûr, a chhe laia lo ṭang tûr mi, an zîngah ka zawng a, ka hmu zo hauh lo. Chuvângin, ka thinurna an chungah ka leih ang a, ka thinrimna mei chuan a tihlum ang; an thiltih mawh chu an chungah ka nghat dâwn a ni,” Lalpa Pathian thuchhuak chuan a ti. (Mizo Common Language Version leh ziaktu lehlin dan pawlh a ni.)

Hmanlai Israel rama lalte kha tunlai Mizoram dinhmunah chuan politician-te leh roreltute hi an ni ang a; puithiamte chu pastor leh kohhran upate hi an ni ang a; officer-te chu officer kan neihte hi an ni ang a, zau zawka sawi chuan eiruk ching sawrkar hnathawhte pawh a huam ve ang. Zawlneite chu tunlaia zawlnei intite leh thuhriltute (evangesist-te) hi an ni ang a, mipui chu mipui (contractor, dawrkai, sumdawng, company leh factory nei, kut hnathawh, etc te) te hi an ni ang. Tunlai kan ram dinhmun enin, engkim chhe vek lo mah se, a chhe lai tamtak a awm. Ezekiela lehkhabua kan hmuh angin, kan zavaiin a mawh kan phur a ni. Chutihrualin, sawi tawh angin, roreltute kokiah a mawhphurna a innghat lian ber a ni.

Chuvangin a chhe lai siamṭha turin, Pathian leh ram inkara ding tlat a, ram tana malsawmna min nihsak tur leh hmasawnna min thlen tur roreltu, mi dik leh mi rinawmte kan mamawh a ni. Chutiangmi roreltute kan neih theihna turin ṭawngṭai ila, chutianga rorel thei tura kan rin leh kan hriatte chu dintir ila, i thlang ang u. Hei hi inthlannaa zawlnei rawngbawl hna dik tak chu a ni e.

- Laiu Fachhai