Vanglaini Sports Ziaktute Tihsual

Hman aṭang tawhin Vanglaini sports column hi a ngaihnawm thei hle a. He column hi ṭhalaite hipkhawmtu a ni a, an chanchinbu chakna hnar a tih loh theih loh. A ziaktute pawh an thiam hle a. Inkhel thlir letna an ziah te leh inkhel tur thlir lawkna an ziah te hi a ngaihnawm thei hle; a en ngai lem lo tan pawh en chakawm em emin an ziak chhuak thiam ṭhin a ni.

Mahse, a ziaktute hian tihsual ho ang reng tak, mit tikham ang reng fu si an nei ṭhin a. Chu chu hyphen an hman ṭhin danah hian a ni. Hyphen kan hman ṭhin dan tlangpuiah chuan, thumal inzawm tur ni si, ziah zawm tawp remchang mai lo angah hian a inzawm a ni tih lanna atan a ni a. Sports column-ah chuan sapṭawng thumal a tam ṭhin a, chu chu Mizo ṭawng nena hman zawm a lo ṭul ṭhin. Hetah tak hian hyphen kan mamawh ṭhin a ni.

Eng ti angin nge Vanglaini sports ziaktute chuan hyphen chu an hman ṭhin tih Ni 13 & 14 Thawhṭanni chhuak phek 12-naa Liverpool leh Leeds United inkhel an thlir letna thuziak aṭang bik hian lo en ta ila.

A fiah zawk nan an hman dan dik lo tar lan hmain a dik hi han tar lang hmasa ila:

1) Paragraph hnihnaah, 'Inrinni zan khan Anfield-ah Liverpool-in Leeds an mikhual a,' tih thu kan hmu a. Heta hyphen an hman dan hi a dik thlap a. 'Ah' leh 'in' te hi thuhnungbet (suffix) an nih avangin ziah zawm tur a ni a, a zawmna tur thumal kha sapṭawng a nih avangin hyphen hmanga ṭhen hran a lo ngai ta a ni.

2) 'Minute 20-na a ni a, Virgil van Dijk-a hun a ni,' tih kan hmu bawk a. Hei pawh hi a dik leh thlap. Number hi suffix-in a zui chuan hyphen kan dah ṭhin. Dijk-a tih lai hi Mizo hming chu ni se, hyphen hi dah a ngai lo ang: Dika, Lawma ti tea kan ziak mai ṭhin ang hian. Mahse, hnam dang hming kha Mizo hming anga kan va koh avangin Dijk-a kan va ti ta a ni.

Tichuan, engtin nge an hman dik loh tak le? Lo en leh ila:

1) A sub-heading hmasa berah hian, 'Goal-a lut hma' tih kan hmu. A dik loh dan kan hrethiam nghal mai em? He thu-ah hian goal leh a te hi a inzawm tur a ni lo. Heta 'a' hi chu goal chungchang sawitu daih a ni a, goal suffix hi a ni lo. Chuvangin, 'Goal a lut hma' tih mai tur a ni.

2) Inkhel chhehvel tih hnuaia a point tawp ber dawttu-ah hian, 'VVD-a'n Premier League match-a khelh hnuhnung pali aṭangin,' tih thu kan hmu leh a.

Hetah pawh hian inzawm tur ni miah lo an zawm leh a. Match thumal dawt chiaha awm 'a' hi VVD aiawhtu pronoun daih a ni a, a hmaa thu nen zawm tur ni lovin a hranga ziah tur a ni. 'Premier League match a khelh hnuhnung pali aṭangin,' tih mai tur a ni ang.

A chunga point pahnih kan tar lan ang chi-ah hian hyphen an hmang sual nasa viau mai a. Sapṭawng thumal dawta 'a' a awm hian hyphen an dah deuh zel mai a, a changin a dik a, a changin a dik lo ta ṭhin a ni. Hei hian chhiar a tihrehawm ṭhin.

Chuvangin, hemi lai bikah hian kan sport ziaktu thiam tak takte hi lo inen nawn leh se ka duh a. Ka ngaimawh em em lai ka han thai lang ve a ni e. Grammar dik taka an ziah chuan an thuziak a ngaihnawm lehzual dawn si a.