Kumtharah rilru thar nen

Kum 2015 chu kan lo hmang zo leh ta a, kumthar chuangkaiin kan nitin nun phung pangngai kan zawh leh dawn ta. He kumtharah hian mahni phak tawk ṭheuhah rilru thar nen hmalam panin kal i tum ang u.

Eng hnathawk pawh ni i la, kan eizawnna zawn ṭheuhah rinawmna leh taihmakna nen hmasawn zel tur kan ni a, a bik takin sorkar hnathawk phei chu mipui rawngbawltu leh mipui ban phaka awm an nih vangin an chungah mipuiin beiseina kan nei sang em em a ni tih hre thar se la.

Mahni chhung-kaw bil tan thawk an ni lo a, ram mipui tana thawk an nih vangin sum leh pai enkawl leh hman kawngah pawh kum kalta aiin dikna nena an kal kan beisei hle.

Kan politician-te phei chu mitin thleng phak rawngbawltu ropui an ni tih hi kan hai lo ang. Eirukna leh hlemhletna lakah pawh fihlim leh zual tura ngaih an ni. Politician-te hian sum leh pai eiru tur chuan sorkar hnathawkte nen an inthurual a ngai tih pawh chiang sa a ni. Politician-te phenah hian sorkar hnathawk ṭhenkhat chuan sum siam an thiam hle niin an sawi ṭhin. Dikna chin pawh a awm ngei ang.

Heng eirukna dik lo lakah pawh kumtharah hi chuan sim thei se, hmasawnna lamtluangah min hruai ngei se tih chu mipui duhdan a ni. Tin, policitian ṭha leh dik ni tur chuan hun rei tak ngaihtuah thlen phak a ngai. Hun rei lote chhung atana hlawkna leh hlemhletna avanga mahni nakin hun tihchhiat mi mi mawl leh ngaihtuah tlemte tih dan a ni.

A bikin Koh-hrana Pathian rawng-bawltute phei chu mitin hian kan endan a sangin beiseina kan nei lian hle. Zu leh sa nawmchen kawngah pawh kan mit a fu bik tih an hriat fo a tha ang. Rawngbawltu ni si, zuk leh hmuam heh takte mi ṭhenkhat ngaihmawh a ni a, insum theiin hmalam pana hmasawn turin mi naran chuan kan beisei hle a ni.

Kan kohhran hruaitute pawh kum kal ta aiin kan beiseina a sang zel tih min hriatsak se a lawmawm lehzual ang. Kohhran liana a puipa, entir nan Synod leh Baptist hmunpuia a puipate phei chu an member-te hian an lakah beiseina an nei sang leh zual a, an rawngbawlna hi Pathian leh kohhran mipui hmuh phak an ni a, an thlir reng a ni tih in hre reng se a duhawm ngawt ang. Kohhrana rawngbawltute hi sorkar officer anga Lal an ni lo tih pawh an in hriat thar zel i beisei ang u.

- Lalkhirhvela